U Viciebskaj vobłaści na prodaž vystavili 12 hatelaŭ, što mieściacca ŭ dziesiaci rajonach. Dzieviać abjektaŭ znachodziacca niepasredna ŭ rajcentrach. Bolšaść budynkaŭ była pabudavanaja jašče ŭ savieckija časy i ciapier patrabuje abnaŭleńnia, piša vydańnie «Viťbiči».
Płošča abjektaŭ składaje ad 220 da 2700 kvadratnych mietraŭ. Siarod ich jość jak nievialikija budynki, tak i davoli bujnyja hatelnyja kompleksy.
Samaja niezvyčajnaja prapanova — dziejny hatel u Miorach. Jaho startavaja cana składaje ŭsiaho 43 rubli. Dvuchpaviarchovy budynak raźmieščany kala voziera, pobač z nabiarežnaj, haradskim parkam i miascovymi słavutaściami.
Samy małady abjekt znachodzicca ŭ Biahomli Dokšyckaha rajona. Heta dvuchpaviarchovy matel kala trasy M3, pabudavany ŭ 2016 hodzie. Jaho płošča — bolš za 173 kv. m, a pačatkovaja cana pieravyšaje 109 tysiač rubloŭ.
Bolš darahi łot — hatel u Pastavach płoščaj amal 1700 kv. m. Budynak 1933 hoda pabudovy byŭ rekanstrujavany ŭ 2006-m. U 41 numary mohuć raźmiaścicca da 88 haściej. Startavaja cana — bolš za 1 miljon rubloŭ. Heta taksama adziny z vystaŭlenych hatelaŭ, jaki ŭžo maje siertyfikat adpaviednaści katehoryi «biez zorak».
Hateli pradajuć u Dubrovienskim, Biešankovickim, Hłybockim, Brasłaŭskim, Dokšyckim, Pastaŭskim, Miorskim, Ušackim, Tałačynskim i Čašnickim rajonach. U Tałačynskim i Čašnickim rajonach na tarhi vystavili pa dva abjekty.
Tarhi pačnucca ŭžo ŭ vieraśni i projduć na elektronnych placoŭkach Biełaruskaj univiersalnaj tavarnaj biržy i RUP «Instytut nieruchomaści i acenki».
Pry hetym patencyjnym kupcam varta ŭličvać umovy prodažu. Naprykład, hatel u Pastavach nielha budzie samastojna pieraprafilavać: źmianić jaho metavaje pryznačeńnie možna tolki ź piśmovaha dazvołu rajvykankama.
U Minsku ciapier budujucca šeść novych handlovych centraŭ. Što za jany?
U Vałožynskim rajonie zrujnujuć usie pabudovy siadziby XIX stahodździa — jašče i 14 tysiač patraciać na znos
Pradali z małatka siadzibu ŭ Padarosku, jakuju zabrali ŭ miecenata Padkarytava
U Łyntupach amal za dva miljony dalaraŭ vystavili na prodaž budynki staroha brovara
Kamientary