Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?
Błohier-trukač Arciemij Prakapienka kazaŭ, što 25 razoŭ ryzykavaŭ žyćciom — mienavita stolki patencyjna śmiarotnych trukaŭ jon vykanaŭ za svaje 24 hady. Ale ž u hety raz u Lidzie niešta pajšło nie pa płanie.
Padčas aŭtamabilnaha šou «Tački. Piknik», jakoje prachodziła la ścien Lidskaha zamka na minułych vychodnych, adbyŭsia niaščasny vypadak. 24‑hadovy kaskadzior Arciemij Prakapienka stajaŭ na vialikaj bočcy. Jon padskočyŭ i ŭžo ŭ pavietry jaho na chutkaści źbiła adna z mašyn, jakija dryftavali.
Na adnym ź videa incydentu bačna, što da chłopca, jaki lažyć na asfalcie, padbiahajuć inšyja mužčyny. Jany chutka chapajuć Arciemija za ruki i nohi i vynosiać jaho ź placoŭki. Dalej šou praciahnułasia.
Heta aburyła šmat kaho ź vidavočcaŭ. Bo ŭ takich vypadkach kateharyčna nie rekamiendujuć pieramiaščać čałavieka da prybyćcia daktaroŭ — mohuć być traŭmy šyi, chrybietnika, taza, paškodžańni ŭnutranych orhanaŭ. Lišnija zhinańni i pavaroty cieła mohuć istotna pahoršyć stan čałavieka. Pry transparciroŭcy paciarpiełaha važna, kab hałava, šyja i tułava znachodzilisia na adnoj linii.
U kamientary «Anłajnieru» arhanizatary šou padkreślili, što na mierapryjemstvie dziažuryli dźvie karety chutkaj dapamohi — i miedyki apieratyŭna akazali pieršuju dapamohu, paśla jakoj Arciemija špitalizavali ŭ balnicu Lidy.
Publiku na miescy pasprabavali supakoić: abviaścili, što chłopiec tolki złamaŭ nahu dy atrymaŭ udar hałavy.
Ale, jak vyśvietliła «Naša Niva», situacyja bolš surjoznaja. Znajomyja Arciemija raspaviadajuć, što jaho pieravieźli ŭ balnicu ŭ Minsk — i stan byŭ siaredniaj ciažkaści. Sam chłopiec na suviaź ciapier nie vychodzić.
Arciemij Prakapienka — adzin z samych viadomych kaskadzioraŭ Biełarusi. U svaje 24 hady jon maje bolš za 80 tysiač padpisčykaŭ u instahramie, dziasiatki miljonaŭ prahladaŭ u sacsietkach, a taksama padpisaŭ damovu z Red Bull i staŭ ambasadaram brenda.
Siabry charaktaryzujuć Arciemija jak adrenalinavaha narkamana. A jaho historyja pośpiechu ŭražvaje.
Niekalki hadoŭ tamu chłopiec ź vioski Kavali pad Babrujskam vyrašyŭ pazdymać svaje «chulihanskija zabavy». Užo treci rolik zalacieŭ na paŭtara miljona prahladaŭ, potym źjavilisia rekłamadaŭcy… Arciemij pačaŭ uskładniać truki.
Chłopiec žartavaŭ: «Napeŭna, u vioscy ŭžo praktyčna nie zastałosia niebiaśpiečnych dla žyćcia łakacyj, dzie ja niešta nie źniaŭ. U mianie ŭ šapcy profilu ŭ instahramie idzie padlik, kolki razoŭ ja pa-sapraŭdnamu ryzyknuŭ žyćciom. Pakul što tam ličba 25 — pa kolkaści patencyjna śmiarotnych trukaŭ».
Arciemij realizoŭvaŭ samyja ryzykoŭnyja idei. Naprykład, smažyŭ šašłyki ŭ «Žyhulach», jakija ruchajucca. Manhał, vuhli — usio pa-sapraŭdnamu. Sam chłopiec siadzieŭ za styrnom i adnačasova nie tolki kiravaŭ mašynaj, ale i pieravaročvaŭ miasa.
Ci jechaŭ na raździaŭbanaj mašynie i ź jaje zaskokvaŭ na dach inšaj. Jašče varyjant — hnać na matacykle dy pieraskočyć pa samarobnym tramplinie praz aŭtamabil, jaki ruchajecca nasustrač. Tady Arciemij tvaram palacieŭ u ziamlu z vyšyni dvuch mietraŭ.
Najbolš papularnaje videa ŭ instahramie Arciemija nabrała 228 miljonaŭ prahladaŭ. U im na chłopca jedzie «Maskvič» — kali adlehłaść da mašyny možna vyličvać litaralna ŭ santymietrach, kaskadzior kročyć napierad i pravalvajecca ŭ zamaskiravanuju travoj jamu.
A ahułam jaho videa majuć bolš za 450 miljonaŭ prahladaŭ.
U intervju, jakoje vyjšła za niekalki tydniaŭ da šou, Arciemija nazyvali samym šalonym kaskadzioram na «Tačkach», jaki zaŭsiody hatovy vykanać navat dzikija truki: «Kali treba na poŭnym chadu pieraskočyć praź pieraškodu abo źviesicca ŭniz hałavoj z mašyny ŭ dryfcie — usio da jaho».
Sam chłopiec adznačaŭ, što jamu strašna vykonvać truk na bočcy, bo jana maksimalna niaŭstojlivaja. Mienavita hety truk moža kaštavać kaskadzioru zdaroŭja.
Pry hetym Arciemij pryznavaŭsia, što šmat razoŭ treniravacca pierad vystupam nie płanuje — maksimum raz ci dva. I voś jak tłumačyŭ svajo rašeńnie: «Čym bolš razoŭ paŭtaraju truk, tym strašniej nastupnym razam jaho vykonvać. Spačatku apraboŭvaju truk — «tak, heta lohka» — i druhi raz rablu jaho maksimalna ŭpeŭniena. Kali paŭtaru 10 razoŭ, to na 11‑y jość ryzyka rassłabicca i narabić spraŭ».
Arciemij zapeŭnivaŭ tych, chto źbiraŭsia na aŭtašou: «My budziem rabić dzič!».
Jak 23‑hadovy chłopiec z homielskaj vioski źbiraje sotni miljonaŭ prahladaŭ na kaskadziorskich trukach i maje kantrakt z Red Bull
Pad Uzdoj milicyja razahnała vystavu dryft-aŭtamabilaŭ
Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ9
Vinakurniu Lubanskaha ŭ Minsku zakryŭ sakretny hmach, dzie zaprajektavanyja kabiniety dla dopytaŭ i pamiaškańnie dla spalvańnia dakumientaŭ
Biełarus-vachtavik na Jamale stvaraje pieśni na biełaruskaj movie z dapamohaj ŠI. «Raniej muzyka była zakrytym kłubam. Niejrasietki adčynili hetyja dźviery z nahi»1919
Kamientary
Hieroju rolika žadaju ačuniać biez nastupstvaŭ i pierahladzieć svaje padychody da ŭłasnaj biaśpieki, kab nastupnym rolikam nie stać piersanažam padborki "Samyja biazhłuzdyja śmierci na videa"
Kaho z arhanizataraŭ zabaŭlalnych mierapryjemstvaŭ u Biełarusi chvaluje zdaroŭje niejkaha ich udzielnika? Nielha spyniać "śviata", bo potym ža buduć niepryjemnaści z uładami!