Viadomamu biełaruskamu palityku i navukoŭcu było 79 hadoŭ. Na vybarach 2006 hoda jon staŭ adzinym kandydatam ad prajeŭrapiejskich siłaŭ. Spakojny, intelihientny palityčny styl Milinkieviča kantrastavaŭ z papulizmam, ułaścivym šmatlikim postsavieckim palitykam.
Letaś jon ciažka pieranios apieracyju, daktary zmahalisia za jahonaje žyćcio i, byli spadzievy, što jon pajšoŭ na papraŭku. Ale siońnia jaho žonka paviedamiła pra śmierć palityka. Heta adbyłosia ŭ 7:15 ranicy.
Milinkievič naradziŭsia 25 lipienia 1947 hoda ŭ Hrodnie. Pavodle adukacyi jon byŭ fizikam: skončyŭ fizika-matematyčny fakultet Hrodzienskaha piedahahičnaha instytuta, paśla aśpirantury pracavaŭ u Instytucie fiziki Akademii navuk BSSR. U 1976 hodzie abaraniŭ kandydackuju dysiertacyju pra miechanizm hienieracyi zvyšmahutnych łaziernych impulsaŭ.
Jaho navukovaja karjera była źviazana taksama z vykładčyckaj pracaj. Milinkievič pracavaŭ u Hrodzienskim univiersitecie, vykładaŭ i zahadvaŭ kafiedraj Siecifskaha ŭniviersiteta ŭ Ałžyry. Stažyravaŭsia va ŭniviersitecie Manpielje ŭ Francyi i Kalifarnijskim univiersitecie ŭ ZŠA. Byŭ aŭtaram kala 65 navukovych prac i manahrafij.
Adnak šyroka viadomym u Biełarusi Milinkievič staŭ nie jak fizik, a jak hramadski dziejač i palityk.
U 1990—1996 hadach jon byŭ namieśnikam staršyni Hrodzienskaha harvykankama, dzie adkazvaŭ za adukacyju, kulturu, achovu zdaroŭja, moładź, sport, ŚMI, relihiju, mižnarodnyja suviazi i zachavańnie histaryčnaj spadčyny.
Asablivaje miesca ŭ jaho dziejnaści zajmała Hrodna. Milinkievič zasnavaŭ i ŭznačalvaŭ hramadskuju arhanizacyju «Ratuša», jakaja zajmałasia raźvićciom horada i zachavańniem jaho histaryčnaj spadčyny. Ułady likvidavali arhanizacyju ŭ 2003 hodzie.
Milinkievič byŭ taksama krajaznaŭcam. U kancy 1980‑ch hadoŭ jon udzielničaŭ u pošukach i znajšoŭ pachavańnie apošniaha karala Rečy Paspalitaj Stanisłava Aŭhusta Paniatoŭskaha ŭ Voŭčynie. U Hrodnie jon arhanizavaŭ restaŭracyju staražytnaha viežavaha hadzińnika na Farnym kaściole.
U 2001 hodzie Milinkievič byŭ kiraŭnikom pieradvybarčaha štaba Siamiona Domaša na prezidenckich vybarach.
Hałoŭnaj palityčnaj staronkaj jaho bijahrafii stali prezidenckija vybary 2006 hoda. Na Kanhresie demakratyčnych sił u kastryčniku 2005 hoda Milinkieviča abrali adzinym kandydatam ad demakratyčnych sił. Pavodle aficyjnych vynikaŭ, na vybarach jon atrymaŭ 6% hałasoŭ i zaniaŭ druhoje miesca paśla Alaksandra Łukašenki. U realnaści jon sabraŭ našmat bolš hałasoŭ, ale vybary ŭžo falsifikavalisia.
Spakojny, intelihientny palityčny styl Milinkieviča kantrastavaŭ z papulizmam, ułaścivym bolšaści postsavieckich palitykaŭ.
Paśla vybaraŭ jon stvaryŭ hramadski ruch «Za Svabodu» i da 2016 hoda byŭ jahonym kiraŭnikom — roŭna dva terminy. I hetym taksama jon zadavaŭ novy palityčny standart, adroźnivaŭsia ad mnohich postsavieckich partyjnych lidaraŭ.
U 2020‑m jon prajaŭlaŭ aściarožnaść, bajaŭsia, što padziejami manipuluje Maskva, ale kali situacyja prajaśniłasia, staŭ pazaštatnym daradcam Śviatłany Cichanoŭskaj, adnym z arhanizataraŭ «Volnaha biełaruskaha ŭniviersiteta».
Alaksandr Milinkievič naležaŭ da pakaleńnia biełaruskich intelektuałaŭ, dla jakich navuka, kultura, miascovaje samakiravańnie i palityka byli častkami hramadskaha žyćcia. Jon prajšoŭ šlach ad fizika i vykładčyka da adnaho z najbolš viadomych pradstaŭnikoŭ biełaruskaj demakratyčnaj apazicyi.
25 listapada 2025 hoda Alaksandru Milinkieviču rabili apieracyju pa vydaleńni tromba, jaki zakryvaŭ 80% sonnaj arteryi. Padčas apieracyi ŭtvaryŭsia mocny kryvaciok, paśla čaho palityk trapiŭ u vielmi ciažkim stanie ŭ reanimacyju. Daktary ŭviali jaho ŭ miedykamientozny son i ŭrešcie zdoleli stabilizavać situacyju. Ale vyzdaravieć jon užo tak i nie zmoh.
Kamientary
Pieršy raz daviedaŭsia pra jaho pa raskazu ab pošukach pareštkaŭ Paniatoŭskaha. Chto nie čytaŭ, raju: historyja ŭzroŭniu mastackaha zamysłu Karatkieviča, ale adbyłasia realna.
Spačuvańni blizkim. Nie dajechaŭ da chaty, ŭ jakuju žadaŭ viarnucca...