Biełaruska adpraviła syna na letnija kanikuły ŭ Čalabinsk. A babula vyrašyła nie viartać dzicia
Rasijski sud staŭ na bok babuli. Ale nie śpiašajciesia asudžać.
Žycharka Biełarusi Volha Panova bolš za hod sprabavała viarnuć syna, jaki pajechaŭ da babuli Haliny na letnija kanikuły ŭ Čalabinsk i nie viarnuŭsia dadomu. Kalininski rajonny sud Čalabinska ŭrešcie vyrašyŭ, što dzicia viartać nie treba.
Volha, jejny muž Uładzimir i syn Ivan žyli ŭ Biełarusi. Paśla razvodu baćki damovilisia, što chłopčyk zastajecca z maci. Baćka ž pajechaŭ u Rasiju pa miescy svajoj rehistracyi. Uletku 2024 hoda, paśla zakančeńnia navučalnaha hoda, syn pajechaŭ na kanikuły ŭ Čalabinsk da babuli pa baćkavaj linii. Maci kupiła jamu zvarotny bilet, ale dzicia dadomu nie viarnułasia.
Rasijskija ŭłady pryznačyli babulu apiakunkaj Ivana. Volha śćviardžaje, što pra heta joj nichto nie paviedamiŭ i što z dakumientam jana zmahła aznajomicca tolki ŭ sudzie ŭ 2025 hodzie, kali pryjechała ŭ Čalabinsk ź Biełarusi — babula Halina tym časam padała pazoŭ pra pryznańnie chłopčyka dziciem, jakoje zastałosia biez apieki baćkoŭ.
U babuli svaja praŭda — jana patłumačyła, što Volha i Uładzimir — śviedki Ijehovy. Heta relihijnaja arhanizacyja zabaronienaja ŭ Rasii jak ekstremisckaja, ale lehalna dziejničaje ŭ Biełarusi.
Pa słovach babuli, unuk śćviardžaŭ, što časta prapuskaŭ zaniatki ŭ škole, bo zamiest ich jeździŭ na schody i kanhresy, što vykanańnie chatnich zadańniaŭ zamianiałasia čytańniem Biblii, a znosiny z adnahodkami nie vitalisia; na adkrytaje niežadańnie ŭdzielničać u spravach supołki baćki, pavodle jaho słoŭ, reahavali «aŭtarytarnaściu ci navat fizičnym hvałtam».
Ciapier babula, jakaja pracuje buchhałtarkaj, žyvie z unukam. Padletak vučycca ŭ pryvatnaj škole, naviedvaje hurtok radyjotechniki i piša karciny ŭ styli impresijanizmu. Śpiecyjalistu ŭpraŭleńnia jon paviedamiŭ, što padzialaje ład žyćcia, jaki zabiaśpiečvaje jamu babula, a pry zhadcy pra baćkoŭ «imknuŭsia źvieści razmovu da minimumu».
Ciapier čytajuć
Svajaki kaskadziora, jaki ledź nie zahinuŭ na aŭtašou ŭ Lidzie, raskazali, što ź im ciapier1
Kamientary
ot čieho ? ot SVO v buduŝiem?