Hałkipier zabiŭ dva miačy ŭ matčy, pryčym adzin na 11‑j dadadzienaj chvilinie

Unikalny siužet u čempijanacie Niderłandaŭ: hałkipier «Tełstara» Ronałd Kuman-małodšy zrabiŭ dubl u matčy z «Kambiuram». Pryčym druhi miač zalacieŭ na 90+ 11‑j chvilinie — «Tełstar» takim čynam vyrvaŭ ničyju 2:2, piša Sports.ru

Hałkipier supiernika sprabavaŭ źbić Kumana z nastroju razmovami, ale heta nie dapamahło.

Ronałd realizavaŭ dva pienalci — na 63‑j i 101‑j chvilinach. Dziakujučy hetamu jaho «Tełstar» vyratavaŭsia pry liku 0:2. Pryčym jašče z 22‑j chviliny kamanda hulała ŭdziesiacioch. Kuman-małodšy biez asablivych niervaŭ prynios kamandzie ničyju.

Syn lehiendy zbornaj Niderłandaŭ staŭ pieršym u historyi Eredyvizi (vyšejšaja liha Niderłandaŭ) bramnikam, jaki aformiŭ dubl.

«Ja vielmi rady hetamu. Pryjemna, što ja biaru na siabie adkaznaść, ale ŭsie chłopcy prarabili vialikuju pracu», — adznačyŭ hałkipier paśla dubla.

Ronałd paćvierdziŭ, što jon pieršy ŭ śpisie pienalcistaŭ «Tełstara»: «Ja dobra bju i ŭpeŭnieny ŭ sabie. U mianie nie było nijakich sumnievaŭ. Dvojčy ŭ adzin i toj ža kut. Mahčyma, kali-niebudź mnie varta heta źmianić».

Asobna jon raskazaŭ pra pienalci na 101‑j chvilinie:

«Vy viedajecie, jak heta byvaje. Bramnik pačynaje z taboj razmaŭlać. Ale mianie nie źbić z pantałyku, čuvak. Prosta treba na imhnieńnie adharadzicca ad usiaho i zasiarodzicca. Pierad matčam my nie raźličvali tolki na adzin bał, ale daviadziecca zadavolicca hetym».

U mai Kuman-małodšy ŭžo zabivaŭ ź pienalci — toj hoł dazvoliŭ «Tełstaru» zastacca ŭ elitnym dyvizijonie. U apošnim tury kamanda pieramahła «Valendam», jaki ŭ vyniku vylecieŭ u druhi pa sile dyvizijon praz stykavyja matčy.

Kumanu-małodšamu ŭžo 31 hod. Jon naradziŭsia ŭ Barsiełonie, dzie ŭ toj čas hulaŭ jahony baćka Ronałd Kuman, ale karjeru pabudavaŭ u Niderłandach.

Z 2021 hoda vystupaje za ścipły «Tełstar», a ŭ 2025‑m kamanda ŭpieršyniu za 47 hadoŭ padniałasia ŭ Eredyvizi. Ronałd byŭ asnoŭnym hałkipieram i ŭ druhim dyvizijonie, i ciapier u elicie.

A čamu Kuman naohuł pačaŭ bić pienalci?

Usio prosta: u «Tełstara» niama nadziejnaha pienalcista.

Za ŭvieś minuły siezon u čempijanacie Niderłandaŭ da matču z «Valendamam», kali zabiŭ Kuman, «Tełstar» atrymaŭ dva pienalci — i abodva byli nie realizavanyja. Pryčym vykonvali ich roznyja hulcy.

U Niderłandach Kumana-małodšaha chvalać za hulniu nahami. Były hulec «Fiejenorda» i zbornaj Maroka Karym El-Achmadzi paśla matču «Tełstara» sa svajoj byłoj kamandaj kazaŭ, što Ronałd, mahčyma, byŭ najlepšym na poli ŭ pracy ź miačom.

A Ibraim Afiełaj nazyvaŭ jaho «najlepšym bramnikam Niderłandaŭ pa hulni nahami» i faktyčna «palavym hulcom u palčatkach».

Kuman daŭno chacieŭ bić pienalci. Jašče ŭ śniežni paśla matču ź NIEKam jon śmieła pryznaŭsia, što ŭ jaho najlepšy ŭdar u kamandzie. U vyniku ciapier jon hałoŭny pienalcist.

Udar, darečy, sapraŭdy harmatny — napeŭna, pieradaŭsia ŭ spadčynu ad baćki. Kuman-starejšy, što byŭ paŭabaroncam, realizavaŭ ažno 115 pienalci.

• 6
• 0
• 0
• 0
• 0
• 0
• 0
• 0