U Krymie zahinuła piacihadovaja Bahdana ź Biełarusi

Sud u Krymie ŭ vieraśni 2025 hoda pryznaŭ ułaśnicu haściavoha doma ŭ Sudaku Taćcianu Vadzieckuju vinavataj u śmierci piacihadovaj Bahdany, jakaja pryjechała na adpačynak razam z baćkami i dvuma bratami.

Trahiedyja adbyłasia letam 2024 hoda ŭ «Haściavym domie na Kamunalnaj». Tut adpačyvała šmatdzietnaja siamja ź Biełarusi. Ranicaj, kali siamja rychtavałasia da adjezdu, maci stajała śpinaj da šafy i składvała rečy, dačka była pobač i razmaŭlała ź joj, baćka vyjšaŭ na vulicu. Praź niekalki chvilin maci pačuła kryk dački i mocny hrukat — draŭlanaja šafa, jakaja stajała la ściany, upała, a dziaŭčynka apynułasia pad joj. Baćka, jaki zabieh u pakoj, padniaŭ šafu i zanios Bahdanu, jakaja była biez prytomnaści, u mašynu, kab jechać u balnicu.

Pavodle zaklučeńnia sudova-miedycynskaj ekśpiertyzy, dziaŭčynka atrymała adkrytuju čerapna-mazhavuju traŭmu, što vyklikała aciok mozhu i lohkich i poliarhannuju niedastatkovaść. Praz 35 dzion lačeńnia ŭ balnicy Sudaka Bahdana pamierła.

Ekśpiertyza šafy vyjaviła defiekt płastykavaj ustaŭki va ŭnutranaj častcy pravaj piaredniaj nožki — materyjał nie byŭ cełasny, praz što apora nie całkam dakranałasia da padłohi.

Pavialičyć

Vadzieckaja vinu nie pryznała. U sudzie jana śćviardžała, što šafa, nabytaja ŭ 2013 hodzie, nikoli raniej nie padała i nie chistałasia, a pierad zasialeńniem siamji jana asabista pakłała ŭ jaje paścielnuju bializnu i nijakich paškodžańniaŭ nie zaŭvažyła.

Pa jaje viersii, Bahdana, jakaja lubiła hulać u šafie i chavacca ŭ joj, mahła samastojna zaleźci navierch, adkul i ŭpała ŭniz hałavoj. Žančyna ŭkazvała na toje, što na samoj šafie i susiedniaj tumbačcy niama śladoŭ kryvi, a taksama na toje, što nichto nie bačyŭ momant padzieńnia.

Sud adchiliŭ usie dovady Vadzieckaj. Vyrašyli, što traŭma ŭźnikła ad udaru abjomnym płoskim pradmietam značnaj masy i nie mahła ŭtvarycca pry padzieńni z vyšyni ŭłasnaha rostu dziciaci. Najaŭnaść ža defiektu nožki, jaki rabiŭ kanstrukcyju niaŭstojlivaj, pavodle suda, paćviardžaje mienavita viersiju padzieńnia šafy, a nie samavolnyja dziejańni dziaŭčynki. Sud ukazaŭ, što Vadzieckaja, zajmajučysia zdačaj žylla ŭ arendu, viedała pra stan mebli ŭ pakojach, u tym liku pra šafu, jakaja ekspłuatavałasia bolš za 10 hadoŭ i termin słužby jakoj skončyŭsia, adnak praciahvała zasialać u hety pakoj haściej, u tym liku i siamju z małoj dziaŭčynkaj.

Žančynie prysudzili try hady kałonii ŭmoŭna z vyprabavalnym terminam dva hady — za «akazańnie pasłuh, jakija nie adpaviadajuć patrabavańniam biaśpieki žyćcia i zdaroŭja spažyŭcoŭ, što pa nieaściarožnaści pryviało da śmierci čałavieka». Pry hetym maci dziaŭčynki ŭ sudzie zajaviła, što pretenzij da haspadyni doma nie maje i ličyć zdareńnie niaščasnym vypadkam.

• 0
• 0
• 0
• 7
• 3
• 11
• 0
• 0