Pačobut: Pajedu ŭ Biełaruś na pačatku vieraśnia. Skonču jašče niekalki spraŭ i pajedu
Žurnalist i eks-palitviazień čarhovy raz zajaviŭ pra namier viarnucca ŭ Biełaruś, piša «Salidarnaść».
— Kaniečnie, ja źbirajusia ŭ Biełaruś. Ja z Hrodna, z Paniamońnia. I heta maja radzima — Haradzienščyna, — padkreśliŭ Andrej Pačobut u intervju adnamu z polskich kanałaŭ.
— Kali pajechaŭ niadaŭna ŭ Vilniu, i tam na Vilenščynie pačuŭ našu polskuju miascovuju pamiežnuju movu, klimat tam taki ž samy, tamu što heta faktyčna adzin rehijon, adčuŭ, što byŭ užo vielmi blizka da domu, tam takaja nastalhija mocnaja.
— Biezumoŭna, ja chaču damoŭ i pajedu na pačatku vieraśnia. Skonču jašče niekalki spraŭ i pajedu.
Viedaju, što nie ŭsie ličać heta pravilnym. U Polščy navat praviali apytańnie, i ledź nie 80% pierakananyja ŭ tym, što ja nie pavinien viartacca dadomu. Ich hałoŭny arhumient, što tut ja zrablu značna bolš, čym tam.
Nikoha z tych, chto dziejničaŭ padčas Polskaj Narodnaj Respubliki (da 1989 hodu), tych, z kim ja razmaŭlaŭ, takija arhumienty nie pierakonvajuć.
Bo kožny čałaviek razumieje, što jon adździalajecca ad svajoj supolnaści, jakaja znachodzicca absalutna ŭ inšych abstavinach. I ty nie maješ prava kazać ad ich imia.
Mnohija palaki akazvalisia ŭ padobnaj situacyi, kali vajna zaśpieła ich za miažoj, i pierad imi taksama paŭstavała dylema — viartacca ci nie. Ale možna pabačyć, što šmat chto viartaŭsia, paśla jany traplali ŭ turmy.
— Jak vy sabie ŭjaŭlajecie svoj pierachod miažy ŭ Biełaruś?
— Addaješ pašpart, jaho praviarajuć, staviać niejki štamp ci nie — i prajazdžaju. Tak ja sabie heta ŭjaŭlaju.
A što budzie dalej, chutka daviedajemsia. Zastałosia niadoŭha.
Andrej Pačobut — žurnalist Gazeta Wyborcza i adzin ź lidaraŭ polskaj mienšaści ŭ Biełarusi. Jaho zatrymali ŭ Hrodnie ŭ sakaviku 2021 hoda, a ŭ lutym 2023‑ha asudzili na vosiem hadoŭ kałonii pavodle abvinavačańniaŭ u «raspalvańni varožaści» i «zaklikach da dziejańniaŭ, nakiravanych na naniasieńnie škody nacyjanalnaj biaśpiecy». Padstavaj dla pieraśledu, siarod inšaha, stali jaho publikacyi i pohlady na histaryčnyja padziei.
28 krasavika 2026 hoda jaho vyzvalili paśla bolš jak piaci hadoŭ niavoli ŭ miežach abmienu pamiž Biełaruśsiu i Polščaj i pieradali polskamu boku. Sam Pačobut nastojvaje, što jaho dom zastajecca ŭ Hrodnie.
«U pašparcie babuli staić data naradžeńnia 00.00.1945» — «A ŭ majoj XX.XX.1940». Jak takoje moža być?2
Kamientary