Minadukacyi zamiest abaviazkovaha rejestra repietytaraŭ stvoryć ich «vitrynu»
Ministerstva adukacyi Biełarusi admoviłasia ad idei stvarać abaviazkovy rejestr repietytaraŭ. Zamiest jaho płanujuć zapuścić admysłovuju «vitrynu fizičnych asob, jakija samastojna zajmajucca prafiesijnaj dziejnaściu pa navučańni dziaciej». Pra heta 25 žniŭnia paviedamiła dyrektarka Departamienta kantrolu jakaści adukacyi Ministerstva adukacyi Volha Rybaklučava.
Pavodle słoŭ čynoŭnicy, novaja sistema nie budzie bazaj dla pravierak. Jaje zadumali jak servis, jaki dapamoža baćkam znachodzić repietytaraŭ, a piedahoham — pradstaŭlać svaje pasłuhi.
Hałoŭny pryncyp «vitryny» — dobraachvotnaść. Repietytary sami buduć vyrašać, ci raźmiaščać tam svaju infarmacyju. Admova ad udziełu nie budzie pieraškadžać čałavieku zajmacca samastojnaj prafiesijnaj dziejnaściu pa navučańni dziaciej.
Ministerstva adukacyi pry hetym budzie paćviardžać prafiesijnyja źviestki pra piedahohaŭ — naprykład, infarmacyju pra adukacyju i adsutnaść sudzimaści. Hetyja źviestki buduć dastupnyja ŭ adkrytym vyhladzie.
U ministerstvie ličać, što najaŭnaść adpaviednaha proźvišča ŭ «vitrynie» stanie svojeasablivym znakam prafiesijanalizmu, jaki dapamoža repietytaru vyłučycca siarod inšych śpiecyjalistaŭ.
Zapuścić novuju sistemu płanujuć z 1 vieraśnia 2026 hoda.
Raniej na hramadskaje abmierkavańnie vynieśli zakonaprajekt ab samastojnaj prafiesijnaj dziejnaści pa navučańni dziaciej. Jon, u pryvatnaści, praduhledžvaŭ stvareńnie śpiecyjalnaha rejestra repietytaraŭ.
«Jon, napeŭna, u paralelnym suśviecie žyvie». Parady ministra Ivanca vyklikali buru reakcyj
Ministr adukacyi: Repietytaraŭ nie ŭsprymaju ad słova «zusim»
«Spadziajusia, ale nie fakt, što pastuplu»: abituryjentka, jakaja zdała ŭsie ispyty na 100 bałaŭ
U Biełarusi płanujuć pastrožyć patrabavańni da repietytaraŭ
Ciapier čytajuć
Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča16
Kamientary