Karol Narviehii Chokan VIII ustupiŭ na tron paśla śmierci svajho baćki, Charalda V, jaki znachodziŭsia na tronie na praciahu 35 hadoŭ, pamior siońnia ranicaj u Nacyjanalnaj balnicy Osła na 90‑m hodzie žyćcia.
53‑hadovy Chokan — čaćviorty karol, jaki ŭznačalvaje sučasnuju manarchiju Narviehii z tych časoŭ, jak jana była adnoŭlena ŭ 1905 hodzie paśla zdabyćcia krainaj niezaležnaści ad Šviecyi. Jon ciesna supracoŭničaŭ sa svaim baćkam, vykonvajučy karaleŭskija abaviazki, a ŭ apošnija hady ŭziaŭ na siabie bolš abaviazkaŭ, pakolki Charald chvareŭ abo adsutničaŭ, piša Bi-bi-si.
Jon stanovicca karalom u niespakojny čas dla karaleŭskaj siamji Narviehii. Manarchija karystajecca papularnaściu, ale ŭ apošnija hady jaje atačajuć skandały. Žonka novaha karala Miete-Maryt pryniesła prabačeńni za suviazi z asudžanym seksualnym złačyncam Džefry Epštejnam. Jaje syn ad papiarednich adnosin, Maryus Borh Chiejbi, byŭ pryznany vinavatym u zhvałtavańni padčas hučnaha sudovaha pracesu. Jon abskardžvaje prysud.
«Našy adnosiny stanoviacca ŭsio bolš ciesnymi. Jon mudry chłopiec. Ź im usio budzie ŭ paradku, kali pryjdzie jaho čas. Pryjemna heta ŭśviedamlać. Dumaju, moj baćka chvalavaŭsia bolš, čym ja. Mnie vielmi pašancavała, što mienavita kronprync Chokan praciahnie hetuju spravu», — kazaŭ Charald pra syna ŭ knizie «Karol raspaviadaje».
Pa słovach Charalda, Chokan byŭ pobač ź im na praciahu ŭsiaho jaho praŭleńnia i aktyŭna ŭdzielničaŭ u pracy. Niahledziačy na toje, što paśla śmierci Charalda V Chokan aŭtamatyčna staŭ novym karalom Narviehii, jaho čakaje aficyjnaja pracedura składańnia prysiahi na viernaść Kanstytucyi.
25 žniŭnia 2001 hoda naśledny prync Chokan ažaniŭsia ź Miete-Maryt Ćjesem Chojbi. Praz 3 hady ŭ muža i žonki naradziłasia dačka Inhryd Alaksandra, jakaja źjaŭlajecca budučaj spadčyńnicaj narviežskaha trona. U śniežni 2005 hoda ŭ Chokana i Miete-Maryt naradziŭsia syn Śviere Mahnus.
Chokan byŭ sa zbornaj Narviehii pa futbole ŭ ZŠA, prysutničaŭ na ŭsich matčach, a pa viartańni ŭznačaliŭ śviatočnaje «viesłavańnie» ŭ honar kamandy, što sabrała 100 tysiač čałaviek kala karaleŭskaha pałaca ŭ Osła. Chokan biŭ u baraban.
Ciapier čytajuć
Biełaruska, ułaśnica restarana ŭ Batumi, apynułasia ŭ centry skandału z sabakami13
Kamientary