Janu Pinčuk adpravili na 15 sutak u ŠIZA paśla razmovy ŭ kałonii z Arturam Hajko
Načalnik adździeła HUBAZiKa pryjazdžaŭ u kałoniju i vyklikaŭ na razmovy niekatorych palitźniavolenych.
Asudžanuju na 12 hadoŭ palitźniavolenuju Janu Pinčuk u pačatku vieraśnia adpravili na 15 sutak u ŠIZA paśla razmovy z supracoŭnikam HUBAZiKa, raspaviała krynica «Miedyjazony».
U kancy žniŭnia ŭ homielskuju žanočuju kałoniju pryjazdžaŭ načalnik adździeła HUBAZiK Artur Hajko i vyklikaŭ na razmovy niekatorych palitźniavolenych.
Siarod ich była palitźniavolenaja Jana Pinčuk, na jakuju praz tydzień paśla razmovy z Hajko pačali pisać raparty — u vyniku jaje pazbavili spatkańnia, a nieŭzabavie adpravili ŭ ŠIZA.
«Kałonija sama b nie inicyjavała hetyja raparty, heta robić HUBAZiK. 1 vieraśnia joj dali 15 sutak ŠIZA, a ŭ Jany astma. I ŭ niejki momant jaje nie było ŭ kałonii. Jość vierahodnaść, što jana była ŭ balnicy», — raspaviała krynica «Miedyjazony».
Janu Pinčuk zatrymali ŭ Sankt-Pieciarburhu 1 listapada 2021 hoda, dzie jana žyła, i ŭ žniŭni 2022 hoda ekstradavali ŭ Biełaruś, niahledziačy na zabaronu ekstradycyi Kamiteta pa pravach čałavieka AAN.
6 červienia 2023 hoda palitźniavolenaj prysudzili 12 hadoŭ pazbaŭleńnia voli va ŭmovach ahulnaha režymu pa artykułach ab udziele ŭ «ekstremisckim farmavańni» (častka 1 artykuła 361‑1 KK), dziejańniach suprać nacyjanalnaj biaśpieki (častka 3 artykuła 361 KK), raspalvańni varožaści (častka 3 artykuła 130 KK), masavych biesparadkach (častka 3 artykuła 293 KK) i stvareńni «terarystyčnaj arhanizacyi» albo ŭdziele ŭ joj (častka 1 artykuła 290‑4 KK). Jana administravała try pratesnyja telehram-kanały.
Artur Hajko — supracoŭnik HUBAZiK, źviazany sa skandałam vakoł prajekta «Čornaja kniha Biełarusi». Vyśvietliłasia, što z kastryčnika 2020 hoda pa lipień 2021 hoda jon ukaraniŭsia ŭ prajekt i pad prykryćciom pracavaŭ tam kala dzieviaci miesiacaŭ.
Kamientary