Dvuch francuzaŭ ašukali z dapamohaj «biełaruskich rubloŭ»: achviaram addavali staryja biełaruskija hrošy ŭ abmien na jeŭra
Francuzskaja palicyja papiaredžvaje: kali nieznajomiec prapanuje raźličycca biełaruskimi rublami — heta, chutčej za ŭsio, machlarstva.
Dvoje maładych francuzaŭ z departamienta Šaranta za apošnija dni stali achviarami schiemy z falšyvymi biełaruskimi banknotami. Paciarpiełym prapanoŭvali «zapłacić» za pasłuhu dadenaminacyjnymi biełaruskimi rublami, piša Charentelibre.fr.
Pieršy vypadak: 19‑hadovy junak i «złamanaja kartka»
Va aŭtorak, 18 žniŭnia, małady čałaviek 19 hadoŭ jechaŭ pa darozie i spyniŭsia dapamahčy siamji, jakaja, zdavałasia, trapiła ŭ biadu. Baćka siamji, jaki padarožničaŭ ź dziciem na ŭsiedarožniku BMW, patłumačyŭ, što jamu treba zapravicca.
Spasłaŭšysia na zabłakavanuju kartku, mužčyna dastaŭ kašalok, poŭny kupiur, i paprasiŭ junaka zapłacić za paliva svajoj kartkaj, paabiacaŭšy viarnuć hrošy. Toj pahadziŭsia i zapraviŭ mašynu na 124 jeŭra. Prablema była ŭ tym, što viarnuć doŭh mužčyna prapanavaŭ biełaruskimi rublami.
Heta vyklikała padazreńni ŭ junaka — jon nie razumieŭ, dzie možna abmianiać takuju valutu. Paśla karotkich pieramovaŭ mužčyna prapanavaŭ 1000 rubloŭ, i chłopiec u vyniku pahadziŭsia. Tolki viarnuŭšysia dadomu i pahuhliŭšy, jon vyśvietliŭ, što takaja schiema sustrakajecca davoli časta: banknoty nie falšyvyja ŭ poŭnym sensie słova, ale ŭžo nie dziejničajuć. Pa słovach junaka, ašukaniec «dobra vyhladaŭ, byŭ apranuty ŭ futbołku Armani i razmaŭlaŭ pa-francuzsku ź lohkim akcentam».
Druhi vypadak: «800 jeŭra, kab prakarmić siamju»
Pra padobny vypadak Charente Libre paviedamiŭ jašče adzin małady žychar Šaranty, jaki trapiŭsia na takuju ž schiemu. Mužčyna 35—40 hadoŭ, jaki razmaŭlaŭ pa-anhlijsku, paprasiŭ zapravić jaho mašynu.
«Jon jechaŭ na Audi A6 razam z žonkaj i dvuma dziećmi. Mnie stała niajomka, kali ja ŭbačyŭ ich biez vyjścia, tamu ja zapraviŭ im mašynu na 101 jeŭra, a ŭzamien mužčyna daŭ mnie 500 rubloŭ, što nibyta pavinna było składać 152 jeŭra. Farmalna ja navat zastavaŭsia ŭ plusie, što mianie i naściarožyła. Ale banknoty vyhladali sapraŭdnymi, z dobrymi vadzianymi znakami i pałasoj pasiaredzinie», — raskazaŭ 25‑hadovy Dźmitryj Błanšon.
Na hetym ašukaniec nie spyniŭsia: jon paprasiŭ maładoha čałavieka źniać jašče 800 jeŭra, kab «dapamahčy» jamu, spasyłajučysia na adsutnaść jeŭra i niemahčymaść prakarmić siamju. «Heta było ŭžo zanadta, — pryznajecca Dźmitryj Błanšon, — ale ja ŭsio roŭna pajšoŭ i źniaŭ u bližejšym bankamacie 200 jeŭra, jakija abmianiaŭ na novuju partyju «biełaruskich» banknot».
Kali razmova skončyłasia i «ździełka» adbyłasia, małady čałaviek sfatahrafavaŭ atrymanyja kupiury, kab pravieryć ich z dapamohaj štučnaha intelektu. Mienavita tady jon i zrazumieŭ, što staŭ achviaraj ašukanstva: banknoty sapraŭdy nie majuć chodu. Jon ahułam straciŭ 301 jeŭra. Małady čałaviek padaŭ zajavu ŭ palicyju.
Abodva vypadki — napamin być aściarožnymi, kali nieznajomyja ludzi na darozie prosiać zapravić im mašynu ci źniać najaŭnyja ŭ abmien na zamiežnuju valutu, asabliva takuju, jakuju ciažka adrazu pravieryć.
Kamientary