Rasijski deputat Dziarždumy Vital Miłonaŭ raskazaŭ, što zabivaŭ na vajnie suprać Ukrainy
«Vy zabivali ludziej?» — «Tak».
Deputat Dziarždumy ad «Adzinaj Rasii» Vital Miłonaŭ zajaviŭ, što zabivaŭ ludziej na rasijska-ukrainskaj vajnie. Pra heta jon raskazaŭ u intervju błohieru Amiranu Sardaravu, piša «Mieduza».
Sardaraŭ spytaŭ Miłonava, ci praŭda ŭ jaho jość orden Mužnaści, atrymany na vajnie. Deputat paćvierdziŭ, što orden jamu dali za «bajavyja dziejańni», ale nie staŭ raskryvać detali, bo prezidenckija ŭkazy ab uznaharodžańni «majuć zakryty charaktar». Za hetym rušyŭ uśled taki dyjałoh:
Sardaraŭ: Vy zabivali ludziej?
Miłonaŭ: Tak.
Sardaraŭ: Na SVA?
Miłonaŭ: Tak. Ja ž starejšy navodčyk. Starejšy navodčyk harmaty MT-12 «Rapira», jakaja znachodzicca ŭ dvuch-troch kiłamietrach ad linii frontu, ad pieradavoj. <…> Zadača harmaty — źniščać žyvuju siłu i techniku praciŭnika.
Sardaraŭ: A z hetym nie składana potym žyć?
Miłonaŭ: Nie. Heta abaviazak ciabie jak vajskoŭca. Vy dumajecie, kali b ja ich nie zabiŭ, jany pryjšli b da nas i čaj by z nami pili? Nie, viadoma.
Vital Miłonaŭ pajšoŭ na front dobraachvotnikam u kastryčniku 2022 hoda i słužyŭ u supraćtankavaj artyleryjskaj batarei. U lutym 2023‑ha jon paviedamiŭ, što termin jaho kantraktu padyšoŭ da kanca. U Dziarždumie Miłonaŭ zajmaje pasadu namieśnika staršyni kamiteta pa abaronie siamji, pytańniach baćkoŭstva, maciarynstva i dziacinstva.
Na vajnie va Ukrainie letaś zahinuŭ jaho brat Alaksandr.
Vital Miłonaŭ — adyjozny rasijski deputat, jaki staŭ viadomym praz svaje zakonaprajekty. U roznyja časy jon vystupaŭ suprać homasieksualnych adnosin, Jeŭropy, fastfudu, Volhi Buzavaj i teoryi evalucyi.
Ciapier čytajuć
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna2323
Kamientary
[Zredahavana]