U Viciebsku piedafił vykinuŭ 14‑hadovuju dziaŭčynu z bałkona. Złačyncu dapamahli vykryć navukoŭcy
U studzieni 2020 hoda ŭ Viciebsku zahinuła 14‑hadovaja dziaŭčyna — jana vypała z bałkona treciaha paviercha. Trahiedyja adbyłasia na vulicy Karła Marksa ŭ kvatery 37‑hadovaha mužčyny. Spačatku zdareńnie rascanili jak samahubstva, raspaviadajuć «Vićbičy».
37‑hadovy haspadar kvatery śćviardžaŭ, što dziaŭčyna pryjšła da jaho ŭ hości, a jon tym časam vyjšaŭ u kramu. Viarnuŭšysia, ubačyŭ jaje ŭžo pad aknom. Adnak śledčaha naściarožyli abstaviny zdareńnia.
«Choć śpiecyjalisty, jakija prybyli na miesca, pieršaj viersijaj vyłučyli suicyd, mianie jana nie zadavoliła», — kaža śledčy pa asabliva važnych spravach Aleh Asipoŭski.
Amal dvuchmietrovy 37‑hadovy mužčyna lohka pryciahvaŭ uvahu dziaŭčat. Tavaryski, nie pazbaŭleny šarmu i fantazii. A jašče paśpieŭ papracavać u jakaści achoŭnika na papularnym humarystyčnym šou ŭ stalicy Rasii. Niekalki fatahrafij z zorkami tolki dadavali jamu aŭtarytetu. Praŭda, ciahnuła jaho na ŭsio bolš maładych dziaŭčat, piša vydańnie.
Mužčynu praviarali na datyčnaść da piedafilii. Ale toj sprytna ŭchilaŭsia ad usich abvinavačańniaŭ. Ničoha drennaha nie kazała pra jaho i dziaŭčynka. A potym i zusim zdaryłasia trahiedyja.
Padletak upała z bałkona treciaha paviercha. Pry hetym jana atrymała traŭmy, niesumiaščalnyja z žyćciom.
Śledčy vymieraŭ vyšyniu parenčaŭ na bałkonie — jana składała kala 125 santymietraŭ. Rost dziaŭčyny byŭ mienš za 165 santymietraŭ, a važyła jana ŭsiaho 48 kiłahramaŭ. Pry hetym na bałkonie nie znajšli śladoŭ, jakija mahli b paćvierdzić, što jana sama pierałaziła praz parenčy.
Tym časam mužčyna praciahvaŭ pierakonvać usich u svajoj nievinavataści. Uvieś čas raskazvaŭ usim pra biadu, što zdaryłasia. Pry hetym kožnamu vydavaŭ viersiju, jakaja trochi adroźnivałasia ad papiaredniaj. Na hadavinu hibieli dziaŭčyny jon zładziŭ sapraŭdny viečar-rekvijem, na jaki zaprasiŭ znajomych. Na im šmat płakaŭ. Nie pryznavaŭ svaju vinu i ŭ piedafilii. Raskazvaŭ, što dziaŭčyna schłusiła jamu pra svoj uzrost.
Tady da rasśledavańnia pryciahnuli navukoŭcaŭ ź Instytuta ciepła– i masaabmienu imia A. V. Łykava Nacyjanalnaj akademii navuk Biełarusi. Na padstavie zamieraŭ jany raźličyli trajektoryju padzieńnia i inšyja paramietry. Ich vysnova była adnaznačnaj — cieła vykinuli.
Paśla hetaha rasśledavańnie rezka paskoryłasia. Mužčynu zatrymali. Niahledziačy na dokazy, jon da kanca admaŭlaŭ svaju vinu. Śledstva taksama paćvierdziła fakty piedafilii. Padčas rasśledavańnia stała viadoma jašče pra dźviuch niepaŭnaletnich paciarpiełych — 14‑hadovuju i 15‑hadovuju dziaŭčat.
Sud pryznačyŭ jamu 11 hadoŭ pazbaŭleńnia voli.
Ciapier čytajuć
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam14
Kamientary