Minčuk ź psichičnym razładam zaviaščaŭ dźvie staličnyja kvatery ministerstvu
U mužčyny byŭ ałkahalizm i psichičny razład. Tamu stryječnaja siastra pasprabavała praz sud pryznać zaviaščańnie niesapraŭdnym, ale sud staŭ na bok ministerstva, raspaviadajuć «Minsk-Naviny».
Mužčyna pamior u studzieni 2024 hoda. Paśla jaho śmierci zastalisia dźvie kvatery ŭ Minsku. Za dva hady da śmierci jon aformiŭ u nataryusa zaviaščańnie, pavodle jakoha nieruchomaść pavinna była pierajści ministerstvu, jakoje nie nazyvajecca.
Stryječnaja siastra pamierłaha źviarnułasia da nataryusa z zajavaj ab pryniaćci spadčyny 30 lipienia 2025 hoda. A paśla hetaha źviarnułasia ŭ sud.
Pavodle žančyny, na momant składańnia zaviaščańnia mužčyna nie moh razumieć značeńnia svaich dziejańniaŭ i kiravać imi —ion pakutavaŭ na psichičnyja zachvorvańni i ałkaholnuju zaležnaść.
Paśmiarotnaja kompleksnaja psichołaha-psichijatryčnaja ekśpiertyza paćvierdziła, što ŭ mužčyny byli hetyja zachvorvańni. Adnak ekśpierty nie zmahli vyznačyć, ci ŭpłyvali jany na jaho zdolnaść razumieć svaje dziejańni mienavita ŭ momant padpisańnia zaviaščańnia.
Pry hetym ekśpiertka zajaviła ŭ sudzie, što takoje zachvorvańnie samo pa sabie, jak praviła, nie aznačaje niazdolnaści čałavieka razumieć svaje dziejańni. Doktarka, susiedzi i nataryus taksama raskazali, što ŭ toj pieryjad mužčyna byŭ u jasnaj śviadomaści.
Sud admoviŭ siastry ŭ patrabavańni pryznać zaviaščańnie niesapraŭdnym.
Adnačasova sud zadavoliŭ patrabavańnie ministerstva pryznać jaho spadčyńnikam. Pavodle suda, pradstaŭniki ŭstanovy nie viedali pra spadčynu da taho, jak nataryus nakiravaŭ im adpaviednaje paviedamleńnie. Heta paviedamleńnie jany atrymali tolki 12 vieraśnia 2025 hoda. Tamu sud pryznaŭ pryčynu propusku šaścimiesiačnaha terminu pryniaćcia spadčyny ŭvažlivaj.
U vyniku sud pryznaŭ za ministerstvam prava ŭłasnaści pa zaviaščańni na abiedźvie minskija kvatery.
Kamientary
[Zredahavana]