Biełaruska, ułaśnica restarana ŭ Batumi, apynułasia ŭ centry skandału z sabakami

Śmierć Janota i videa, paśla jakoha ŭmiašałasia palicyja

Vybuch abureńnia pačaŭsia z historyi pra sabaku pa mianušcy Janot, jaki žyŭ u rajonie Novaha bulvara ŭ Batumi i byŭ znajomy miascovym vałancioram.

Zoaabaroncy ličać, što 13 žniŭnia Janot pamior ad atručvańnia. U sacsietkach źjaviłasia viersija, što da jaho śmierci mahła być datyčnaja ŭładalnica restarana Sea View Club, biełaruska Alesia Zuśko. U niekatorych dopisach havaryłasia, nibyta jana raniej pahražała atrucić badziažnych sabak i nibyta raskazvała supracoŭnikam, što raskładzienaja joju atruta «narešcie spracavała».

Pavialičyć

Pa hruzinskich i ruskamoŭnych pablikach pačało raspaŭsiudžvacca videa, na jakim žančyna padychodzić da ničyjnaha sabaki, zamachvajecca i kidaje ŭ jaho bok pradmiet, padobny da kamienia. Aŭtary publikacyj śćviardžajuć, što na zapisie — Alesia Zuśko.

U sacyjalnych sietkach źjaŭlajucca i inšyja videa kanfliktaŭ z sabakami, jakija taksama źviazvajuć z uładalnicaj Sea View.

Historyja ŭžo stała pradmietam kryminalnaha rasśledavańnia: u Hruzii zaviali spravu za žorstkaje abychodžańnie z žyviołami abo inšyja formy hvałtu.

U razmovie z hruzinskim vydańniem Batumelebi Zuśko paćvierdziła, što na videa sapraŭdy jana, adnak zajaviła, što zapis zmantavany i nie pakazvaje ŭsioj pieradhistoryi. Pavodle jaje viersii, videa źniali kala čatyroch hadoŭ tamu. Zuśko śćviardžaje, što ŭ toj dzień pryjšła da restaracyi z šaścimiesiačnym dziciom na rukach, a kala ŭvachoda sabralisia 15—17 sabak, jakija z brecham rušyli ŭ jaje bok. Jana nibyta spačatku adniesła zapłakanaje dzicia, a zatym pačała prahaniać žyvioł. Kamień, pavodle Zuśko, jana ŭziała tolki dla taho, kab napałochać sabaku, i nie trapiła ŭ jaho.

Sea View: Janota źbiŭ elektramabil

Paśla vybuchu skandału Sea View apublikavaŭ aficyjny adkaz. Restaracyja zajaviła, što batumskija pabliki raspaŭsiudzili «adkrytuju chłuśniu», nie dačakaŭšy nivodnaj ekśpiertyzy.

«Na siońnia niama nivodnaha aficyjnaha dakumienta — zaklučeńnia vieterynara, ekśpiertyzy, videa ci pastanovy dziaržaŭnych orhanaŭ, — jaki paćviardžaŭ by hetyja abvinavačańni».

Pavodle viersii Sea View, śmierć Janota była «trahičnym niaščasnym vypadkam z udziełam elektramabila». Restaracyja śćviardžaje, što jość jašče adzin paciarpieły — čałaviek, a voś nijakaha atručvańnia nie było.

«Sea View i ŭładalnica ŭstanovy nie majuć dačynieńnia ni da elektramabilaŭ, ni da adłovu, ni da atruty. My pet-friendly restaran i kormim hety horad čatyry hady», — havorycca ŭ zajavie.

Pry hetym kampanija zajaŭlaje, što hatovaja da luboj pravierki i moža dać dostup da kamier nazirańnia, kuchni i składoŭ. Kiraŭnictva źbiraje materyjały dla zvarotu ŭ pravaachoŭnyja orhany i abarony dziełavoj reputacyi.

Pavodle restarana, praz masavyja skarhi jaje instahram byŭ zabłakavany, supracoŭniki i ŭładalnica pačali atrymlivać pahrozy, a biznes ciarpić straty.

I sapraŭdy, karystalniki na roznych płatformach masava staviać restaranu minimalnyja acenki, pakidajuć hnieŭnyja kamientary i zaklikajuć inšych nie naviedvać ustanovu. Značnaja častka novych vodhukaŭ tyčycca abvinavačańniaŭ u žorstkim abychodžańni z žyviołami.

U dopisie, jaki telehram-kanał «Batumčyk» padaje jak pazicyju ŭładalnicy Sea View, śćviardžajecca, što ciapierašniaja chvala abvinavačańniaŭ zasnavanaja na apoviedzie žančyny, ź jakoj u restarana niekalki hadoŭ tamu byŭ kanflikt. Pavodle viersii Zuśko, hetaja žančyna karmiła sabak niepasredna kala ŭvachoda ŭ restaran. Uładalnica śćviardžaje, što supracoŭniki prasili pieranieści miesca karmleńnia, tamu što sabaki lažali kala ŭvachoda, załazili na kanapy i nibyta kusali haściej, kali tyja vypadkova na ich nastupali. Pretenzii paśla hetaha, pavodle jaje słoŭ, pradjaŭlali administracyi.

