«Nachabna traciać miljardy». Łukašenka vystupiŭ z novymi napadkami na susiednija krainy
Alaksandr Łukašenka siońnia naviedaŭ Abuz-Lasnoŭski palihon pad Baranavičami.
«Zamiežnapalityčny paradak dnia viedajecie. Ahresiŭnuju rytoryku ŭ adras Biełarusi vy bačycie, nazirajecie. Raźviedka adnosna Biełarusi viadziecca dastatkova adkryta, amal nachabna: pieryjadyčna fiksujem roznaha rodu pravakacyi, parušeńni pavietrannaj prastory. Ale nie heta hałoŭnaje. Hałoŭnaje palahaje ŭ tym, što našy susiedzi siońnia traciać miljardy dołaraŭ na ŭzbrajeńnie svajoj armii. Nachabna. Nie tolki vučeńni la miažy, ale i stvareńnie novych čaściej, armij, jakija razhortvajucca na miažy Biełarusi. Što heta takoje? Dla nas, vajskovych ludziej, usio vielmi navat zrazumieła. Tamu nam treba, jak ja kazaŭ kaliści adkryta i ščyra, rychtavacca da vajny, kab jaje paźbiehnuć. My pavinny być hatovyja zaŭsiody da adekvatnaj reakcyi, kali raptam niešta zdarycca», — zajaviŭ Łukašenka.
«Niekatoryja nas tut sprabujuć abvinavacić, što nibyta zaŭtra my na kahości źbirajemsia napadać. Jašče raz paŭtaraju: my nie źbirajemsia ni na koha napadać, my prahmatyki», — zajaviŭ Łukašenka.
«My razumiejem, što kali my na kahości (naprykład, z našych susiedziaŭ) ździejśnim napad, heta śmierci padobna. Vyjhrać kanflikt z našymi «monstrami», raźmieščanymi pa pierymietry dziaržavami, my nie možam. Na što tady pačynać vajnu, kali absalutna ščyra? Ale abaranić santymietr, milimietr svajoj ziamli, naša nasielnictva, zabiaśpiečyć biaśpieku my abaviazany», — dadaŭ Łukašenka.
Susiednija ź Biełaruśsiu krainy rezka pavialičyli vydatki na abaronu paśla napadu Rasii na Ukrainu, jaki byŭ ździejśnieny ŭ tym liku z terytoryi i pry łahistyčnaj padtrymcy Biełarusi. Rasijskija impieryjalisty i Alaksandr Łukašenka nie chavajuć pretenzij na hiehiemoniju nad jeŭrapiejskim kantynientam. Adnak zachapić i rasčlanić Ukrainu Rasii nie ŭdałosia, ukrainskaja armija zdoleła adkinuć intervientaŭ ad Kijeva, Charkava i vyzvalić značnuju častku terytoryj, zachoplenych u vyniku vierałomnaha ŭdaru ŭ lutym 2022-ha.
Ciapier čytajuć
Śviatłana Cichanoŭskaja jedzie ŭ Ńju-Jork. Jana moža pierasiekčysia z pradstaŭnikami Łukašenki, ale hałoŭnuju intryhu pakul nie raskryvajuć8
Kamientary
Prozrienije.