U Varšavie raźvitalisia z Alaksandram Milinkievičam FOTAREPARTAŽ
Na raźvitańnie z palitykam i navukoŭcam sabralisia dziejačy hramadstva i kultury, zamiežnyja dypłamaty.
Cyrymonija raźvitańnia prajšła ŭ Sabory Śviatoha Jana Chryściciela ŭ Varšavie. Pravieści palityka i navukoŭca ŭ apošni šlach pryjšli sotni biełarusaŭ i palakaŭ.
Siarod tych, chto pryjšoŭ na raźvitańnie z palitykam Alaksandram Milinkievičam — demakratyčnaja lidarka Śviatłana Cichanoŭskaja, piśmieńnik Uładzimir Arłoŭ, ekanamist Siarhiej Čały, pradstaŭniki BelPol Uładzimir Žyhar i Matviej Kuprejčyk, palitołah i pierakładčyk Aleś Łahviniec, žurnalistka Valaryna Kustava,unučka Stanisłava Šuškieviča Stasia Hlińnik, sacyjołah Andrej Vardamacki, palityk Alaksandr Dabravolski, pradstaŭnik Centra novych idej Anton Radniankoŭ i palitołah Ryhor Astapienia, juryst i eks-kandydaty ŭ prezidenty Viktar Babaryka dy Aleś Michalevič.
Raźvitacca pryjšli Ksiuša Žuk i Arciom Łukjanienka z Naviband, a taksama redaktar Nexta Ściapan Puciła.
Pryjšła na raźvitańnie z Alaksandram i ŭdava Juryja Zisiera Julija Čarniaŭskaja. Jany doŭha abdymalisia z žonkaj palityka Inaj Kulej, dobra razumiejučy vahu strataŭ adna adnoj.
Na raźvitańni było i šmat byłych palitviaźniaŭ. Siarod ich, akramia Viktara Babaryki, błohier Saša Ivulin, žurnalistka Ksienija Łuckina, pravaabaronca «Viasny» Uładzimir Łabkovič, publicyst i palityk Alaksandr Fiaduta, žurnalisty Volha Łojka i Ihar Łosik, juryst Illa Salej.
Vykazać pavahu patryjotu Biełarusi, jaki ŭ tym liku zmahaŭsia za dobrasusiedstva z Polščaj, pryjšli i pradstaŭniki kancylaryi prezidenta Polščy. Karal Naŭrocki pieradaŭ spačuvańni siamji palityka praz svajho daradcu Lešeka Skibiela. Jon ža ad imia polskaha prezidenta ŭručyŭ Inie Kulej aficerski kryž ordena «Za zasłuhi» pierad Respublikaj Polščaj. Spadara Milinkieviča ŭhanaravali hetaj uznaharodaj paśmiarotna «za vybitnyja zasłuhi ŭ dziejnaści na karyść palakaŭ u Biełarusi, za dasiahnieńni ŭ papularyzacyi demakratyčnych kaštoŭnaściaŭ, a taksama za zaanhažavańnie ŭ budavańni hramadzianskaj supolnaści».
La truny ź ciełam palityka rasła hara viankoŭ. Ich pieradali ŭ tym liku premjer-ministr Polščy Donald Tusk, MZS Polščy, pradstaŭniki Varšaŭskaha ŭniviersiteta i ambasadary RP u Biełarusi roznych hod.
«My raźvitvajemsia ź vialikim synam biełaruskaj ziamli. My raźvitvajemsia z čałaviekam, jaki dla vialikaj častki našaha naroda biełaruskaha staŭ simvałam niepachisnaj nadziei.
Jon pakazaŭ nam, što za svabodu nie zmahajucca ź nianaviściu ŭ sercy. Jon pakazaŭ, što zło pieramahajecca dabrom. I ŭ hetym zastaŭsia viernym mudraści Jevanhiella.
Jaho luboŭ da čałavieka i svajoj ziamnoj Ajčyny, luboŭ da rodnaj Hrodnienščyny buduć prykładam dla ŭsich biełarusaŭ», — pramoviŭ, strymlivajučy ślozy, u svajoj raźvitalnaj malitvie ksiondz Viačasłaŭ Barok.
Prezident Polščy paśmiarotna ŭznaharodziŭ Alaksandra Milinkieviča Aficerskim kryžam ordena «Za zasłuhi pierad Respublikaj Polščaj».
Pachavali Alaksandra Milinkieviča na Vajskovych mohiłkach Pavonzki ŭ Varšavie. Na hetych mohiłkach chavajuć zasłužanych ludziej.
Alaksandr Milinkievič pamior 11 žniŭnia va ŭzroście 79 hadoŭ.
Ciapier čytajuć
Čym ciapier zajmajucca dziaŭčaty, jakich letaś nazvali samymi pryhožymi ŭ Biełarusi?7
Čym ciapier zajmajucca dziaŭčaty, jakich letaś nazvali samymi pryhožymi ŭ Biełarusi?
Mistyčnaje koła Vilni: Kalinoŭski byŭ pachavany ź miedaljonam śviatyni, kala jakoj vyras hatyčny pałac doktara z-pad Oršy. Ciapier pareštki Kalinoŭskaha pierapachavali ŭ mahilni taho ž doktara2121
Kamientary
[Zredahavana]