Kitajski avijałajnier upieršyniu vykanaŭ mižnarodny rejs, kinuŭšy vyklik Boeing i Airbus

Heta važny etap dla kitajskaj avijacyjnaj pramysłovaści i dziaržaŭnaj kampanii Commercial Aircraft Corporation of China (COMAC), jakaja raspracoŭvaje C919 jak kankurenta amierykanskaha Boeing i jeŭrapiejskaha Airbus.

C919 — vuzkafiuzielažny pasažyrski samalot, raźličany maksimum na 174 pasažyry. Pa svaim kłasie jon padobny da Boeing 737 MAX i Airbus A320neo. Kitaj raźličvaje pastupova vyvieści hety łajnier na mižnarodny rynak, adnak pakul jamu jašče daloka da realnaj kankurencyi z dvuma suśvietnymi avijacyjnymi hihantami.

Adnoj z hałoŭnych prablem zastajecca toje, što C919 pa-raniejšamu vykarystoŭvaje značnuju kolkaść zamiežnych kampanientaŭ. Akramia taho, samalot pakul nie atrymaŭ siertyfikacyi asnoŭnych avijacyjnych rehulataraŭ Jeŭropy i ZŠA. Heta istotna abmiažoŭvaje mahčymaści jaho ekspłuatacyi i prodažu na zachodnich rynkach.

Pieršapačatkova COMAC płanavała całkam pierajści na kitajskija kampanienty da 2025 hoda i zaniać kala 10% unutranaha avijacyjnaha rynku krainy. Adnak dasiahnuć hetych metaŭ u vyznačanyja terminy nie ŭdałosia.

U toj ža čas rejs Piekin — Ułan-Batar płanujecca pastupova raźvivać, i ŭ pierśpiektyvie jon moža stać štodzionnym. Kitajskaja kampanija taksama aktyŭna demanstruje svoj C919 pradstaŭnikam suśvietnaj avijacyjnaj haliny, u tym liku na mižnarodnych avijasałonach.

Pry hetym navat sam Kitaj pakul nie admaŭlajecca ad samalotaŭ Boeing i Airbus. U mai kraina zakazała ŭ Boeing 200 samalotaŭ, a taksama zapasnyja častki i ruchaviki. Heta pakazvaje, što kitajskaja avijacyja jašče praciahły čas budzie zaležać ad zachodnich vytvorcaŭ.

Na kaniec 2025 hoda COMAC pastaviła zakazčykam 32 samaloty C919. U pieršaj pałovie 2026 hoda byli pieradadzienyja jašče vosiem łajnieraŭ. Dla paraŭnańnia, tolki za 2025 hod u Kitaj było pastaŭlena kala 100 vuzkafiuzielažnych samalotaŭ Airbus.

COMAC raźličvaje značna pavialičyć vytvorčaść i da 2029 hoda vypuskać da 200 C919 štohod. Adnak dla hetaha kampanii nieabchodna istotna pašyryć vytvorčyja mahutnaści i ŭmacavać łancužki pastavak.

Ekśpierty adznačajuć, što stvaryć samalot — tolki pałova spravy. Nie mienš važna naładzić masavuju vytvorčaść, zabiaśpiečyć stabilnyja pastaŭki ruchavikoŭ i inšych kampanientaŭ, a taksama dakazać nadziejnaść łajnieraŭ padčas šmathadovaj ekspłuatacyi. Niedachop navat nievialikaj detali moža pryvieści da zatrymki vytvorčaści.

• 3
• 0
• 4
• 1
• 2
• 0
• 0
• 0