Зяленскі: ЗША ўпершыню спыталі, ці гатовая Украіна вывесці войскі з Данбаса ў абмен на ўступленне ў НАТА
Калі ЗША і іншыя краіны НАТА прапанову пацвердзяць, Зяленскі вынесе гэтае пытанне на грамадскае абмеркаванне.
Амерыканскія перамоўшчыкі ўпершыню спыталі ў Кіева, ці пагодзіцца Украіна вывесці войскі з Данбаса, калі краіна стане членам НАТА. Пра гэта Уладзімір Зяленскі расказаў журналістам.
Паводле яго слоў, канкрэтнай прапановы пакуль няма.
Калі ЗША і іншыя краіны НАТА яе пацвердзяць, Зяленскі вынесе гэтае пытанне на грамадскае абмеркаванне. Прызнаваць акупаваныя тэрыторыі расійскімі Кіеў не мае намеру.
«Я неаднаразова казаў: Украіна не адступае і не аддае свае землі тэрарыстам. Амерыканцы паставілі пытанне: «А калі Украіна будзе ў НАТА, ці выйдзе Украіна з Данбаса?» Гэта адбылося ўпершыню», — заявіў палітык.
Кіеў абмяркоўвае з партнёрамі гарантыі з боку НАТА і Еўрасаюза, пастаўкі ўзбраенняў і фінансаванне ўкраінскай арміі, а таксама план аднаўлення краіны з дакладна вызначанымі крыніцамі фінансавання.
Паводле слоў Зяленскага, ЗША гавораць пра двухбаковыя гарантыі паводле ўзору артыкулаў 4 і 5 NATO. На пытанне, ці з'явяцца ў такім выпадку ва Украіне амерыканскія вайскоўцы, перамоўшчыкі адказалі адмоўна.
Украіна адмовілася б замацоўваць нейтралітэт у Канстытуцыі, паколькі такі статус не забяспечыць ёй доўгатэрміновай бяспекі.
Паводле слоў Зяленскага, Расія не хоча спыняць удары па энергетычнай інфраструктуры.
На перамовах у Абу-Дабі 10—11 лістапада расійская дэлегацыя заявіла, што не мае паўнамоцтваў дамаўляцца пра энергетычнае перамір'е. Іншыя варыянты спынення агню бакі таксама падрабязна не абмяркоўвалі.
«Вырашайце гэта з Пуціным», — так Зяленскі перадаў адказ расійскага боку.
Зяленскі дапусціў, што ў наступным раўндзе Еўропу будуць прадстаўляць некалькі чалавек. Сярод варыянтаў, якія абмяркоўваліся ў Абу-Дабі, быў удзел кіраўнікоў ЕС і НАТА.
Прапанаваны Масквой гуманітарны калідор з горада ў Данецкай вобласці Зяленскі назваў спробай дамагчыся вываду ўкраінскіх войскаў і захапіць Канстанцінаўку.
Паводле яго слоў, у горадзе ідуць баі, а цывільных жыхароў там амаль не засталося.
«Пуцін проста хоча, каб мы выйшлі з Канстанцінаўкі, а яны ўвайшлі і такім чынам акупавалі ўвесь горад. (…) Пасля Канстанцінаўкі будуць Краматорск і Славянск. Яны хочуць знішчыць гэтыя гарады, забіць усіх нашых людзей. Такая ў іх ідэя», — заявіў Зяленскі.
-
Дакументальна пацверджаная гібель на расійскім баку 730 грамадзян Беларусі
-
Працягваюцца абмежаванні ў працы Starshield на фронце. Зяленскі даручыў узмацніць кантакт з ЗША
-
У рамках «новай архітэктуры бяспекі» Масква прапануе вывесці ядзерную зброю і «Арэшнік» з Беларусі — інфармацыя пра перамовы ў Абу-Дабі
Каментары