Statkievič zaklikaŭ «hłybokapavažanuju Našu Nivu» nie vykarystoŭvać słova «łabuda», a Cichanoŭskaha — nie narakać na ŚMI

Ja daŭno ŭžo nie pierajmajusia kankurencyjaj za niejkaje asabistaje miesca siarod demakratyčnych sił. Hałoŭnaje dla mianie — budučynia našaj nacyi i krainy, jakaja zaležyć, u tym liku, ad najaŭnaści ŭ nas nieabchodnaj kolkaści mocnych patryjatyčnych lidaraŭ.

Tamu imknusia vyznačyć i padtrymać tych aktyŭnych biełarusaŭ i biełarusak, jakija majuć unutrany patencyjał dla lidarstva.

Padrychtavanyja charyzmatyčnyja lidary — redkaja źjava, jany farmujucca hadami i znachodziacca pad pilnaj uvahaj i padvyšanym ciskam režymu. Tamu ich varta bierahčy i padtrymoŭvać.

Škaduju, što z-za źniavoleńnia mała viedaju pra tych aktyvistaŭ, jakija vyjavili svaje lidarskija jakaści ŭ 2020 hodzie.

My — nie vielmi vialikaja nacyja, tamu mianie raduje źjaŭleńnie novych patencyjnych lidaraŭ i zasmučaje zychod ad aktyŭnaj dziejnaści tych, chto ŭžo zaśviedčyŭ siabie sapraŭdnym patryjatyčnym lidaram.

Ja kiepska staŭlusia da tych, chto publična zajaviŭ pra svaje pretenzii na kiraŭnictva, pavioŭ za saboj ludziej i potym apynuŭsia niavartym ich davieru. Na moj pohlad, heta zdrada. I nie treba spasyłak na zapałochvańni i pahrozy, strach turmy, za blizkich i dziaciej. Da lidarstva nichto nikoha nie prymušaje. Kali ž abraŭ hety šlach, to musiš adpaviadać jamu.

Bo chiba tyja, jakija pajšli za niesapraŭdnym lidaram i, pakinutyja im, apynulisia z-za hetaha razłučanymi ź blizkimi i dziećmi, prajšli turemnaje piekła, — niejkija mienš kaštoŭnyja ludzi? Što, ich pakuty značać mieniej? Niazdatnaść da samaachviaravańnia va ŭmovach vyzvolnaj baraćby suprać tyranii — prykmieta nieprydatnaści da lidarstva.

Tym bolej kaštoŭnyja lidary, čyja addanaść spravie ŭžo pravierana. Naprykład, turmoj ci vajnoj.

Ja nazyvaju heta — prajšli «pravierku na darohach». Pa naźvie savieckaha vajennaha filma, niekali zabaronienaha cenzuraj.

Mianie vielmi zasmučaje kampanija ŭ siecivie suprać Siarhieja Cichanoŭskaha — charyzmatyčnaha lidara, jaki šmat zrabiŭ dla narodnaha ŭzdymu 2020 hoda, hodna prajšoŭ turemnyja katavańni, nie paprasiŭ litaści ŭ svaich kataŭ i zaraz znachodzicca na voli. Biezumoŭna, Siarhiej rabiŭ pamyłki, amal niepaźbiežnyja paśla piaci hadoŭ poŭnaj izalacyi.

Emacyjnaść — dobraja jakaść dla palityka, nieabchodnaja dla ŭździejańnia na emocyi ludziej. Ale jana moža škodzić u stasunkach ź miedyja i dyskusijach u siecivie.

Chacia ciažka strymacca, kali nibyta demakratyčnyja aktyvisty aktyŭna vykarystoŭvajuć dla napadak na byłych palitviaźniaŭ śpiekulacyi nakont turemnych «statusaŭ». Tym bolej što biespadstaŭnaje naviešvańnie turemščykami režymu hetych «statusaŭ» źjaŭlajecca viadomym pryjomam cisku i psichałahičnych katavańniaŭ palitviaźniaŭ.

Tak atrymałasia, što ja ŭ temie nakont «statusavaj» pravakacyi suprać Siarhieja.

Ja vyśvietliŭ jaje abstaviny praz aŭtarytetnych u turemnym śviecie ludziej. Jak vyjaviłasia, niedarečnuju i chłuślivuju infarmacyju pra Siarhieja raspaŭsiudzili dvoje kryminalnikaŭ. Adzin ź jakich padpisaŭ u źniavoleńni papiery pra «zakonapasłuchmianyja pavodziny», a druhi daŭ padčas śledstva pakazańni suprać svaich siabroŭ, što aŭtamatyčna pazbaŭlaje abodvuch pavažanaha miesca ŭ turemnym śviecie i prava vynosić vyznačeńni pra «status» dy raspaŭsiudžvać infarmacyju pra ich.

Sproby «demakrataŭ» hulać na adnym sa sposabaŭ turemnych katavańniaŭ vyklikajuć u mianie pačućcio hłybokaj hidlivaści.

Tym nie mienš chaču paraić Siarhieju vučycca nie narakać na ŚMI za krytyčnyja, chaj navat i niedakładnyja, vykazvańni ŭ svoj bok, tym bolej nie reahavać emacyjna na słoŭnyja pretenzii i napady apanientaŭ, što źjaŭlajecca nieabchodnaj jakaściu demakratyčnaha palityka. I kali jon źviarnuŭsia da rasijskaj vieršavanaj kłasiki, to žadaju jamu trymacca vieršavanaj parady rasijskaha paeta Alaksandra Puškina: «Chvału i klevietu prijemli ravnodušno i nie osparivaj hłupca». Albo majoj nievieršavanaj: «Nikoli nie pierabrechvajsia z sabakami».

Hłybokapavažanuju mnoj za šmathadovuju padtrymku biełaruščyny «Našu Nivu» paprasiŭ by nie apuskacca ŭ dyskusii z čałaviekam, čyje zasłuhi i pakuty ŭ baraćbie za svabodu Biełarusi biassprečnyja, da vyrazaŭ kštałtu «łabuda». Mo, heta i pavialičvaje aŭdytoryju, ale pamianšaje pavahu.

• 52
• 5
• 1
• 1
• 1
• 0
• 0
• 1