Biełarus zrabiŭ prapanovu kachanaj kala znakamitaha fantana Trevi ŭ Rymie — pad apładysmienty dziasiatkaŭ turystaŭ
Hanna i Alaksiej: paznajomilisia na pratestach, razam źjechali z radzimy — a chutka voźmuć šlub u Polščy. Takaja ramantyka z vodaram aŭtazaka mahła adbycca tolki ŭ biełarusaŭ.
U Biełarusi Hanna skončyła miedycynski ŭniviersitet, prajšła internaturu, a paśla pačała pracavać renthienołaham u adnoj z paliklinik.
U 2020 hodzie, jak i šmat chto ź inšych, dziaŭčyna nie mahła hladzieć na falsifikacyju vybaraŭ i hvałt, tamu raz za razam vychodziła na pratesty. Tak atrymałasia, što naprykancy žniŭnia mienavita tam Hanna i paznajomiłasia z Alaksiejem.
Hanna śmiajecca: užo paśla jana čuła historyi, što ŭ niekatorych ludziej była nadzieja sustreć svaju pałovu niedzie na maršy. Ale ž kaža, što sama nie mieła mety z kimści paznajomicca padčas pratestaŭ.
A voś znajomyja Alaksieja žartavali: «Davaj apranajsia paprystojniej, moža, dziaŭčynu sabie znojdzieš».
Hanna kaža, što spačatku nijakich ramantyčnych adnosin u ich nie było — niekalki miesiacaŭ maładyja ludzi prosta «partyzanili» razam. I, akramia pratesnaj aktyŭnaści, ich ničoha nie abjadnoŭvała.
Dziaŭčyna pryznajecca: jana adčuła, što Alaksiej — heta nie prosta chłopiec z takimi ž pohladami i kaštoŭnaściami — paśla jaho zatrymańnia ŭ listapadzie 2020 hoda.
— Zatrymlivali jaho paśla adnoj z akcyj davoli žorstka… Dali sutki — spačatku Akreścina, potym Žodzina. Ja sama ździviłasia, ale ŭ hety momant zakrałasia dumka, što jon vierniecca i ŭsio, bolš ja jaho nie adpušču. A kali jon vyjšaŭ, ja zrazumieła, što vielmi mocna jaho kachaju.
Naprykancy 2021 hoda para vyrašyła źjechać ź Biełarusi.
— Praz toje, u tym liku, što byli pahrozy z boku hałoŭnaj doktarki. Joj nie padabalisia maje palityčnyja pohlady. Mierkavańnie, što ŭ ludziej jość niejkija tam pravy — i što jany mohuć ich adstojvać — nie vielmi ŭpisvajecca ŭ biełaruskuju miedycynskuju sistemu.
Maładomu čałavieku Hanny zastavacca na radzimie było niebiaśpiečna. U vyniku jany razam emihravali ŭ Polšču. Tut Hanna ŭžo paśpiachova zdała niekalki abaviazkovych dla miedykaŭ ispytaŭ, nastryfikavała dypłom i pačała pracavać jak siamiejnaja doktarka. A jašče pajšła ŭ rezidenturu pa nieŭrałohii.
Hanna źjaŭlajecca maderatarkaj inicyjatyvy «Napišy list palitviaźniu», a taksama vałanciorkaj Biełaruskaha moładzievaha chaba.
Šmat biełaruskich par paśla emihracyi raspałasia: nie ŭsie adnosiny vytrymlivajuć vyprabavańni, jakich u novaj krainie bolš čym dastatkova. Hanna pryznajecca, što takija sumnyja prykłady jość navat siarod jaje znajomych — kali ludzi razychodzilisia navat paśla 5‑8 hadoŭ šlubu, niahledziačy na ahulnych dziaciej.
Ale ž na adnosiny Hanny i Alaksieja vymušany pierajezd nie paŭpłyvaŭ niehatyŭna.
— Jak tolki niejkija składanaści i ciažkaści adbyvajucca ŭ žyćci, to my, naadvarot, ź Lošam abjadnoŭvajemsia. Jak u filmie Power Rangers — źbirajemsia ŭ adnaho mahutnaha robata i prosta idziom naprastki. Naprałom, vyrašajučy pytańni, zadačy i prablemy, jakija, na žal, nie zakančvajucca, kali ty emihrant u pieršym pakaleńni.
Dziaŭčyna pryznajecca: paśla troch-čatyroch hadoŭ adnosin u jaje ŭžo nie-nie dy praskokvali dumki, što kachany chutka zrobić prapanovu ruki i serca.
— Ahułam było zrazumieła, što ŭsio idzie da šlubu. My abmiarkoŭvali toje, jakoj bačym našu budučyniu. I našy płany zaŭsiody sychodzilisia — tam było miesca dla nas.
