Hetaja biełaruskaja instazorka dajšła da Playboy — ale, u adroźnieńnie ad mnohich, nie spyniłasia
Daša Mart była adnoj z zorak biełaruskaha instahrama ŭ 2010‑ia — dapamahli i zdymki dla mieksikanskaha Playboy, i status žonki chakieista Alaksandra Baraduli. Pahladzieli, dzie ciapier efiektnaja biełaruska.
Daša Mart naradziłasia ŭ Minsku i vyvučyłasia ŭ EHU na dyzajnierku. Padletkam jana z tatam chadziła na hulni chakiejnaha «Junactva», a paźniej paznajomiłasia z bramnikam Alaksandram Baradulem, jakoha jakraz navučyli chakieju ŭ škole «Junactva».
Baradula paśpiachova zahulaŭ u darosłym «Junactvie», i prykładna ŭ tyja ž hady jon pačaŭ sustrakacca z Dašaj. Praź niekalki hadoŭ para ŭziała šlub.
Daša, fatohrafka pa prafiesii, zaviała svoj błoh, dzie publikavała zbolšaha eratyčnyja zdymki ŭ bialiźnie. Dapamahło toje, što dziaŭčyna dobra razumieła, jak lepš siabie padać na fota, spartyŭnyja miedyja taksama spryjali raspaŭsiudu jaje błoha.
U 2016‑m Daša mieła ŭžo 600 tysiač padpisčykaŭ, a ŭ 2017‑m — ažno 1,1 miljona. Praz dva hady, u 2019-m, Baradula pajšoŭ z maładziečanskaha «Dynama», dzie tady hulaŭ, i pierabraŭsia razam z žonkaj u Fłarydu.
Tam Dašy ŭdałosia raskrucicca jašče lepš. U pačatku 2020‑ha dziaŭčyna, jakaja tady mieła ŭžo 1,7 miljona padpisčykaŭ, źniałasia dla mieksikanskaha Playboy. A praz dva hady Daša paŭdzielničała jak hałoŭnaja madel u viečarynie 2022 LIV GOLF Presents Maxim Miami Halloween Party, dzie zaprošanaj zorkaj byŭ viadomy repier Trevis Skot. Tady pra jaje pisali, što ŭ jaje partfolia jość supracoŭnictva z vydańniami Elle i FHM&GQ, a taksama jana vychodziła na podyum u pakazie kultavaj brytanskaj dyzajnierki Vivienne Westwood.
U 2024 hodzie Daša vyjšła na podyum Miami Swim Week — značnaha tydnia mody, dzie pakazvajuć kalekcyi kupalnikaŭ i adzieńnia dla adpačynku.
Ciapier 37‑hadovaja biełaruska kiruje dvuma biznesami ŭ ZŠA.
Pierš za ŭsio, jana stvaryła aŭtarskuju kalekcyju sukienak dla amierykanskaha brenda Sky Dress Room. Daša pradaje šaŭkovyja sukienki roznaj daŭžyni — pavodle sajta kalekcyi, sukienki pašytyja ŭ Biełarusi z premijalnych jeŭrapiejskich tkanin. Kaštujuć jany ad $100 da $150.
A jašče Mart i jaje muž trymajuć u Majami kvietkavuju kramu. Bukiet z 25 ruž kaštuje ŭ kramie $139, i heta adna z samych tannych opcyj. Naprykład, bukiet ramonkaŭ abydziecca $220.
Kali chočacca sapraŭdy ŭrazić, u kramie prapanujuć vielizarny košyk sa śviežymi kvietkami — ružami, ciulpanami, pivoniami i hartenzijami. Kaštuje taki $2480.
Alaksandr Baradula rekłamuje siamiejnyja bukiety i ŭ siabie ŭ instahramie.
Daša zarablaje i na svaim błohu, što ni dziŭna, bo ŭ jaje na siońnia 2,5 miljona padpisčykaŭ. Dziaŭčyna rehularna publikuje rekłamu — naprykład, jana rekłamavała vytvorcu spartovych dadatkaŭ i roznyja brendy bializny.
«Naša Niva» — bastyjon biełaruščyny
PADTRYMAĆ
Kamientary