Kolki Kreml płacić prapahandystam i vajenkaram, jakija ahitujuć ludziej za vajnu

Rasśledavańnie «Viorstki» pakazvaje, kolki zarablajuć rasijskija vajenkary, Z-błohiery i televiadoŭcy, jakija pracujuć na dziaržaŭnuju prapahandu vajny. Dadzienyja pra vypłaty sabranyja z rasijskich vyciečak.

Zvyčajny vajenkar dziaržaŭnaha rasijskaha telekanała atrymlivaje 250—500 tysiač rubloŭ u miesiac — heta prykładna $3—6 tysiač. Naprykład, Ryhor Udovin z VHTRK (Usierasijskaja dziaržaŭnaja televizijnaja i radyjoviaščalnaja kampanija) atrymlivaje kala 435 tysiač rubloŭ ($5,2 tys.), a Iryna Kuksienkava ź Pieršaha kanała — kala 526 tysiač ($6,3 tys.).

Ale ŭ bolš viadomych prapahandystaŭ sumy značna bolšyja.

Jaŭhien Paddubny — amal 1 młn rubloŭ ($12 tys.) u miesiac, kala 11 młn rubloŭ ($131 tys.) u hod.

Marjana Navumava (viadomaja jak Baćkaŭna) — kala 780 tysiač rubloŭ ($9,3 tys.) u miesiac, $107 tysiač u hod.

Siamion Piehaŭ, aŭtar WarGonzo, — bolš za 2,5 młn rubloŭ ($30 tysiač) u miesiac. Pavodle surazmoŭcy «Viorstki», jaho realnyja dachody mohuć być jašče bolšymi — dziasiatki miljonaŭ rubloŭ z ulikam vypłat praź IP, samazaniataść i kryptavalutu.

Barys Rožyn (kanał Colonelcassad), jaki amal nie jeździć na front, atrymlivaje kala 2,6 młn rubloŭ ($31 tys.) u miesiac. Pry hetym kala 2 młn rubloŭ jamu štomiesiac pieraličvaje kampanija «Tieleprofil», źviazanaja z vytvorčaściu pieradač Pieršaha kanała.

Pavialičyć

A sapraŭdnyja rekordy — užo ŭ televizijnych prapahandystaŭ. Dźmitryj Sajms u 2025 hodzie atrymlivaŭ kala 8 młn rubloŭ ($95 tys.) u miesiac, a za amal čatyry hady na Pieršym kanale zarabiŭ bolš za 291 młn rubloŭ — kala $3,46 młn pa siońniašnim kursie.

Pavialičyć

Arciom Šejnin, adzin z samych ahresiŭnych prapahandystaŭ rasijskaha TB, atrymlivaje kala 5,6 młn rubloŭ ($67 tys.) u miesiac i bolš za 60 młn rubloŭ ($714 tys.) u hod.

A Mikita Michałkoŭ zarablaje na svajoj prapahandysckaj dziejnaści bolš za 10 młn rubloŭ ($119 tysiač) u miesiac, abo kala $3,2 młn u hod. Akramia taho, na jaho depazitach znachodzicca bolš za 2,5 młrd rubloŭ, jakija prynosiać kala 515 młn rubloŭ ($6,13 młn) pracentaŭ u hod.

Pavodle «Viorstki», čym dalej prapahandyst ad frontu, tym bolšyja jaho dachody: Z-błohiery zarablajuć u 2—3 razy bolš za viadomych vajenkaraŭ, što vyjazdžajuć na front, a siaredni hadavy dachod televiadoŭcaŭ u daśledavańni prykładna ŭtraja bolšy za dachod vajennych prapahandystaŭ.

• 1
• 0
• 6
• 6
• 4
• 0
• 12
• 0