Dziaŭčyna źmianiła imia z druhoj sproby: «Baćki dahetul hetaha nie pryniali»

Dniami ŭ Threads biełaruska padzialiłasia fota «doŭhačakanaha dakumienta». Heta paśviedčańnie ab źmienie imia. Nijakich kardynalnych pieramienaŭ nie adbyłosia: dziaŭčynu zvali Vieranikaj, a stała Vieraj. I tym nie mienš hetaja padzieja akazałasia dla jaje vielmi značnaj. Aficyjna źmianić imia joj udałosia tolki z druhoj sproby, piša Onliner.by.

Pa słovach hieraini, rodnaje imia jana nie lubiła z samaha dziacinstva. Časam zamiest Vieraniki baćki łaskava nazyvali jaje Vieračkaj — i taki varyjant joj padabaŭsia bolš. Paśla 20 hadoŭ dziaŭčynie zachaciełasia, kab usie i zaŭsiody nazyvali jaje mienavita tak.

— Kali ja ŭładkavałasia na pracu administrataram u dziciačy centr, paprasiła ŭsich nazyvać mianie Vieraj, i mnie heta nastolki adhuknułasia! Ja i źniešnie, i ŭnutrana byccam źmianiłasia, nastolki mnie było kamfortna. I Vieranikaj mianie ŭžo mała chto nazyvaŭ. Zvyčajna, kali ja prychodziła kudy-niebudź u novaje miesca, pradstaŭlałasia Vieraj.

Zastavałasia adna niaznačnaja detal: u pašparcie Viera pa-raniejšamu zastavałasia Vieranikaj. I letaś dziaŭčyna surjozna zadumałasia nad tym, kab heta źmianić. Z pakietam dakumientaŭ biełaruska adpraviłasia ŭ miascovy ZAHS u haradskim pasiołku Šarkaŭščyna.

— Dla źmieny imia patrebnyja pašpart, paśviedčańnie ab naradžeńni, taksama na toj momant u mianie ŭžo było paśviedčańnie ab šlubie. Treba było napisać zajavu i ŭkazać pryčynu źmieny imia. Taksama ja prykładvała žartoŭny dypłom z karparatyvu, dzie była zapisanaja Vieraj. Ale tam nie było piačatki, tamu pieršy raz mnie admovili.

Druhi raz ja ŭžo pryniesła dypłom ab prachodžańni kursaŭ ivent-mieniedžara ad dziejnaj arhanizacyi ź piačatkaj. Uvohule, možna prykładać luby dakumient abo vyrazku z haziety, dzie paćviardžajecca, što vas nazyvajuć inšym imiem.

Pavialičyć

— Jakuju pryčynu vy ŭkazali ŭ zajavie?

— Napisała, što Viera bolš estetyčna hučyć i što mnie tak bolš padabajecca.

Dakumienty razhladali kala miesiaca. Spačatku dziaŭčynie pryjšoŭ piśmovy adkaz z upraŭleńnia justycyi ab zhodzie na źmienu imia.

— Dalej znoŭ treba było pryjechać na miesca. Mnie zrabili novaje paśviedčańnie ab naradžeńni, paśviedčańnie ab źmienie imia, robiać novaje paśviedčańnie ab šlubie. I ŭžo paśla hetaha ja budu mianiać pašpart. Viedaju, što i mužu ciapier daviadziecca pamianiać pašpart. Nakont baćkoŭ — nie mahu skazać, pakul nie ŭdakładniała. Z abaviazkovych vydatkaŭ: pakul ja zapłaciła 135 rubloŭ za ŭsio.

— Jak vašy svajaki da hetaha pastavilisia?

— Maje baćki hetaha nie pryniali. Surjoznych kanfliktaŭ nie było, ale ź imi kožny dzień paŭtarajucca adny i tyja ž razmovy: «Čamu ty vyrašyła heta zrabić? U ciabie pryhožaje imia». Prosta Vieranikaj mianie nazvała babula, a jašče mianie chryścili hetym imiem. Tamu dla ich heta niešta takoje śviatoje.

— A vy što adkazvajecie blizkim?

— Adkazvaju, što heta moj vybar i tut ja sama prymaju rašeńnie. Ja darosłaja, mnie ŭžo 25 hadoŭ. Mama bolš-mienš heta ŭsio prymaje, nazyvaje mianie Vieraj, a tata — nie. Jamu niazvykła. U mianie jość jašče brat, jamu 19, i jon taksama nie prymaje novaje imia. Ale ciapier ja ŭžo pryncypova chaču žyć z novym imiem.

Post u Threads, u jakim Viera raspaviała doŭhačakanuju navinu, akazaŭsia davoli papularnym. Karystalniki dzialilisia svaimi historyjami i pieražyvańniami:

• «Jak ja vam zajzdrošču! Chaču źmianić imia, ale ŭsie suprać! U mianie redkaje imia, a chaču zvyčajnaje, i hetaje zvyčajnaje nikomu nie padabajecca».
• «U mianie niejak była dumka źmianić Aksanu na Ksieniju, tamu što ŭsio dziacinstva nazyvali Ksiušaj, dy i nazvali ŭvohule ŭ honar babuli Ksienii (kali dakładniej, Aksienii). Potym vyrašyła, što Astapa, zdajecca, paniesła, i supakoiłasia».
• «Ja zmahła źmianić imia tolki z druhoj sproby. Vy zrabili vielmi vialiki krok», — napisała dziaŭčyna ź nikam Diana.
• «A mnie kaliści ŭ hetym admovili. Vinšuju vas!»
• «Ja vielmi razumieju vašu radaść, ja taksama mianiała imia. Frunzienski rajon u Minsku — usio było vielmi prosta».
• «Źmianiła imia z treciaj sproby. Heta sapraŭdy ciažka ŭ Biełarusi. Vinšuju vas!»

• 4
• 1
• 1
• 0
• 0
• 0
• 0
• 0