У Віцебскай вобласці на продаж выставілі 12 гатэляў, што месцяцца ў дзесяці раёнах. Дзевяць аб’ектаў знаходзяцца непасрэдна ў райцэнтрах. Большасць будынкаў была пабудаваная яшчэ ў савецкія часы і цяпер патрабуе абнаўлення, піша выданне «Витьбичи».
Плошча аб’ектаў складае ад 220 да 2700 квадратных метраў. Сярод іх ёсць як невялікія будынкі, так і даволі буйныя гатэльныя комплексы.
Самая незвычайная прапанова — дзейны гатэль у Мёрах. Яго стартавая цана складае ўсяго 43 рублі. Двухпавярховы будынак размешчаны каля возера, побач з набярэжнай, гарадскім паркам і мясцовымі славутасцямі.
Самы малады аб’ект знаходзіцца ў Бягомлі Докшыцкага раёна. Гэта двухпавярховы матэль каля трасы М3, пабудаваны ў 2016 годзе. Яго плошча — больш за 173 кв. м, а пачатковая цана перавышае 109 тысяч рублёў.
Больш дарагі лот — гатэль у Паставах плошчай амаль 1700 кв. м. Будынак 1933 года пабудовы быў рэканструяваны ў 2006-м. У 41 нумары могуць размясціцца да 88 гасцей. Стартавая цана — больш за 1 мільён рублёў. Гэта таксама адзіны з выстаўленых гатэляў, які ўжо мае сертыфікат адпаведнасці катэгорыі «без зорак».
Гатэлі прадаюць у Дубровенскім, Бешанковіцкім, Глыбоцкім, Браслаўскім, Докшыцкім, Пастаўскім, Мёрскім, Ушацкім, Талачынскім і Чашніцкім раёнах. У Талачынскім і Чашніцкім раёнах на таргі выставілі па два аб’екты.
Таргі пачнуцца ўжо ў верасні і пройдуць на электронных пляцоўках Беларускай універсальнай таварнай біржы і РУП «Інстытут нерухомасці і ацэнкі».
Пры гэтым патэнцыйным купцам варта ўлічваць умовы продажу. Напрыклад, гатэль у Паставах нельга будзе самастойна перапрафіляваць: змяніць яго мэтавае прызначэнне можна толькі з пісьмовага дазволу райвыканкама.
У Мінску цяпер будуюцца шэсць новых гандлёвых цэнтраў. Што за яны?
У Валожынскім раёне зруйнуюць усе пабудовы сядзібы XIX стагоддзя — яшчэ і 14 тысяч патрацяць на знос
Прадалі з малатка сядзібу ў Падароску, якую забралі ў мецэната Падкарытава
У Лынтупах амаль за два мільёны даляраў выставілі на продаж будынкі старога бровара
Цяпер чытаюць
Дырэктар Віцебскага цэнтра сучаснага мастацтва Андрэй Духоўнікаў пераехаў у Сербію — ён расказаў пра даносы ў культуры, неадукаванасць міністраў і чый жа Шагал
Каментары