U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała
Pračnułasia žančyna paśla taho, jak z dočkami trapiła ŭ zavarušku praz udzieł u «niesankcyjanavanym turźlocie» pad Rasonami.
Pra dramu ŭ svaim žyćci žančyna, padpisanaja jak Amina, raspaviadaje ŭ tyktoku. Jana zapisała i zvarot da Łukašenki:
«U 2020 hodzie ja aktyŭna hałasavała za svajho prezidenta. Ja była hatova, hłyboka ciažarnaja, kinucca ŭ boj, kab abaranić prezidenta i svaju krainu. Ja ščyra nie razumieju, čamu stvoranyja taboj orhany pierastali abaraniać nasielnictva. Ja ščyra nie razumieju, čamu ludzi stali takimi žorstkimi i danosiać adzin na adnaho. Pahladzi, što ŭ nas unutry krainy robicca! Ja prosta ŭpeŭniena, što da ciabie heta nie dachodzić i ty prosta nie čuješ nas! My vybirali ciabie, my hałasavali za ciabie, my išli za taboj».
Amina płača i pytajecca ŭ Łukašenki, navošta jana razam inšymi jabaćkami ŭsio heta rabiła, kali ciapier sutykajecca z bulinham. Kaža, što nie razumieje, čamu orhany, jakija stvaralisia, kab baranić narod, pracujuć suprać jaho.
«Ja vieru tabie, ja addavała hołas za ciabie. Bo ty — heta narod, a narod — heta ty. A milicyja i lubyja orhany, stvoranyja taboj — heta my, usie my».
Dyk što zdaryłasia?
Jak možna zrazumieć pa videa Aminy, jana była razam ź dziećmi na «niesankcyjanavanym turźlocie» amataraŭ ruchu Rainbow Family kala miascovaha voziera pad Rasonami. Sioleta pry kancy lipienia MUS zatrymała tam 350 udzielnikaŭ.
«Prysutnyja ŭstalavali namioty, raźviali vohniščy i ŭčynili hulańni z hučnaj muzykaj i vykarystańniem atrybutyki roznych relihijnych płyniaŭ. Mnohija ź ich znachodzilisia ŭ hołym vyhladzie pry małaletnich dzieciach», — zajavili siłaviki. Na ŭdzielnikaŭ skłali pratakoł za «parušeńnie paradku praviadzieńnia masavych mierapryjemstvaŭ».
Akazvajecca, 30 lipienia maci Aminy napisała danos u milicyju, u jakim śćviardžała, što jaje dačka śpiecyjalna pajechała ŭ Viciebskuju vobłaść, kab udzielničać u niesankcyjanavanym mierapryjemstvie.
Aminu heta aburaje. Pa jaje viersii, jana ź dziećmi vypadkova apynułasia nie ŭ tym miescy nie ŭ toj čas. I navat ustaŭlaje ŭ roliki cytaty Karajeva, jaki ŭ 2020 hodzie kazaŭ pra pikiety, što pieratvarajucca ŭ niesankcyjanavanyja masavyja mierapryjemstvy i zakranajuć vialikuju kolkaść vypadkovych ludziej.
Žančyna razam z adnoj dačkoj pajšła ź lesu — mabyć, ratujučysia i chavajučysia ad siłavikoŭ, a druhuju dziaŭčynku siłaviki dastavili ŭ rasonskuju balnicu, bo nie zmahli vyśvietlić, dzie maci.
Ciapier da žančyny rehularna prychodziać kamisii z pravierkami i pahražajuć pryznać, što siamja znachodzicca ŭ sacyjalna niebiaśpiečnym stanoviščy.
Niedachopaŭ u žyćci Aminy znajšli šmat. Jana nie pracuje: kaža, što raniej vykładała niamieckuju movu ŭ škole, ale siem hadoŭ tamu zrazumieła, što pačała tupieć — zvolniłasia i z taho momantu pačała zajmacca samaraźvićciom. Pieč u chacie ŭ avaryjnym stanie, a aŭtanomnych pažarnych apaviaščalnikaŭ niama. Kamisija pahladzieła navat chatniuju aptečku i pryjšła da vysnovy, što bazavych lekaŭ tam niedastatkova. Pacikaviłasia, čamu ŭ chacie knižak zusim niama, a cacak mała.
Amina ŭ adkaz aburajecca: maŭlaŭ, chiba niedastatkova taho, što jana nie palić, nie pje i viadzie zdarovy ład žyćcia. Pra knižki kaža, što jość elektronnaja, a z cackami nie razumieje, navošta ich trymać šmat, kali jość hadžety.
Žančyna raspaviadaje, što apošnija try dni pa niekalki hadzin była vymušana pravieści ŭ milicyi, u jaje zabrali telefon:
«Kali pastupaje zvanok ź milicyi, niama nijakich padrabiaznaściaŭ. Navošta vyklikajecie? I pačynajecca płavańnie niezrazumiełaje. U jakaści kaho vyklikajecie? Navošta ja pavinna iści? Što ja pavinna pisać? Vy idziacie ŭ milicyju, nie viedajučy navošta».
U fanatki Łukašenki raptam uźnikła šmat pytańniaŭ da siłavikoŭ: «U vas niama złačynstvaŭ, niama śledstvaŭ nijakich? U vas prosta mała pracy? Złačynnaść upała i vam niama čym zaniacca? Viedajecie, ja vieryła ŭ milicyju. Ale paśla padziej, jakija zaraz sa mnoj adbyvajucca, ja nie vieru ŭ milicyju».
Pad Rasonami zatrymali 350 udzielnikaŭ turźlotu
«Pastavili pałatki, raźviali vohniščy». MUS paćvierdziła zatrymańnie 350 čałaviek pad Rasonami. Znajšli i arhumient: «Mnohija ŭ hołym vyhladzie pierad małaletnimi»
133 siłaviki na 277 čałaviek, ź jakich 26 dzieci. Stała viadoma, jak razhaniali źlot pad Rasonami
Nazyvali «pietušarami», źbili nahami ŭ prybiralni. Udzielnik razahnanaha fiestyvalu pad Rasonami raskazaŭ, jak heta było
Vyzvalili asudžanaha na siem sutak ŭdzielnika źjezdu pad Rasonami
Ciapier čytajuć
U 2020 hodzie jabaćka Amina «aktyŭna hałasavała» za Łukašenku. A ciapier nie razumieje, čamu rodnaja maci na jaje daniesła, a milicyja zatrymała25
Kamientary