U Irłandyi piaciora padletkaŭ zahinuli, pajechaŭšy pa sustrečcy dziela łajkaŭ u tyktoku. Palicyja vyrašyła nie hnacca za imi

Ranicaj u niadzielu, 16 žniŭnia 2026 hoda, na aŭtastradzie M9 u hrafstvie Kiłder (Irłandyja) zahinuli piaciora padletkaŭ — usie jany znachodzilisia ŭ BMW, jaki na vialikaj chutkaści jechaŭ nasustrač ruchu i na poŭnym chodzie sutyknuŭsia ź siamiejnym aŭtamabilem. Trahiedyja stała apošniaj u sieryi zdareńniaŭ, kali irłandskaja moładź śviadoma vyjazdžaje nasustrač ruchu na chutkasnych trasach, kab źniać videa dla sacsietak, piša The Sun.

Pavodle palicyi, jašče kala druhoj hadziny nočy źjaviłasia paviedamleńnie, što hrupa maładych ludziej sprabuje ŭzłamać damy i aŭtamabili ŭ horadzie Aci (Athy). Kali patrul zapatrabavaŭ ad kiroŭcy čornaha BMW spynicca, toj uciok. Paźniej aŭtamabil, u jakim znachodzilisia piaciora padletkaŭ u maskach abo bałakłavach, dvojčy vyjazdžaŭ na pałasu nasustrač ruchu na M9: spačatku źjechaŭ na zapravačnuju stancyju i znoŭ viarnuŭsia na trasu, a potym znoŭ paniośsia pa čužoj pałasie. Palicejskija paśpieli vystavić śpiecyjalnyja šypy kala źjezda z trasy, adnak kiroŭca nie spyniŭsia — i praź niekalki chvilin BMW sutyknuŭsia łob u łob z Hyundai, jaki jechaŭ nasustrač.

U vyniku ŭdaru ŭsie piaciora padletkaŭ u BMW zahinuli na miescy. U Hyundai znachodzilisia čatyry čałavieki: dvoje, jakija znachodzilisia śpieradu, špitalizavanyja ŭ krytyčnym stanie, pasažyry zzadu atrymali surjoznyja traŭmy. Siamja nakiroŭvałasia ŭ aeraport Dublina, kab palacieć na viasielle svajakoŭ u Brytanii.

Kamisar palicyi Irłandyi Džaścin Keli nazvaŭ zdareńnie žachlivym i adznačyŭ, što asabliva aburalnaje toje, što ŭ šerahu vypadkaŭ maładyja ludzi iduć na taki ryzykoŭny krok dziela łajkaŭ u sacsietkach.

Zdareńnie na M9 — nie vypadkovaje. U apošni čas u Irłandyi dziejničajuć bandy padletkaŭ, jakija spaborničajuć pamiž saboj, sprabujučy źniać usio bolš niebiaśpiečnaje videa dla TikTok i inšych sacsietak.

Padletki śviadoma karystajucca tym, što palicejskija pa pratakole biaśpieki nie majuć prava praśledavać aŭtamabil, jaki jedzie nasustrač ruchu na chutkasnaj trasie, — heta robić takuju taktyku pryvabnaj dla ŭciokaŭ.

Pradstaŭniki palicyi zaklikajuć sacyjalnyja sietki aktyŭna vydalać videa ź niebiaśpiečnaj jazdoj, zachoŭvać dokazy dla śledstva i błakiravać akaŭnty tych, chto vykładaje taki kantent, a taksama ŭkaraniać na darohach techničnyja rašeńni — sistemy vyjaŭleńnia ruchu nasustrač i pryłady dla prymusovaha spuskańnia šyn u skradzienych aŭtamabilaŭ.

• 0
• 0
• 1
• 5
• 5
• 3
• 4
• 0