Šmatdzietny zvarščyk z Mahilova pradrakaŭ śmierć kalinoŭcaŭ na vajnie. A bač ty, užo sam zhinuŭ pad Pakroŭskam
Apošnija ślady 50‑hadovaha Vitala — padpisanaha ŭ siabroŭ jak «PaŭlučenkaZekAdnavoki», — možna znajści ŭ čacie eskortnic Błahavieščanska.
50‑hadovy mahiloviec Vital Paŭlučenka — nie samy typovy najomnik na vajnie suprać Ukrainy. Kaniečnie, niekalki sudzimaściaŭ u jaho jość, jak va ŭsich jaho kaleh pa niaščaści — ź infarmacyi Belpol, u 2003‑m jon razam ź siabram abčyściŭ u Minsku žančynu, a ŭ 2015‑m nie prajšoŭ mima kamiery zachoŭvańnia ŭ handlovym centry ŭ Mahilovie. Tady jon razžyŭsia mabilnikam, butelkaj kvasu i 80 samarezami.
Ale kali vyvučyć pierapiski Paŭlučenki ŭ telehram-čatach, to stanovicca zrazumiełym, što jon byŭ u niejkaj stupieni idejnym abaroncam ruskaha śvietu.
«U Biełarusi nie atrymałasia, hazanuli tudy… Tam i pamruć…», — kamientuje jon u sakaviku 2022 hoda videa kalinoŭcaŭ.
«Čamu nielha razbambić uvieś zavod?» — razvažaje nad losami abaroncaŭ Maryupala.
«Mrazi!!!! Dabravieščańnie… Jany heta nie ŭličyli. Pravasłaŭnyja nikoli na taki hrech nie pojduć akramia nacykaŭ», — pierakonvaje siabie i astatnich, što pa Kramatorsku nibyta ŭdaryli sami ŭkraincy, a nie Rasija.
I jašče dziasiatki niecenzurnych vyrazaŭ pra Ukrainu i ŭ apraŭdańnie rasijskaj ahresii.
U vyniku Vital Paŭlučenka i sam dabraŭsia da vajny — prykładna ŭ kastryčniku 2025 hoda. Pratrymaŭsia niekalki miesiacaŭ, pakul nie zhinuŭ pad Pakroŭskam.
Byłaja žonka Julija Abramovič spačatku šukała jaho žyvym: «Pazyŭny «Pak». Na bajavym zadańni z 23 śniežnia 2025 hoda. Źnikły bieź viestak z 13 studzienia 2026 hoda». A paśla źmiryłasia i šukała hrošy: «Chaču daviedacca, jakija treba dakumienty sabrać. Byłoha muža pryznali zahinułym, zastałosia troje dzietak».
Minimum dziesiać hadoŭ Paŭlučenka adpracavaŭ zvarščykam u budaŭničaj kampanii «Strominviest», dzie kruciŭsia apošnim časam — nieviadoma.
U telefonnych knihach siabroŭ jon byŭ zapisany jak «Vital», «Vitalik Technaprybor», «Pak Vitalik» i navat «PaŭlučenkaZekAdnavoki».
Apošniaja internet-aktyŭnaść Paŭlučenki — čat eskortnic rasijskaha Błahavieščanska. Jon napisvaŭ tudy ŭ listapadzie 2025 hoda, užo z fronta. Kamientavaŭ dziaŭčyn i aburaŭsia, što navat tudy, u čat eskortnic, praleźli niejkija ŭkraincy.
«Naša Niva» — bastyjon biełaruščyny
PADTRYMAĆCiapier čytajuć
Brat biełaruskaj karalevy pryhažości trapiŭ u reanimacyju ŭ Azierbajdžanie1
Brat biełaruskaj karalevy pryhažości trapiŭ u reanimacyju ŭ Azierbajdžanie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary