Biełaruskich dobraachvotnikaŭ mohuć zvolnić z ukrainskaha vojska, bo jany nie mohuć adnavić biełaruskija pašparty

Namieśnica pradstaŭnicy Abjadnanaha pierachodnaha kabinieta pa sacyjalnaj palitycy ŭ pytańniach pracy z dobraachvotnikami i ich siemjami Anastasija Machamiet u kamientary «Suśpilnamu» raspaviała pra pravavuju pastku, u jakoj mohuć apynucca biełaruskija dobraachvotniki va Ukrainie, paviedamlaje telehram-kanał Abjadnanaha pierachodnaha kabinieta.

Zhodna z novymi normami ŭkrainskaha zakanadaŭstva, da 10 listapada ŭsie zamiežnyja vajskoŭcy, jakija słužać u Siłach abarony, pavinny prajści praceduru lehalizacyi. Dla hetaha nieabchodna pradjavić aryhinał dakumienta, jaki paćviardžaje asobu.

Adnak častka biełaruskich dobraachvotnikaŭ straciła pašparty padčas słužby. Adnavić ich va Ukrainie niemahčyma, a viartańnie ŭ Biełaruś dla ludziej, jakija vajavali na baku Ukrainy, pahražaje kryminalnym pieraśledam.

«U mihracyjnym zakanadaŭstvie naŭprost prapisana, što ty pavinien pradjavić aryhinał dakumienta. Potym u DMS robiać kopiju, staviać paznaku, što kopija pravilnaja, — i viartajuć tabie aryhinał. Ale ty pavinien byŭ prynieści jaho i pakazać supracoŭniku słužby. A čałaviek, u jakoha fizična niama pašparta, nie moža ŭvajści ni ŭ jakuju praceduru», — patłumačyła Anastasija Machamiet.

Takim čynam, čałaviek moža hadami słužyć va Ukrainie, ale nie mieć mahčymaści vykanać patrabavańni mihracyjnaha zakanadaŭstva. Pavodle Machamiet, joj viadoma jak minimum pra vosiem vypadkaŭ straty pašpartoŭ biełaruskimi dobraachvotnikami.

Pry hetym uźnikaje ryzyka, što paśla zakančeńnia terminu lehalizacyi takich vajskoŭcaŭ pačnuć zvalniać sa słužby.

«Nieaficyjna ja čuła takuju pazicyju šerahu vajskovych častak: kali ničoha nie źmienicca, to naprykancy vyznačanaha dla lehalizacyi terminu ludziej biez pašpartoŭ buduć zvalniać. Na jakoj padstavie? Asobnaje pytańnie. Mahčyma, im dazvolać napisać zajavu na zvalnieńnie pa ŭłasnym žadańni abo ich daviadziecca zvolnić pa artykule za parušeńnie mihracyjnaha zakanadaŭstva. Heta vielmi składanaje pytańnie, bo ŭ čałavieka niama dakumientaŭ, ale prosta vyhnać jaho z Ukrainy — nu heta taksama nie vielmi dobra», — adznačyła Anastasija Machamiet.

Adnym z mahčymych rašeńniaŭ jana nazyvaje ŭklučeńnie vajennaha bileta ŭ pieralik dakumientaŭ, jakija paćviardžajuć asobu i pravavy status čałavieka. Machamiet rychtuje zvarot u Ministerstva abarony Ukrainy, kab vyśvietlić mahčymaść takoha rašeńnia.

• 1
• 0
• 0
• 8
• 0
• 1
• 3
• 0