Biełaruska patraciła na viasielle ŭ vioscy $20 tysiač

Biełaruska Hanna raspaviała ŭ instahramie, kolki patraciła na svajo viasielle na 40 čałaviek, jakoje adbyłosia ŭ lipieni.

U jakaści placoŭki maładziony vybrali siadzibu ŭ vioscy Moryna ŭ Ijeŭskim rajonie.

Jaje arandavali na dva dni i zapłacili $5500. U hety košt, akramia arendy pamiaškańnia dla viasiella i chatak dla načoŭki, uvajšli taksama ježa (pa 1,5 kiłahrama na hościa), praca aficyjantaŭ i arenda kavamašyny.

Plus jašče byŭ furšet, jaki paciahnuŭ $400, i vyjazny bar za $2400. Pieršapačatkova raźličvałasia, što kožny hość vypje pa try kaktejli, a dalej budzie pić vino. Ale atrymałasia tak, što zaprošanyja addali pieravahu kaktejlam, a vina ŭ vyniku zastałosia šmat niavypitaha.

Pryzoŭ dla konkursaŭ nabyli na $100.

Tranśfier dla haściej kaštavaŭ $340, arenda mašyny dla maładych — $230.

Na vobraz niaviesty patracili $2300, na vobraz žanicha — $1900. Zaručalnyja piarścionki ź biełaha zołata kaštavali $860. Za makijaž dy pryčoski niaviesty, jaje maci i śviekryvi addali $300.

Praca arhanizatara i kaardynatara viasiella abyšłasia ŭ $700, viadučaha — $800, dydžeja — $200, fatohrafa — $1200, videohrafa — $500. Dekarataru dali $1300 (u sumu ŭvajšli taksama nieabchodnyja abrusy, śviečki, kvietki i hetak dalej).

Krychu sekanomić atrymałasia na zaprašeńniach — ich para rabiła samastojna, spatrebiłasia tolki apłacić padpisku na Tilda. Dy i tort atrymaŭsia tańniejšym, bo jaho rabiła maci žanicha, i nieabchodna było tolki nabyć inhredyjenty — ale i jany paciahnuli na $180.

Pavialičyć

Pa padlikach Hanny, usio viasielle im abyšłosia pryblizna ŭ $20 tysiač.

Jana spytała padpisčykaŭ, ci tanna heta. Najbolš papularny kamientar taki: «Kali $20 tysiač lišnija, to narmalna. A tak lepš źjeździć adpačyć plus nabyć mašynu ci kvateru. Majo mierkavańnie — marnavańnie hrošaj». Dziaŭčyna ž u adkaz spytała, čamu nieabchodna vybirać.

Paśla Hanna ŭdakładniła, što pryncypova suprać viasiellaŭ u kredyt. Tamu kali b mahčymaści nie było, to jany b nie stali rabić takoje maštabnaje śviata.

Ahułam bolšaść kamientataraŭ takich vydatkaŭ na viasielle nie zrazumieła: «Vielmi doraha, dva dni hulać u sučasnych realijach — niedazvolnaja raskoša. Dekaratar za takija hrošy tam dekaracyi da poŭnamietražnaha filma rabiŭ?», «U nas viasielle na 32 čałavieki bieź lišniaj mišury i arhanizataraŭ-kaardynataraŭ vychodzić u $5‑6 tysiač, tamu nie viedaju, što skazać».

Ale byli i inšyja adkazy. Jašče adna dziaŭčyna pryznałasia, što pačała płanavać viasielle letaś u śniežni — tady arhanizatary abiacali, što maładyja ŭkładucca ŭ $7 tysiač. Ale pa vyniku viasielle sioleta ŭ žniŭni abyšłosia pryblizna ŭ tuju ž sumu, jak u Hanny — ale na 20 čałaviek. «U pracesie padrychtoŭki zrazumieli, što nie hatovyja, ale było pozna, pryjšłosia vyciahvać».

• 2
• 2
• 5
• 20
• 1
• 0
• 0
• 0