Ale ž u vyniku prapanova stała dla Hanny siurpryzam. Adbyłosia ŭsio padčas pajezdki ź siabrami ŭ Italiju. U toj dzień para šmat hulała pa Rymu. Vielmi chacieli pabačyć znakamity fantan Trevi — ale dniom pobač sa słavutaściu zašmat ludziej.
Tamu chłopiec Hanny prapanavaŭ pajści tudy ŭviečary — heta była apošniaja noč u stalicy, ciahnuć dalej nie było kudy.
— Ščyra, ja była vielmi stomlenaja i płanavała siadzieć u apartamientach. Pieraapranułasia ŭ damašniuju vopratku i ŭžo amal što spała. Zdałasia tamu, što arandavali my žyllo ŭ starym horadzie i da fantana było litaralna mietraŭ 200-300. Tamu ja i pajšła ŭ chatnich tapačkach. Loša išoŭ napieradzie i paśmichaŭsia. Ja spytała: «Davaj, raspaviadaj, što zdaryłasia?» — a jon: «Dy ničoha». I znoŭ paśmichajecca, ale nie pryznajecca. Pomniu, što pracytavała «Uładara piarścionkaŭ»: «Dobra, zachoŭvaj svaje sakrety».
Pryjšli, pasiadzieli la fantana, pahladzieli na pryhažość… I tut raptam Alaksiej prapanavaŭ źniać videa z tancam, jakoje para płanavała zapisać na fonie niejkaj słavutaści ŭ Rymie.
I voś, para tančyć, Hanna kružycca, u niejki momant pavaročvajecca i bačyć, što kachany staŭ na adno kalena. Heta było nastolki niečakana dla dziaŭčyny, što jana adrazu padumała: a ci nie spatyknuŭsia Alaksiej?
— A tut ja raptam baču piarścionak u jaho ŭ ruce. U mianie pačynaje šumieć u vušach — ja nie pačuła ničoha, akramia svajho imia. Ja pačała płakać — takoha ja sama ad siabie nie čakała. Raniej dumała, što ŭ takoj situacyi pušču ślazu, bo miła i ŭsio takoje. Ale emocyi tak zachłynuli, što ja płakała i płakała. Raptam zrazumieła, što ja niejak vielmi doŭha nie adkazvaju, i kiŭnuła.
Ludzi, jakich, niahledziačy na poźni čas, było davoli šmat, reahavali burna: apładziravali, kryčali «Brava!», paśla padychodzili pavinšavać paru. A jašče dzialilisia videa — prapanovu ruki i serca źniali z usich mahčymych rakursaŭ. Bo ludzi ž zdymali adzin z samych pryhožych fantanaŭ śvietu — a tut takoje šou.
Paśla Ryma para ź siabrami płanavała pajechać u Nieapal, potym u Pampiei pahladzieć na Viezuvij. Pa darozie vyrašyli spynicca na plažy, kab aśviažycca ŭ mory.
A potym adbyłasia sapraŭdnaja drama. Hanna nadziavała ŭpryhožvańni, jakija źniała pierad kupańniem. I zaručalny piarścionak — toj samy, doŭhačakany! — pa-zdradnicku źlacieŭ z palca ŭ piasok.
— Ja kryču: «Usim stajać! U mianie piarścionak saskočyŭ z palca!». Hladžu ŭniz i ničoha nie baču. My pačali šukać — zdavałasia b, nu nie moh jon adlacieć daloka. Dziesiać chvilin prachodzić, dvaccać… Adzin ź siabroŭ kaža: «Nu heta nierealna». Potym jašče adzin pryznaje, što naŭrad ci adšukajem.
Ale Hanna kaža, što ni za što nie pajechała b ź plažu biez zaručalnaha piarścionka. Užo ŭjaŭlała, jak unačy budzie razhrabać piasok pry śviatle lichtaryka ŭ telefonie.
Razhladali roznyja varyjanty — u tym liku, vyklikać kahości ź mietałašukalnikam.
U hetaj historyi jość chepi-end: sama ž niaviesta ŭsio ž cudam zmahła adkapać piarścionak ź biełaha zołata, jaki adlacieŭ na niekalki mietraŭ.
Ciapier para čakaje, pakul Alaksiej vyrašyć svaje pytańni z dakumientami. A dalej — viasielle!
U Threads historyja Hanny i Alaksieja taksama sabrała šmat vodhukaŭ. Pavinšavali zakachanych u tym liku i Marharyta Laŭčuk sa Śviatłanaj Cichanoŭskaj.
Prapahandysty zapeŭnivajuć, što 196 palitviaźniaŭ užo na svabodzie9
Kamientary