U Narviehii ŭ vydaviectvie H//O//F pabačyła śviet antałohija sučasnaj biełaruskaj litaratury «Eksperter på grusomme tider» («Admysłoŭcy šalonaha času»).
Bolšuju častku tvoraŭ pierakłała Maryna Chobiel, jakaja taksama była redaktarkaj i kiraŭnicaj hetaha hruntoŭnaha prajekta, piša bellit.info.
Suredaktarami vystupili litaraturaznaŭca Uljana Vieryna i Hunar Viernes. Nad antałohijaj pracavała mnostva ludziej, u tym liku ilustratarka Aŭhińnia Ptyčka, a dziakujučy fondu Fritt Ord i Kulturnaj radzie Narviehii kniha trapić u biblijateki. U 2021 hodzie biełaruskaje abjadnańnie ŭ Narviehii «Razam» inicyjavała kraŭdfandynh i sponsarskaja padtrymka achviaradaŭcaŭ dazvoliła knizie narešcie vyjści z druku.
«Nazvu antałohii daŭ radok ź vierša Taćciany Sapač, — tłumačyć Uljana Vieryna — što najlepš pieradaje ŭvieś źmiest, jaki achoplivaje biełaruskuju litaraturu ŭ samych roznych histaryčnych, žanravych, emacyjanalnych vymiareńniach. Heta byŭ dla mianie adzin z samych składanych prajektaŭ, jaki pačaŭsia ŭ 2021 ci navat u 2020, u inšym šalonym časie jak u inšym žyćci. My vypakutavali hety źmiest i kancepcyju, paśladoŭnaść, bałans paezii i prozy, kolkaść aŭtaraŭ i aŭtarak — my z Marynaj prymali niaprostyja rašeńni, i nie raz. Na žal, u kančatkovy varyjant uvajšli nie ŭsie aŭtary i tvory, jakija byli ŭ pieršym (druhim, trecim, piatym…) varyjantach, bo akramia ŭsich inšych pryčyn, była jašče i peŭnaja kolkaść staronak…»
U antałohii siarod inšaha jość apovieść Vasila Bykava «Afhaniec (Čas šakałaŭ)» (u pierakładzie Marcina Paŭlsena), apaviadańnie Uładzimira Karatkieviča «Błakit i zołata dnia», vieršy Vienijamina Błažennaha i Ludmiły Rusavaj. Ahułam u vydańni pradstaŭlena 26 aŭtaraŭ i aŭtarak.
Raździeł z tvorami kožnaha aŭtara i aŭtarki supravadžaje karotki tekst pra jaho ci jaje, kab dapamahčy narviežskamu čytaču zrazumieć, u čym admietnaść i vartaść kožnaha i kožnaj.
«U pašparcie babuli staić data naradžeńnia 00.00.1945» — «A ŭ majoj XX.XX.1940». Jak takoje moža być?2
Kamientary