Kazačnica ź Minska paŭdzielničała ŭ šou TNT na vyžyvańnie
Hanna Hrabcevič zarablaje na žyćcio tym, što prydumlaje kazki dla kankretnych dziaciej i zapisvaje tyja kazki hałasami ich rodnych. Dniami biełaruska trapiła na TNT.
Niekali Hanna Hrabcevič kiravała adździełam u vialikim aŭtamabilnym chołdynhu. Ale ŭ dekrecie vyrašyła pamianiać žyćcio i zrabiła prajekt «Annuškiny skazki», u jakim stvaraje na zamovu kazki. Jana prydumlaje kazku z ulikam siamiejnych tradycyj i cikavostak kankretnaha dziciaci, robić aŭdyjaviersiju i dadaje ŭ aŭdyja hałasy rodnych dziciaci. Kaštuje heta niatanna — ad 70 da 140 dalaraŭ.
Niadaŭna Hanna raskazała ŭ instahramie, što paŭdzielničała ŭ šou «Pahonia 2» na svaim lubimym kanale TNT. Kali koratka, hetaje šou — hulnia na vyžyvańnie, dzie kamandzie hulcoŭ treba źbiahać ad łaŭcoŭ i vykonvać roznyja zadańni.
Hanna raskazała padpisčykam, što jaje abrali z prykładna 20 tysiač achvotnych. Na placoŭku paprasili apranuć jarki spartyŭny kaścium — kali takoha niama, udzielnikam ich vydajuć.
Biehać daviałosia nočču — na placoŭku vyklikali ŭ 22:30. Pry hetym sami zdymki pačalisia a 2‑j hadzinie nočy, a skončylisia kala 7‑j hadziny ranicy.
«Kali ja hladzieła pieršy siezon pa telebačańni, u mianie ad prahladu sieryj adrenalin prosta zaškalvaŭ i serca litaralna vyskokvała z hrudziej. Dumka pra toje, što ja nočču budu źbiahać ad mužykoŭ, ad łaŭcoŭ — kali ščyra, heta mianie biantežyć, ja pakul tolki nastrojvajusia na heta», — dzielicca Hanna ŭ roliku, zapisanym pierad zdymkami.
Vypusk z Hannaj vyjšaŭ u efir 16 žniŭnia. Adnak biełaruska ničoha nie vyjhrała. Da finišu dajšli inšyja try ŭdzielniki, jakija padzialili pryz pamieram 700 tysiač rasijskich rubloŭ (7100 jeŭra).
Ciapier dziaŭčyna spadziajecca, što zmoža viarnucca na telebačańnie:
«Heta majo pieršaje takoje televizijnaje šou, z takim vielizarnym pradakšnam, jašče i na lubimym telekanale. Viadoma, ja ščaślivaja, što ŭsio heta adbyvajecca.
Napeŭna, kali b ja hod tamu nie zrabiłasia kazačnicaj i nie stvaryła «Annuškiny skazki», hetaha ŭsiaho nie było b. Ciapier ja spadziajusia, što heta tolki pačatak».
«Naša Niva» — bastyjon biełaruščyny
PADTRYMAĆ
Kamientary
rečaisnaść: -