U Biełarusi stali sustrakać redkich kamaroŭ. Čym jany niebiaśpiečnyja?
U Biełarusi sustrakajecca tak zvany duplany kamar — vid Anopheles plumbeus. Śpiecyjalisty Navukova-vytvorčaha centra NAN Biełarusi pa bijaresursach raskazali, što jaho bačać u krainie, choć i vielmi niačasta: za apošnija sto hadoŭ jaho niekalki razoŭ fiksavali ŭ Bresckaj i Homielskaj abłaściach, a daśledčyki taksama znajšli jaho ŭ Mahilovie, piša BiełTA.
Nazva «duplany» źviazana ź miescam razmnažeńnia kamara. Samki adkładajuć jajki ŭ dupłach dreŭ, dzie paśla daždžu nazapašvajecca vada. Adnak apošnim časam vid pačaŭ prystasoŭvacca i da haradskich umoŭ. Naprykład, u Mahilovie ličynki znajšli ŭ staroj aŭtamabilnaj šynie, napoŭnienaj daždžavoj vadoj.
Asablivaść hetaha kamara ŭ tym, što, u adroźnieńnie ad bolšaści malaryjnych kamaroŭ Biełarusi, jon addaje pieravahu kryvi čałavieka. Tamu jahony kantakt ź ludźmi moža adbyvacca čaściej, asabliva ŭ haradach.
Śpiecyjalisty adznačajuć i jašče adnu važnuju asablivaść: Anopheles plumbeus maje vysokuju ŭsprymalnaść da ŭzbudžalnika trapičnaj malaryi — najbolš niebiaśpiečnaj formy hetaha zachvorvańnia. Pry hetym u Biełarusi štohod rehistrujecca kala dziesiaci vypadkaŭ zavaznoj malaryi.
Akramia ŭzbudžalnikaŭ malaryi, hety vid kamara moža pieranosić niekatoryja arbavirusy, u tym liku virus lichamanki Zachodniaha Niła. U inšych jeŭrapiejskich krainach taksama fiksavali jaho suviaź ź pieradačaj uzbudžalnikaŭ dyrafilaryjozu, a ekśpierymientalna było paćvierdžana, što jon moža pieranosić virus japonskaha encefalitu.
Pry hetym śpiecyjalisty padkreślivajuć, što duplany kamar u Biełarusi pa-raniejšamu źjaŭlajecca redkim vidam. Adnak jaho zdolnaść prystasoŭvacca da haradskoha asiarodździa, razmnažacca ŭ štučnych vadajomach i pieravažna kusać ludziej pavyšaje jahonuju patencyjnuju epidemijałahičnuju značnaść.
Vospa mahła stać śmiarotnaj nie adrazu
Hetaja raślina adpužvaje kamaroŭ nie horš za samuju papularnuju chimiju
Google źbirajecca vypuścić 32 miljony niaprostych kamaroŭ u Kalifornii i Fłarydzie
Klimatołahi papiaredžvajuć: hety hod moža stać samym ciopłym u historyi. I z samaj vialikaj kolkaściu pryrodnych anamalij
Ciapier čytajuć
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam7
Kamientary
A kamary dla ludziej samyja niebiaśpiečnyja istoty na Ziamli. Navat niebiaśpiečniej za samaho čałavieka.