«Pry hetym nivodzin sabaka nikoli nie byŭ nami pakryŭdžany ci tym bolš kranuty», — napisała jana.

Jana taksama paviedamiła pra namier źviarnucca ŭ palicyju praz raspaŭsiud, jak jana ličyć, iłžyvaj infarmacyi, paklop i abrazy.

«Naša Niva» źviarnułasia pa kamientar da restarana, ale tam pakul nie adkazali na naš zapyt.

Pavialičyć

«Za barnaj stojkaj lažali šokiery i vadzianyja pistalety»

My parazmaŭlali z byłym supracoŭnikam Sea View. Pavodle jaho słoŭ, kiraŭnictva prahaniała badziažnych sabak. Pry hetym da chatnich žyvioł naviednikaŭ stavilisia spakojna.

— Kali ludzi prychodzili sa svaimi hadavancami, prablem nie było. Ale z badziažnymi sabakami zmahalisia, bo, maŭlaŭ, nie ŭsim haściam padabałasia, što jany tam chodziać, — raspaviadaje surazmoŭca.

Pavodle jaho słoŭ, za barnaj stojkaj pastajanna zachoŭvalisia prystasavańni dla adpužvańnia žyvioł:

— Tam zaŭsiody lažali šokiery, vadzianyja pistalety i inšyja prystasavańni.

Ad abarony žyvioł — da patrabavańniaŭ raspravy

Kanflikt vakoł sabak isnavaŭ zadoŭha da śmierci Janota. Jašče ŭ vodhukach naviednikaŭ za 2023 hod sustrakalisia skarhi, što žančyna, jakuju aŭtary nazyvali ŭładalnicaj Sea View, prahaniała sabak i ablivała ich vadoj. Vada, pavodle aŭtarki vodhuku, trapiła i na naviednikaŭ, jakija siadzieli pobač.

U lipieni 2025 hoda ŭ telehram-kanał «Batumčyk» źviarnułasia ananimnaja padpisčyca. Jana śćviardžała, što haspadynia Sea View «nackoŭvaje niejkich hruzinaŭ» na sabak kala susiedniaha Bike to Me:

«Chodziać, śpiecyjalna pravakujuć ich ultrahukam, stajać, kryčać, kab sabak zabili, prybrali».

Paźniej u vodhukach pačali hučać užo śćviardžeńni pra pahrozy atručvańnia i vykarystańnie pacučynaj atruty.

Abmierkavańnie historyi chutka vyjšła za miežy pytańnia pra abychodžańnie z sabakami. U hruzinskich kamientarach pačali patrabavać zakryć abo navat razhramić restaran, departavać Zuśko i jaje muža, zabaranić im ujezd u krainu. 

30 žniŭnia a 18‑j hadzinie abaroncy žyvioł płanujuć sabracca kala Sea View. Arhanizatary nazyvajuć mierapryjemstva akcyjaj u abaronu sabak i paviedamlajuć, što na jaje zaprošanyja žurnalisty. 

Chto takaja Alesia Zuśko

Alesia Zuśko — 42‑hadovaja biełaruska, jakaja ŭžo niekalki hadoŭ raźvivaje restaranny i zabaŭlalny biznes u Batumi. 

Pavialičyć

Jaje biznes-historyja pačałasia zadoŭha da pierajezdu ŭ Hruziju, jašče ŭ Minsku.

Prynamsi z 2017 hoda Alesia Biaržanina (Zuśko) była źviazanaja ź minskim Private House — baram na Zybickaj. Na svajoj staroncy Zuśko rehularna rekłamavała Private House, zdymałasia dla jaho ŭ śmiełych vobrazach i padavała kłub jak častku ŭłasnaha ładu žyćcia — z načnymi viečarynkami i demanstratyŭnaj raskošaj.

Pavialičyć

Private House adkryŭsia ŭ 2013 hodzie, kali Zybickaja jašče nie pieratvaryłasia ŭ hałoŭnuju tusovačnuju vulicu Minska. Pieršapačatkova jon pracavaŭ jak kłub pryvatnych kinazałaŭ, a kali naviednikaŭ stała zašmat, adnu kinazału razburyli i zrabili zamiest jaje druhi bar. Potym źjaviłasia terasa, a akcent pieramiaściŭsia z kinaprahladaŭ na načnyja viečaryny.

Jurydyčna Private House byŭ źviazany z pryvatnym handlovym unitarnym pradpryjemstvam «MamaMija», zarehistravanym u kastryčniku 2012 hoda pa tym ža adrasie — Zybickaja, 9. 

Apošnija publikacyi minskaha Private House datujucca kastryčnikam 2024 hoda. Da taho momantu kampanija «MamaMija» ŭžo mieła prablemy. U krasaviku 2024‑ha było pryniata rašeńnie ab jaje likvidacyi, paźniej pačałasia pracedura bankructva. 28 maja 2026 hoda kampaniju kančatkova vyklučyli ź biełaruskaha dziaržaŭnaha rejestra.

Pavialičyć

• 2
• 1
• 1
• 8
• 0
• 0
• 10
• 0