U krainie majuć namier źmianić praviły pracy dla repietytaraŭ, jakija zajmajucca navučańniem dziaciej. Kab akazvać pasłuhi ŭ hetaj śfiery, nieabchodna budzie trapić u śpiecyjalny rejestr.
Minadukacyi ŭžo padrychtavała prajekt pastanovy, jaki praduhledžvaje stvareńnie takoj bazy. Dakumient vyniesieny na hramadskaje abmierkavańnie, piša Myfin.
Što płanujuć źmianić
Novyja praviły źbirajucca ŭvieści nie dla ŭsich repietytaraŭ, a mienavita dla fizičnych asob, jakija viaduć samastojnuju prafiesijnuju dziejnaść pa navučańni dziaciej.
Kab aficyjna zajmacca takoj pracaj, vykładčykam treba budzie zarehistravacca ŭ śpiecyjalnym rejestry.
Farmavać i vieści bazu budzie Departamient kantrolu jakaści adukacyi.
Pry hetym jaje płanujuć zrabić maksimalna prazrystaj: źviestki z rejestra buduć raźmiaščacca ŭ adkrytym dostupie na sajcie Ministerstva adukacyi.
U prajekcie asobna prapisali katehoryi ludziej, jakija nie zmohuć trapić u rejestr repietytaraŭ.
Pa-pieršaje, heta asoby, u dačynieńni da jakich ustupiŭ u siłu abvinavaŭčy prysud za złačynstvy ekstremisckaj nakiravanaści. Pry hetym abmiežavańnie budzie dziejničać navat paśla źniaćcia abo pahašeńnia sudzimaści.
Pa-druhoje, u bazu nie ŭklučać śpiecyjalistaŭ biez profilnaj adukacyi, jakija akazvajuć pasłuhi nastaŭnika-defiektołaha, łahapieda, tyfłapiedahoha, surdapiedahoha abo alihafrenapiedahoha.
Kali pačnuć dziejničać novyja praviły
Pierad pryniaćciem dakumienta ŭłady vyrašyli pravieści hramadskaje abmierkavańnie prajekta. Svaje zaŭvahi i prapanovy možna pakinuć na śpiecyjalnaj temie na Pravavym forumie Belarusian Legal Forum z 22 maja pa 1 červienia.
Kali pastanovu prymuć, novyja praviły pačnuć dziejničać praz try miesiacy paśla aficyjnaj publikacyi dakumienta.
Ciapier čytajuć
«Ja jedu natchnicca ŭkraincami». Śviatłana Cichanoŭskaja pačała aficyjny vizit va Ukrainu16
Kamientary
Jašče adzin krok, kab "abaranić" dziaciej, ludziej ad upłyvu "niapravilnych" idej, pa-za miežami dziaržaŭnaha kantrolu. Da taho ŭrehulavali ekskursavodaŭ.
Pa-druhoje, heta i čarhovaja podłaść-pomsta asudžanym. Kali ciabie vykinuli ź sistemy, ty nie maješ navat takoha varyjantu padpracoŭcy pa prafiesii.