Palitviaźnia, jakoha źbili da invalidnaści, prymušajuć pracavać u kałonii i źmiaščajuć u ŠIZA

Były supracoŭnik mytnaj słužby Jaŭhien Hurynovič znachodzicca pad vartaj z krasavika 2022 hoda. Pavodle infarmacyi pravaabaroncaŭ, padčas zatrymańnia jaho žorstka źbili, u vyniku čaho jon atrymaŭ ciažkuju traŭmu chrybietnika. Doŭhi čas mužčyna nie moh samastojna chadzić, karystaŭsia invalidnym vazkom, a ciapier pierasoŭvajecca na mylicach. U 2024 hodzie jamu aficyjna była ŭstanoŭlena invalidnaść.

Niahledziačy na surjoznyja prablemy sa zdaroŭjem, pravaabaroncy paviedamlajuć, što ŭ kałonii №15 u Mahilovie Hurynoviča prymušajuć pracavać na pramysłovaj zonie. Kab dabracca da miesca pracy, jon vymušany pieraadolvać značnuju adlehłaść na mylicach. Akramia taho, jamu rehularna vynosiać dyscyplinarnyja spahnańni i, pavodle źviestak krynic, bieź istotnych padstaŭ źmiaščajuć u štrafny izalatar.

Jaŭhien adbyvaje pakarańnie asobna ad bolšaści inšych asudžanych — u haspadarčym atradzie kałonii.

Kryminalnaja sprava suprać Hurynoviča pieršapačatkova razhladałasia razam sa spravami jašče dvuch supracoŭnikaŭ mytnaj słužby — Viktara Novika i Uładzimira Žuromskaha. Adnak paźniej materyjały ŭ dačynieńni da Hurynoviča byli vyłučanyja ŭ asobnuju vytvorčaść. Sudovy praces prachodziŭ niepasredna ŭ minskim SIZA №1, pakolki praz stan zdaroŭja jon nie moh praciahły čas znachodzicca ŭ zale suda.

Sud pryznaŭ jaho vinavatym pavodle niekalkich artykułaŭ Kryminalnaha kodeksa, u tym liku ab dziaržaŭnaj zdradzie, niepravamiernym zavałodańni kampjutarnaj infarmacyjaj i pieravyšeńni słužbovych paŭnamoctvaŭ. U vyniku jamu pryznačyli 13 hadoŭ i 6 miesiacaŭ pazbaŭleńnia voli.

Pavodle infarmacyi inicyjatyvy dissidentBY, Hurynovič i jaho kalehi zajmalisia vyjaŭleńniem kantrabandy biełaruskich cyharet u krainy Jeŭrapiejskaha sajuza, u tym liku schiem, u jakich, jak śćviardžajecca, mahli ŭdzielničać dziaržaŭnyja struktury. Na dumku aŭtaraŭ rasśledavańnia, mienavita heta stała pryčynaj ich kryminalnaha pieraśledu.

Pravaabaroncy taksama paviedamlajuć, što paśla źbićcia pry zatrymańni Hurynovič nieadnarazova traplaŭ u turemny špital praz mocnyja boli ŭ śpinie, nie moh samastojna padniacca paśla padzieńniaŭ, a pryznańnia invalidnaści daviałosia damahacca praciahły čas. Tolki paśla dadatkovaha abśledavańnia ŭ Mahilovie miedyki paćvierdzili surjoznaść jaho stanu.

Niahledziačy na heta, administracyja kałonii, pavodle infarmacyi dissidentBY, praciahvaje prymušać jaho ŭdzielničać u ranišniaj fizičnaj zaradcy i chadzić na pracu. Pravaabaroncy adznačajuć, što inšyja palitviaźni rasceńvajuć takija dziejańni jak formu dadatkovaha cisku i pakarańnia čałavieka ź invalidnaściu.

• 0
• 0
• 0
• 1
• 1
• 8
• 8
• 0