Samsung prapanuje srodak ad młosnaści padčas pajezdki — śpiecyjalny huk sinusoidnaj chvali praz słuchaŭki
Pajezdki ŭ hramadskim transparcie abo aŭtamabili dla niekatorych ludziej pieratvarajucca ŭ sapraŭdnaje vyprabavańnie z-za schilnaści da marskoj chvaroby. Kampanija Samsung pradstaviła novy mabilny dadatak dla Android pad nazvaj Hearapy, jaki vykarystoŭvaje hukavuju stymulacyju dla ŭździejańnia na viestybularny aparat i palahčeńnia simptomaŭ młosnaści.
Rašeńnie, jakoje prapanuje Samsung, zasnavanaje na niezaležnym daśledavańni japonskich navukoŭcaŭ z Nahojskaha ŭniviersiteta. Jak piša Tech Times, daśledčyki vyjavili, što ŭździejańnie sinusoidnaj chvali častatoj 100 Hc i hučnaściu kala 75—85 decybieł moža časova ŭpłyvać na sistemu raŭnavahi čałavieka i źnižać simptomy młosnaści, hałavakružeńnia, a taksama ahulny dyskamfort padčas pajezdki.
Zhodna z daśledavańniem, u asnovie samoj prablemy lažyć tak zvany siensarny kanflikt. Padčas ruchu ŭnutranaje vucha fiksuje paskareńnie i źmienu stanovišča cieła, ale vočy mohuć bačyć adnosna statyčnuju karcinu — naprykład, sałon aŭtamabila abo ekran smartfona. Mozh atrymlivaje supiarečlivyja sihnały, što i vyklikaje ŭ mnohich ludziej młosnaść.
Novy biaspłatny mabilny dadatak ad Samsung dla Android pad nazvaj Hearapy prajhravaje praz navušniki dakładny sinusoidny sihnał častatoj 100 Hc. Pierad pajezdkaj karystalniku prapanujuć słuchać jaho nie mienš za 60 siekund. Pavodle raspracoŭščykaŭ, mienavita takaja stymulacyja moža zabiaśpiečyć časovaje palahčeńnie, jakoje moža praciahvacca da dźviuch hadzin, u zaležnaści ad indyvidualnych asablivaściej arhanizma kankretnaha čałavieka.
Dla dasiahnieńnia najlepšaha efiektu kampanija rekamienduje vykarystoŭvać navušniki Samsung Galaxy Buds4 Pro, śćviardžajučy, što jany śpiecyjalna naładžanyja dla maksimalna dakładnaha prajhravańnia patrebnych častot.
Zrešty, dziejańnie technałohii možna pravieryć i ź inšymi pryładami, choć u takim vypadku vynik moža adroźnivacca z-za roźnicy ŭ jakaści huku i zdolnaści navušnikaŭ karektna pieradavać patrebny dyjapazon častot. Važna, kab hety huk nie zahłušaŭsia muzykaj abo šumam z navakolnaha asiarodździa. Pry viartańni simptomaŭ hukavy sihnał možna prajhrać paŭtorna.
Samsung pazicyjanuje Hearapy jak niemiedykamientoznuju alternatyvu tradycyjnym srodkam ad młosnaści. Pry hetym kampanija adznačaje, što efiekt moža być indyvidualnym, i technałohija nie harantuje poŭnaha źniknieńnia simptomaŭ u kožnaha karystalnika.
Raspracoŭka stała častkaj bolš šyrokaha kirunku digital health — vykarystańnia elektronnych pryład i prahramnaha zabieśpiačeńnia dla padtrymańnia zdaroŭja i palapšeńnia jakaści žyćcia biez vykarystańnia lekavych preparataŭ.
Ciapier čytajuć
Pamierła Śviatłana Kurs. U jaje tvorach spałučalisia mahija žyvoha žyćcia i biaźlitasny psichałahizm. A ŭ publičnych vystupach i FB — rezki antyimpieryjalizm i elehantny liryzm16
Pamierła Śviatłana Kurs. U jaje tvorach spałučalisia mahija žyvoha žyćcia i biaźlitasny psichałahizm. A ŭ publičnych vystupach i FB — rezki antyimpieryjalizm i elehantny liryzm
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać3333
Kamientary