Levit zaniała pasadu pres-sakratarki Biełaha doma va ŭzroście 27 hadoŭ.
Pres-sakratarka Biełaha doma Kerałajn Levit pakinie svaju pasadu ŭ kancy žniŭnia, abviaściŭ prezident ZŠA Donald Tramp, piša Bi-bi-si.
Levit, jakuju Tramp nazvaŭ adnoj sa svaich «samych davieranych pamočnic», vyrašyła syści z pasady, kab bolš času pravodzić ź siamjoj i maleńkimi dziećmi. Prezident napisaŭ u sacyjalnych sietkach, što «całkam razumieje i pavažaje hetaje rašeńnie».
«Ciapier Kerałajn budzie adnoj z maich hałoŭnych źniešnich daradcaŭ i ŭpłyvovym hołasam u Respublikanskaj partyi», — napisaŭ Tramp.
Levit zaniała pasadu pres-sakratara Biełaha doma ŭ studzieni 2025 hoda. Tady joj było 27 hadoŭ, i jana stała samaj maładoj pres-sakratarkaj u historyi amierykanskaj administracyi. Pakul nieviadoma, chto zojmie jaje miesca.
Levit taksama była pres-sakratarkaj pieradvybarčaj kampanii Trampa ŭ 2024 hodzie. Jana ličycca adnoj z najbolš prykmietnych pradstaŭnic ruchu MAGA (Make America Great Again — «Zrobim Amieryku znoŭ vialikaj»), jaki abjadnoŭvaje prychilnikaŭ Trampa.
Levit, pierakananaja prychilnica Trampa, napisała ŭ sacyjalnaj sietcy X, što praca ŭ Biełym domie stała dla jaje «honaram i pryhodaj usiaho žyćcia».
«Być maci, vychoŭvać novanarodžanaje dzicia i adnačasova pracavać na adnoj z samych patrabavalnych pasad u śviecie — heta, miakka kažučy, samy nasyčany i składany, ale ŭ toj ža čas samy ščaślivy pieryjad majho žyćcia», — napisała jana.
U lutym minułaha hoda jaje ofis uziaŭ pad kantrol farmavańnie pres-pułu Biełaha doma, pazbaviŭšy Asacyjacyju karespandentaŭ Biełaha doma arhanizacyjnych paŭnamoctvaŭ. Akramia taho, administracyja na niekatory čas abmiežavała dostup ahienctva Associated Press da pracy pres-pułu praź jaho admovu vykarystoŭvać nazvu «Amierykanski zaliŭ» zamiest Mieksikanskaha zaliva.
Pry hetym prychilniki administracyi Trampa vysoka aceńvali Levit za toje, što jana paśladoŭna prytrymlivałasia aficyjnaj linii Biełaha doma i aktyŭna abaraniała palityku prezidenta.
Levit zajmaje druhoje miesca pa praciahłaści pracy na pasadzie pres-sakratara siarod supracoŭnikaŭ abiedźviuch administracyj Trampa. Daŭžej za jaje hetuju pasadu zajmała tolki Sara Chakabi Sanders.
Pakul nieviadoma, chto stanie šostym hałoŭnym pradstaŭnikom Trampa pa suviaziach z presaj za dva jaho prezidenckija terminy.
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks15
Kamientary