Eks-čynoŭnik, abjaŭleny ŭ vyšuk va Ukrainie, buduje novaje žyćcio ŭ Biełarusi. Užo zaniaŭ vysokuju pasadu i pabyvaŭ u Pałacy Niezaležnaści
Adnym ź biznesmienaŭ, jakija pryjšli na «tymbiłdynh» u Pałac Niezaležnaści, staŭ Raman Viaprycki — były top-mieniedžar Ukrainskaj čyhunki, jakoha abviaścili ŭ vyšuk pa karupcyjnych artykułach. Ź vieraśnia 2022 hoda na radzimie jon aficyjna ličycca źnikłym bieź viestak. Vydańnie «Lusterka» vyśvietliła, što były čynoŭnik žyvie ŭ Biełarusi: kiruje zavodam, źviazany z praŭładnym fondam i ŭžo paśpieŭ parazmaŭlać z premjer-ministram na niadaŭniaj sustrečy ŭ pałacy.
Karkałomnaja karjera i abvinavačańni ŭ «schiemach»
«U adroźnieńnie ad bolšaści ŭkrainskich palitykaŭ i biznesmienaŭ, Raman Siarhiejevič maje nie adnu, a adrazu piać vyšejšych adukacyj», — pisaŭ pra Viapryckaha ananimny aŭtar. Vidać, u niekatorych VNU jon vučyŭsia paralelna — u vyniku staŭ dypłamavanym dziaržsłužboŭcam, mieniedžaram, ziemleŭparadkavalnikam, čyhunačnikam i doktaram jurydyčnych navuk u adnoj asobie. Z 2009 hoda jon pracavaŭ na dziaržaŭnych pasadach u Dnieprapiatroŭskaj i Charkaŭskaj abłaściach, u 2015‑m staŭ deputatam abłasnoj rady.
U 2017 hodzie Viaprycki pierajšoŭ u rehijanalnaje padraździaleńnie Ukrainskaj čyhunki, u chutkim časie ŭznačaliŭ miascovy filijał. Užo ŭ lutym 2020 hoda vyras da dyrektara pa infrastruktury ŭ maciarynskaj kampanii, jašče praz paru miesiacaŭ staŭ členam praŭleńnia. Vydańnie «Stopkor» nazyvała heta rašeńnie «adnym z samych dziŭnych za apošnija tydni», a novapryznačanaha kiraŭnika — «adnym z hałoŭnych aŭtaraŭ cieniavych schiem u čyhunačnaj śfiery».
Uźlot skončyŭsia praź miesiac: Nacyjanalnaje antykarupcyjnaje biuro Ukrainy praviało pieratrusy ŭ Viapryckaha doma i na pracoŭnym miescy. Dziaržaŭnyja aŭdytary znajšli ŭ jaho dziejnaści finansavyja parušeńni prykładna na 100 miljonaŭ hryŭniaŭ (kala 3,8 miljona dalaraŭ na toj momant). Jaho spačatku adchilili ad pasady, a paśla zvolnili.
Sam Viaprycki nazyvaŭ rašeńnie pieraduziatym i śćviardžaŭ, što dziejničaŭ pa zakonie. U svajoj adstaŭcy jon bačyŭ reakcyju ŭpłyvovych hrup na jaho publičnaść i sproby zmahacca z karupcyjnymi schiemami ŭnutry kampanii.
Čym skončyłasia taja historyja, nieviadoma, ukrainskija ŚMI bolš pra jaje nie pisali, sam mieniedžar syšoŭ z publičnaha pola. Adnak praz dva hady Nacyjanalnaja palicyja abjaviła Viapryckaha ŭ vyšuk.
U kartcy na sajcie viedamstva paznačana, što jaho šukajuć pa takich artykułach:
- č. 5 st. 191 KK Ukrainy (Prysvajeńnie, rastrata majomaści abo zavałodańnie joj šlacham złoŭžyvańnia słužbovym stanoviščam u asabliva bujnych pamierach abo hrupaj asob);
- č. 2 st. 366 KK Ukrainy (Słužbovaja padrobka, jakaja pryviała da ciažkich nastupstvaŭ).
Viapryckaha chacieli ŭziać pad vartu, ale nie zmahli znajści. U vyniku pryznali źnikłym ź vieraśnia 2022 hoda — u hetym statusie jon zastajecca i ciapier.
Novaje žyćcio ŭ Biełarusi
Usie vyšejpieraličanyja padziei nie pieraškodzili Ramanu Viapryckamu znajści pracu ŭ Biełarusi ŭ 2024 hodzie. Jon staŭ dyrektaram zavoda «Izamat-kamplekt», jaki vyrablaje krapiežnyja elemienty. Sam zavod znachodzicca ŭ Ivacevičach u Bresckaj vobłaści, a skład i ofis — u Minsku.
Fota na sajcie i ŭ sacsietkach pradpryjemstva pakazvajuć: zavodam kiruje nie prosta adnafamilec, a toj ža čałaviek, jakoha šukajuć va Ukrainie. Servis Amazon Recognition aceńvaje vierahodnaść supadzieńnia ŭ 99,9%.
Viaprycki taksama źviazany z praŭładnym Biełaruskim fondam miru. Jaho možna bačyć na mierapryjemstvach arhanizacyi, u publikacyjach jaho pradstaŭlajuć daradcam staršyni praŭleńnia — to bok Maksima Miśko. Pry hetym na sajcie fonda nie zhadvajecca takaja pasada.
Niadaŭna Viaprycki pryjazdžaŭ u minski Pałac Niezaležnaści na sustreču pradprymalnikaŭ z premjer-ministram Alaksandram Turčynym. Miarkujučy pa fotaspravazdačy, jon paśpieŭ źviarnucca da čynoŭnika z pytańniem (a mahčyma — z prapanovaj).
Cikava, što były čynoŭnik pryvioz z saboj u Biełaruś nie tolki cikavaść da biznesu i hramadskaj dziejnaści, ale i chobi. Na staroncy Viapryckaha ŭ «Vikipiedyi» chtości skłaŭ doŭhi śpis jaho ŭznaharod i dasiahnieńniaŭ — naprykład, miedal «Lidary XXI stahodździa», orden «Patryjot Ukrainy», pieršaja dziejnaja kopija kijeŭskaha vakzała.
U hetym ža śpisie — samaja vialikaja va Ukrainie kalekcyja fihurak słanoŭ. Da adjezdu ich było 3700, deputat navat uklučaŭ ich u svaje štohadovyja dekłaracyi. U Biełarusi Viaprycki ŭstupiŭ u abjadnańnie kalekcyjanieraŭ, a hetym letam atrymaŭ dla svajoj kalekcyi śpiecyjalny siertyfikat. Darečy, jana padrasła: fihurak užo bolš za čatyry tysiačy.
U Pałac Niezaležnaści ŭ dzień adpačynku Łukašenki zaprasili 140 biznesmienaŭ. Ich prymaŭ Turčyn
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ
Stała viadoma, jak ciapier žyvie ŭ Rasii siamja źbiehłaha prezidenta Ukrainy Janukoviča i jak jaho samoha ciapier zavuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam
«Kajłas, ja idu». Što za biełaruska źnikła ŭ žudasnym sieli ŭ Niepale6
Kamientary