Pad Małarytaj adkryli karčmu z partretami Łukašenki i Pucina i dyskatekami da nočy
U ahraharadku Chacisłaŭ Małaryckaha rajona 14 žniŭnia adkryłasia karčma «Mandarynavaja huś». Raniej jaje płanavali raźmiaścić u budynku byłoha pasta DAI na skryžavańni tras Brest — Małaryta — Kobryn — Makrany, ale hety prajekt tak i nie byŭ realizavany. Ciapier ustanova pierajechała amal da samaj miažy z Ukrainaj — prykładna za 4—5 kiłamietraŭ ad jaje, piša vydańnie BG.Media.
Interjer karčmy aformleny ŭ aficyjoznym biełaruska-rasijskim styli. Na ścienach raźmiaścili partrety Alaksandra Łukašenki i Uładzimira Pucina, a taksama biełaruskija i rasijskija dziaržaŭnyja ściahi. Uładalnica ŭstanovy Ina nazyvaje jaje «karčmoj Sajuznaj dziaržavy» i śćviardžaje, što ŭ prajekt nibyta ŭkłałasia Rasijskaja Fiederacyja. Što mienavita majecca na ŭvazie pad hetymi ŭkładańniami i chto finansavaŭ prajekt, nie ŭdakładniajecca.
Ustanova raźličanaja nie tolki na charčavańnie. Tut płanujuć pravodzić dyskateki 1990‑ch hadoŭ, karaokie, konkursy, kancerty žyvoj muzyki, tematyčnyja i pirackija viečaryny, dziciačyja mierapryjemstvy z kłoŭnami i kazačnymi piersanažami.
Bankietnaja zała raźličanaja amal na 190 čałaviek. Tut možna budzie pravodzić viasielli, jubilei i dni naradžeńnia. Uładalniki taksama hatovyja prymać žałobnyja mierapryjemstvy i paminki.
Na pieršym etapie kuchnia budzie pracavać nie ŭ poŭnym abjomie. Naviedvalnikam prapanujuć chałodnyja zakuski, draniki, bulbu fry, kaŭbasy i miasnyja narezki. U pierśpiektyvie płanujecca dadać miasnyja i vendžanyja stravy, a taksama hałubcy.
Ustanova robić staŭku i na nizkija ceny. Litr piva, pavodle słoŭ uładalnicy, budzie kaštavać kala 4,6—4,8 rubla, a macniejšyja napoi — tolki krychu daražej, čym u kramie. Akramia ježy i napojaŭ, u karčmie płanujuć pradavać niekatoryja tavary pieršaj nieabchodnaści, u tym liku małako i kaŭbasu.
U piatnicu i subotu «Mandarynavaja huś» płanuje pracavać da 2‑j hadziny nočy, u niadzielu — da 1-j. Paniadziełak i aŭtorak buduć vychadnymi dniami.
Adkryćcio ŭstanovy vyklikała nieadnaznačnuju reakcyju ŭ sacyjalnych sietkach. Častka biełarusaŭ i ŭkraincaŭ raskrytykavała interjer, atmaśfieru «pad 1990-ja» i asabliva partrety Łukašenki i Pucina. Karystalniki nazyvali ŭstanovu «nastalhijaj pa savieckim minułym», krytykavali ramont i ździŭlalisia tamu, što ŭstanova z takoj palityčnaj simvolikaj adkryłasia niepadalok ad ukrainskaj miažy.
Byli i stanoŭčyja vodhuki: niekatoryja karystalniki adznačali nizkija ceny i ličyli, što dla žycharoŭ ahraharadka takoje miesca dla adpačynku moža być zapatrabavanym.
Historyja «Mandarynavaj husi» pačałasia jašče zimoj. Pieršapačatkova ŭstanovu chacieli adkryć na byłym poście DAI. Tam płanavalisia bar, dyskateki, VIP-zona, kaljan i navat nievialiki muziej Vialikaj Ajčynnaj vajny. Takaja kancepcyja taksama vyklikała šmat krytyki, bo muziej źbiralisia raźmiaścić pobač z baram, kaljannaj i tancavalnaj placoŭkaj.
U vyniku ad idei z byłym pastom DAI, adnak, admovilisia. Pavodle tłumačeńniaŭ uładalnicy i radykalna praŭładnaha błohiera PałVanyča, jaki rekłamavaŭ prajekt, u budynku prajavilisia prablemy, źviazanyja ź nieabchodnaściu darahoha ramontu. Tamu ŭstanovu pieranieśli ŭ Chacisłaŭ.
Kamientary
i zaŭvažcie - łukašenkaŭkija hierb i fłah u adnoj ramačcy, a rasiejskija ŭ dvuch i bolšaha pamieru.. a nie - navat u troch - za śpinaj pucina taksama trykałor. to bok hałoŭny ŭ hetaj kampanii zusim nie łu.
tym bolš, "što ŭ prajekt nibyta ŭkłałasia Rasijskaja Fiederacyja"
a ty nie viedaŭ, što zdradniki RB, maskirujuć svaju zdradu ŭ metach akupacyi RB, słovami chaŭrus -intehracyja - i h.d? A ŭ KDB heta viedajuć i zajmajucca imi, dašli fotazdymak ŭ KBD, niachaj praviarajuć lichadziejaŭ