Kalifornija zabaraniła dziciačyja šluby. Ale jany pa-raniejšamu lehalnyja ŭ 32 štatach ZŠA
Hubiernatar Kalifornii Hevin Ńjusam padpisaŭ zakon ab zabaronie dziciačych šlubaŭ: ciapier hetaja praktyka tam aficyjna zabaronienaja. Adnak u 32 inšych amierykanskich štatach pa-raniejšamu dazvalajecca ŭstupleńnie ŭ šlub niepaŭnaletnich, piša Bi-bi-si.
Zhodna z novym zakonam, jaki ŭstupaje ŭ siłu 1 studzienia 2027 hoda, zaklučać šlub u Kalifornii zmohuć tolki asoby, jakija dasiahnuli 18‑hadovaha ŭzrostu.
Ńjusam nazvaŭ heta «mieraj, jakuju ŭžo daŭno nieabchodna było pryniać, kab abaranić junych kalifarnijcaŭ i dziaciej».
Na cyrymonii padpisańnia zakona prysutničała miascovaja žycharka Kortni Stoden, baćki jakoj vydali jaje zamuž za 50‑hadovaha halivudskaha akciora, kali joj spoŭniłasia 16 hadoŭ.
Stoden, jakaja doŭhi čas vystupała za zabaronu dziciačych šlubaŭ, nazvała pryniaćcie zakona pieramohaj. Jana zajaviła, što dzieci, jakija pieražyli takuju praktyku, «nikoli nie pavinny byli nieści taki ciažar».
Jana paabiacała «nie spyniać baraćbu da taho času, pakul dzieci va ŭsich 50 štatach nie buduć abaronienyja ad ustupleńnia ŭ šlub».
Mužam Stoden byŭ akcior Dah Chatčynsan, viadomy pa rolach u takich filmach, jak «Zialonaja mila» (The Green Mile), «Čas zabivać» (A Time to Kill) i «Ja — Sem» (I Am Sam).
Jany pažanilisia ŭ 2011 hodzie, ich viasielle šyroka aśviatlałasia ŭ presie, a muž i žonka źjaŭlalisia ŭ niekalkich realici-šou, u tym liku ŭ sieryjale amierykanskaha telekanała VH1 «Siamiejnaja terapija» (Couples Therapy).
Bieź minimalnaha ŭzrostu
Pryniaćcie zakona vitali i inšyja ludzi, jakija ŭstupili ŭ šlub da dasiahnieńnia paŭnalećcia.
«Siońnia Kalifornija dała śvietu vielmi važny sihnał, — skazała Brytani Bi, jakuju vydali zamuž u dziciačym uzroście. — Heta sihnał nadziei dla ŭsich dziaciej, što jany mohuć być svabodnymi ad sistemnaha hvałtu. Što jany zmohuć sami vybirać svoj šlach».
Bi raspaviała Bi-bi-si, što vyjšła zamuž u 17 hadoŭ, kab vyratavacca ad chatniaha hvałtu, ale, pavodle jaje słoŭ, u vyniku sama stała achviaraj hvałtu z boku darosłaha muža.
«Ja prosta z adnoj turmy pierajšła ŭ inšuju, — patłumačyła jana. — I jašče chapaje nachabstva śćviardžać, što ja sama prymała rašeńni. Dzieci nie mohuć davać zhodu na šlub».
Bi i inšyja ludzi, jakija pieražyli dośvied dziciačaha šlubu, na praciahu mnohich hadoŭ sprabavali damahčysia zabarony takoj praktyki ŭ Kalifornii i inšych rehijonach ZŠA.
Kala dziesiaci hadoŭ tamu dziciačyja šluby byli dazvolenyja va ŭsich štatach ZŠA, ale ŭ apošni čas zakanadaŭstva ŭsio čaściej źmianiajecca. Z 2018 hoda Kalifornija stała ŭžo 18‑m štatam, dzie była ŭviedzienaja zabarona.
Raniej u Kalifornii nie byŭ ustanoŭleny minimalny šlubny ŭzrost, u vyniku čaho dzieci mahli ŭstupać u šlub, kali zhodu davali ich baćki, a šlub uchvalaŭ sudździa.
Dla ludziej, jakija nie dasiahnuli 18‑hadovaha ŭzrostu, taksama nie isnavała miechanizmu dla razvodu, u vyniku čaho mnohija dziaŭčaty skardzilisia, što nie mohuć vyjści z adnosin, u jakich padviarhajucca hvałtu abo stanoviacca achviarami ekspłuatacyi.
Hrupa Unchained At Last, jakaja zmahajecca suprać dziciačych šlubaŭ u ZŠA, zajaŭlaje, što ŭ Kalifornii štohod vychodzili zamuž kala 9 tysiač dziaŭčat — i praktyčna ŭsie šlubnyja sajuzy z udziełam niepaŭnaletnich zaklučalisia pamiž dziaŭčatami i darosłymi mužčynami.
Jak kažuć praciŭniki dziciačych šlubaŭ, mnohija ŭ ZŠA paprostu nie viedajuć ni pra toje, što takaja praktyka dazvolenaja ŭ takoj vialikaj kolkaści štataŭ, ni pra maštab paviedamleńniaŭ ab hvałcie ŭ takich adnosinach.
Zamuž u 15 hadoŭ
Sara Taśnin kaža, što kali joj było 15 hadoŭ, jaje prymusili vyjści zamuž za mužčynu, jaki byŭ udvaja starejšy za jaje.
Jana raspaviała Bi-bi-si, što pačała zmahacca suprać dziciačych šlubaŭ jašče ŭ 2017 hodzie, i ciapier joj zdajecca nievierahodnym, što štat narešcie pryznaŭ nieabchodnaść zabaranić dziciačyja šluby.
Pavodle słoŭ Taśnin, jaje paznajomili z budučym mužam ranicaj u dzień, kali pavinna było adbycca ich viasielle.
«Mianie prymusili stać jaho žonkaj, i ŭ toj dzień usio majo žyćcio źmianiłasia», — skazała jana Bi-bi-si.
Na nastupny hod paśla zaklučeńnia šlubu jana naradziła dzicia, a ŭ 16‑hadovym uzroście pierastała vučycca ŭ škole.
«Daviadzieńnie hetaha prajekta da realizacyi było sapraŭdnym marafonam, — kaža Taśnin. — Ja prosta ŭdziačnaja, što z 1 studzienia 2027 hoda dzieci ŭ Kalifornii nie zmohuć ustupać u šlub».
Ciapier čytajuć
Muzyka, malavańnie i tancy ŭ škołach i himnazijach — usio? Što viadoma pra skaračeńni nastaŭnikaŭ-estetystaŭ8
Kamientary