Яну Пінчук адправілі на 15 сутак у ШІЗА пасля размовы ў калоніі з Артурам Гайко
Начальнік аддзела ГУБАЗіКа прыязджаў у калонію і выклікаў на размовы некаторых палітзняволеных.
Асуджаную на 12 гадоў палітзняволеную Яну Пінчук у пачатку верасня адправілі на 15 сутак у ШІЗА пасля размовы з супрацоўнікам ГУБАЗіКа, распавяла крыніца «Медыязоны».
У канцы жніўня ў гомельскую жаночую калонію прыязджаў начальнік аддзела ГУБАЗіК Артур Гайко і выклікаў на размовы некаторых палітзняволеных.
Сярод іх была палітзняволеная Яна Пінчук, на якую праз тыдзень пасля размовы з Гайко пачалі пісаць рапарты — у выніку яе пазбавілі спаткання, а неўзабаве адправілі ў ШІЗА.
«Калонія сама б не ініцыявала гэтыя рапарты, гэта робіць ГУБАЗіК. 1 верасня ёй далі 15 сутак ШІЗА, а ў Яны астма. І ў нейкі момант яе не было ў калоніі. Ёсць верагоднасць, што яна была ў бальніцы», — распавяла крыніца «Медыязоны».
Яну Пінчук затрымалі ў Санкт-Пецярбургу 1 лістапада 2021 года, дзе яна жыла, і ў жніўні 2022 года экстрадавалі ў Беларусь, нягледзячы на забарону экстрадыцыі Камітэта па правах чалавека ААН.
6 чэрвеня 2023 года палітзняволенай прысудзілі 12 гадоў пазбаўлення волі ва ўмовах агульнага рэжыму па артыкулах аб удзеле ў «экстрэмісцкім фармаванні» (частка 1 артыкула 361‑1 КК), дзеяннях супраць нацыянальнай бяспекі (частка 3 артыкула 361 КК), распальванні варожасці (частка 3 артыкула 130 КК), масавых беспарадках (частка 3 артыкула 293 КК) і стварэнні «тэрарыстычнай арганізацыі» альбо ўдзеле ў ёй (частка 1 артыкула 290‑4 КК). Яна адміністравала тры пратэсныя тэлеграм-каналы.
Артур Гайко — супрацоўнік ГУБАЗіК, звязаны са скандалам вакол праекта «Чорная кніга Беларусі». Высветлілася, што з кастрычніка 2020 года па ліпень 2021 года ён укараніўся ў праект і пад прыкрыццём працаваў там каля дзевяці месяцаў.
Каментары