Dziesiać hadoŭ tamu dźvie pary maładažonaŭ vypadkova sustrelisia na moście ŭ Vaŭkavysku. A ciapier znajšli adny adnych u sacsietkach
Ci spracavała znakamitaja prykmieta, jakaja pavinna była zabiaśpiečyć moc šlubaŭ?
U hadavinu viasiella biełaruska Vieranika Rybak vyrašyła zhadać u sacsietkach cikavy vypadak, jaki adbyŭsia dziesiać hadoŭ tamu.
16 lipienia Vaŭkavysk śviatkavaŭ Dzień horada: Vieraniku z žanichom Janam raśpisali ŭ rajvykankamie, a natatku pra ich viasielle apublikavali ŭ miascovaj haziecie. Maładziony potym žartavali, što navat i salut zrabili śpiecyjalna dla ich.
Na fotasiesiju Vieranika i Jan pajechali ŭ sanatoryj «Praleska». Pa darozie byŭ most. Adrazu zhadali pra daŭniuju tradycyju: muž pavinien pieranieści žonku na rukach — i kali ŭ jaho atrymajecca heta zrabić, dyk šlub budzie doŭhim i nijakija ciažkaści jamu nie strašnyja.
Na moście para sustreła inšych maładažonaŭ — niaviesty, jakija byli na rukach, pavitalisia i chucieńka pavinšavali adna adnu. A potym žanichi razyšlisia ŭ roznyja baki.
Za hady šlubu ŭ Vieranicy z mužam naradziłasia dvoje dziaciej. Dziasiatuju hadavinu viasiella jany vyrašyli adśviatkavać maštabna. I ŭ pracesie padrychtoŭki znajšli toj samy zdymak ź inšaj paraj, zrobleny na moście.
Žančynie stała cikava, chto ž byli tyja maładziony i jak skłałasia ich žyćcio. Jana napisała dopis u Threads i apublikavała zdymak, spadziejučysia, što hieroi fota siabie paznajuć: «Vielmi spadziajusia, što ŭ ludziej usio dobra. I było b cikava daviedacca pra ich los. A raptam jany ŭžo nie ŭ Biełarusi, a niedzie ŭ svaim domie na Kipry? Kali heta nie tak, dyk ščyra im hetaha pazyču».
Dopis chutka zavirusiŭsia. A druhaja niaviesta znajšłasia litaralna praz hadzinu — joj akazałasia Łada Cieleš. Žančyna pryznałasia, što taksama časta zhadvała tuju dziŭnuju sustreču.
Jany z mužam Dźmitryjem taksama ščaśliva žyvuć u šlubie — praŭda, ciapier užo ŭ Minsku. U siamji padrastaje troje dačok.
A ŭ Threads abiedźvie siamji atrymali šmat vinšavańniaŭ ad nieznajomych ludziej.
Ciapier čytajuć
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie6
Kamientary