Papa Leŭ XIV trapiŭ u śpis samych stylnych ludziej śvietu pa viersii viadomaha amierykanskaha časopisa
Žury časopisa Vanity Fair acaniła jahonaje ŭmieńnie spałučać papskuju sutanu z krasoŭkami Nike i biejsbołkami.
Biełyja najki pad biełaj sutanaj i kiepka «Chicago White Sox» na płoščy Śviatoha Piatra. Jak zaŭvažaje The Times, Papa Leŭ XIV nastolki ŭraziŭ ekśpiertaŭ viadomaha amierykanskaha časopis Vanity Fair svaim stylem vopratki, što trapiŭ u katehoryju «Aryhinały», kudy trapili ludzi z najbolš admietnym i navatarskim padychodam da adzieńnia.
The Pope was wearing the Nike Franchise Low, a budget low-top tennis shoe dating back to the 1970s pic.twitter.com/CzX3r5EFos
U hetym rejtynhu 70‑hadovy pantyfik apynuŭsia ŭ kampanii davoli ekstravahantnych asob. Jon kankuruje za zvańnie ikony stylu sa śpiavačkaj Bjork, režysioram Spajkam Li i amierykanskaj fihurystkaj Alisaj Lju.
U karotkim daśje ŭ hrafie «prafiesija» sucha značycca: «Kiraŭnik Katalickaj carkvy». Dalej idzie abhruntavańnie žury časopisa, čamu pantyfik byŭ uklučany ŭ śpis: «Jašče da abrańnia papam Leŭ XIV — tady jašče ajciec Bob — nadavaŭ svajoj ścipłaj kremavaj sutanie amal niabiesny šyk, spałučajučy jaje z krasoŭkami Nike».
Jak adznačaje vydańnie, staŭšy Papam, «Leŭ zachavaŭ svajo pačućcio iraničnaj niazmušanaści i čas ad času nosić biejsbołki».
Chto jašče ŭ śpisie Vanity Fair za 2026 hod?
Sioleta Vanity Fair padzialiŭ naminantaŭ na niekalki katehoryj — «Aryhinały», «Duety» i «Budučynia». U redakcyi padkreślivajuć, što šukali nie prosta ludziej, jakija dobra apranajucca abo karystajucca pasłuhami prafiesijnych stylistaŭ, a tych, dla kaho moda stanovicca srodkam samavyjaŭleńnia.
Siarod inšych pretendentaŭ na zvańnie samych stylnych pavodle Vanity Fair — narviežski futbalist «Mančester Sici» Erlinh Chołand. Stylistaŭ vydańnia ŭraziŭ, u pryvatnaści, jahony «bieły šaŭkovy kaścium i drapiravany šalik», u jakich jon źjaviŭsia na mierapryjemstvie Dolce & Gabbana na Sicylii.
U śpis trapiŭ i brytanski śpiavak i akcior Hary Stajłz, jaki, jak piša vydańnie, «razumieje siłu karotkich šortaŭ i viedaje, jak nasić halštuk, časam adnačasova ź imi».
U dziasiatcy samych stylnych 29‑hadovy akcior Džejkab Ełardzi, jakoha nazyvajuć adnym z mahčymych nastupnych Džejmsaŭ Bondaŭ. Vydańnie adznačyła jahonaje ŭmieńnie spałučać vintažnuju pracoŭnuju vopratku ź luksavymi sumkami i navat «pieratvarać pakiet z kramy ŭ modny aksiesuar».
U śpis taksama trapili inšyja viadomyja pradstaŭniki šou-biznesu, kino, sportu, kultury i hramadskaha žyćcia.
Vanity Fair krytykuje papularny trend na athleisure
Niahledziačy na kamplimienty na adras Papy, kamanda Vanity Fair hladzić na stan sučasnaj mody z naściarohaj. Časopis krytykuje papularny trend na athleisure (našeńnie spartyŭnych rečaŭ paŭsiul — ad pracy da viečarynak), nazyvajučy heta adnym z hałoŭnych modnych pralikaŭ času.
Akramia taho, ekśpierty zaniepakojenyja «viartańniem kansiervatyzmu» ŭ ZŠA pry Donaldzie Trampie. «Moda raźvivajecca imkliva, i nie ŭsio ŭ joj — kali nam budzie dazvolena tak vykazacca — vyhladaje asabliva dobra», — padsumoŭvaje Vanity Fair.
Kamientary