Tramp anansavaŭ histaryčnuju ździełku ź Iranam, paśla zapościŭ pravakacyjny niejrasietkavy malunak
Złučanyja Štaty i Iran znachodziacca za krok da padpisańnia pahadnieńnia ab spynieńni bajavych dziejańniaŭ. Pakul dypłamaty ŭzhadniajuć umovy źniaćcia marskoj błakady i praviły sudnachodstva, amierykanski prezident praciahvaje pravakavać Tehieran u sacyjalnych sietkach i zvodzić staryja rachunki z Barakam Abamam.
Ab chutkim praryvie ŭ pieramovach Donald Tramp paviedamiŭ u svajoj sacyjalnaj sietcy Truth Social, adznačyŭšy, što praces znachodzicca na apošniaj stadyi.
Amierykanski partał Axios sa spasyłkaj na ŭłasnyja krynicy ŭdakładniŭ, što prajekt dekłaracyi praduhledžvaje padaŭžeńnie režymu spynieńnia ahniu na 60 dzion. Za hety čas Iran musić prybrać marskija miny, a prachod praz Armuzski praliŭ stanie biaspłatnym.
Uzamien Vašynhton zdymie błakadu iranskich partoŭ, dazvolić ekspart nafty i pačnie abmierkavańnie razbłakiroŭki iranskich aktyvaŭ. Pry hetym jadziernaje pytańnie i pieradača ŭzbahačanaha ŭranu ŭ papiaredni dakumient nie ŭvajšli, a poŭny vyvad amierykanskich vojskaŭ adbudziecca tolki paśla padpisańnia finalnaha pahadnieńnia.
Adnak iranski bok bačyć umovy inakš. Infarmacyjnaje ahienctva Tasnim, blizkaje da Korpusa vartavych isłamskaj revalucyi, abvierhła infarmacyju pra 60‑dzionnaje pieramirje. Pavodle ich dadzienych, dakumient praduhledžvaje poŭnaje spynieńnie vajny na ŭsich frantach, uklučajučy Livan. Pytańni marskoj błakady i Armuzskaha praliva pavinny być vyrašany za 30 dzion, a pierahavory pa jadziernaj prahramie vyniesieny ŭ asobny 60‑dzionny pieryjad.
Pakul baki spračajucca nakont interpretacyi tekstaŭ, haspadar Biełaha doma vyrašyŭ akreślić žorstkija miežy dazvolenaha. Tramp apublikavaŭ razhornuty dopis, u jakim nazvaŭ pieramovy arhanizavanymi i kanstruktyŭnymi, ale zahadaŭ svaim pradstaŭnikam nikudy nie śpiašacca, bo čas całkam pracuje na Vašynhton.
Jon kateharyčna zajaviŭ, što marskaja błakada zastaniecca ŭ poŭnaj sile da taho momantu, pakul pahadnieńnie nie budzie kančatkova ŭzhodniena, zaćvierdžana i padpisana, bo ŭ takoj spravie nie pavinna być nivodnaj pamyłki.
Tramp taksama vykarystaŭ nahodu, kab abrynucca z krytykaj na svajho papiarednika, nazvaŭšy iranskuju jadziernuju ŭhodu «Baraka Chusejna Abamy» adnoj z najhoršych ździełak u historyi ZŠA, jakaja nibyta adkryvała Tehieranu pramy šlach da stvareńnia bomby.
Ciapierašni dahavor byŭ prezientavany jak poŭnaja supraćlehłaść minułym pamyłkam. Pavodle słoŭ prezidenta, adnosiny robiacca bolš prafiesijnymi i praduktyŭnymi, ale Iran musić raz i nazaŭždy zabycca pra raspracoŭku ci nabyćcio jadziernaj zbroi.
Razam sa strymanymi zajavami pra važnaść pahadnieńnia Tramp apublikavaŭ pravakacyjny malunak, zhienieravany niejrasietkaj, na jakim uzbrojeny amierykanski samalot źniščaje dva iranskija katary, a ludzi litaralna raźlatajucca ŭ pavietry. Vyjava supravadžałasia vialikim čyrvonym nadpisam «Adios».
Kamientary