Biełarusa z brytanskim pašpartam źbili siłaviki ŭ rasijskich Jesientukach, kudy jon pryjechaŭ na pachavańnie babuli

36‑hadovy hramadzianin Vialikabrytanii Dźmitry Smatrycki naradziŭsia ŭ Oršy, ale ŭ pačatku 2000‑ch hadoŭ razam z maci pierajechaŭ u Vialikabrytaniju. Jon rehularna pryjazdžaŭ u rasijskija Jesientuki Staŭrapalskaha kraju da svajoj babuli, pakul u 2014 hodzie u jaho nie skončyŭsia termin dziejańnia biełaruskaha pašparta. U pačatku 2026 hoda piensijanierka paviedamiła pra paharšeńnie zdaroŭja. Dźmitryj z maci aformili rasijskija vizy, kab naviedać jaje, ale pakul jany dabiralisia, žančyna pamierła. A pryhody paśla taho tolki pačynalisia, piša rasijskaja «Miedyjazona».

Pryjechaŭšy ŭ Jesientuki na pachavańnie, 3 krasavika kala pieršaj hadziny dnia Dźmitryj išoŭ pa vulicy Karła Marksa ŭ pošukach pachavalnaha biuro. U hety momant jamu pieraharadziŭ darohu aŭtamabil, ź jakoha vyjšaŭ čałaviek i zapatrabavaŭ pakazać dakumienty.

Na pytańnie Smatryckaha, chto jany takija, mužčyna adkazaŭ: «My zaraz tabie skažam, chto my takija». Tolki paśla hetaha prysutnyja zajavili, što jany z palicyi, a adzin ź ich na karotki momant pakazaŭ paśviedčańnie. Kali Dźmitryj admoviŭsia sadzicca ŭ mašynu, palicyjant, jakoha kalehi zvali Chryścik, pačaŭ bić jaho pa žyvacie i hałavie.

Smatryckaha zavieźli ŭ haradski adździeł MUS. Na piatym paviersie budynka dvoje supracoŭnikaŭ pavalili jaho na padłohu, a Chryścik pačaŭ bić mužčynu i skakać nahami pa hałavie. Jaho raździeli dahała, šukali na ciele tatuiroŭki, kryčali, što jon «tecekašnik» (supracoŭnik ukrainskaha vajenkamata), a adzin z palicyjantaŭ zajaviŭ: «U nas tut palavańnie. Ty što, nie viedaŭ?».

Źbićcio spyniłasia tolki tady, kali Dźmitryju patelefanavała maci. Palicyjant, jaki ŭziaŭ słuchaŭku, zajaviŭ, što jaje syna zatrymali praz «padazrony vyhlad». Kali žančyna pryjechała ŭ adździeł, ad jaje zapatrabavali 300 tysiač rubloŭ (kala 3300 dalaraŭ) za toje, što syn nibyta «kidaŭsia» na supracoŭnikaŭ. Jana admoviłasia płacić. U vyniku Smatryckaha niekalki hadzin pratrymali ŭ kamiery, pastavili na mihracyjny ŭlik, pryznačyli administracyjny štraf i adpuścili, nie pakinuŭšy jamu kopii dakumienta.

Na nastupny dzień Dźmitryj źviarnuŭsia ŭ traŭmapunkt, dzie ŭ jaho dyjahnastavali pierałomy nosa i dvuch rebraŭ, strasieńnie mozhu i šmatlikija drapiny. 13 krasavika jon padaŭ zajavu ŭ śledčy adździeł pa horadzie Jesientuki. Staršy śledčy Ebziejeŭ pryniaŭ zajavu i pryznačyŭ sudova-miedycynskuju ekśpiertyzu. Adnak paźniej śledčy paviedamiŭ, što kamiery videanazirańnia ŭ adździele palicyi ŭ dzień zatrymańnia nibyta nie pracavali, i paraiŭ Smatryckamu jak maha chutčej vyjechać z Rasii.

Dźmitryj źviarnuŭsia da brytanskich dypłamataŭ, jakija dapamahli jamu z arhanizacyjaj adjezdu, i 30 krasavika jon pakinuŭ terytoryju RF.

• 1
• 0
• 9
• 17
• 5
• 2
• 22
• 0