Viasielny kvest u emihracyi: biełarusy raskazali, jak brali šlub u zamiežžy

Čamu nielha prosta ažanicca ŭ novaj krainie

Šmatlikija krainy, u tym liku Polšča, patrabujuć paćvierdzić, što inšaziemiec maje prava ŭstupić u šlub. Dla hetaha biełarusam treba pradastavić daviedku z konsulstva, što dla žanićby niama pieraškod. A dla hetaha, u svaju čarhu, patrebna inšaja daviedka — pra toje, što čałaviek nie znachodzicca ŭ šlubie.

Z 2023 hoda takija daviedki vydajuć tolki ŭ Biełarusi — asabista zajaŭniku abo inšaj asobie pa davieranaści, ale aformlenaj u Biełarusi. Tyja, chto nie mohuć pajechać za takoj daviedkaj na radzimu, pavinny albo atrymać rašeńnie suda, jakoje vyzvalić ich ad pradastaŭleńnia padobnaha dakumienta, albo šukać alternatyŭnyja šlachi zarehistravać adnosiny.

Cyrymonija doŭžyłasia piać chvilin

Vieranika (imia źmieniena) i jaje partnior žyvuć u Polščy, ale šlub vyrašyli zaklučyć praz amierykanski štat Juta, zakazaŭšy tam anłajn-rośpis. Kali b jany rehistravali adnosiny ŭ Polščy, praces moh zaciahnucca z-za nieabchodnaści źviartacca ŭ sud.

Dla arhanizacyi šlubu para źviarnułasia ŭ ahienctva, jakoje zajmajecca takimi rehistracyjami. Za jaho pasłuhi sužency zapłacili 500 jeŭra. Uvieś praces zaniaŭ kala miesiaca: u kancy krasavika im pryznačyli cyrymoniju, a ŭ kancy maja pryjšło paśviedčańnie ab šlubie z apastylem.

— Nam prapanoŭvali datu ledź nie na nastupnym tydni, ale my chacieli vybrać svaju. Składanaściaŭ asabliva nie było, tam nie patrabujuć nijakich dakumientaŭ, akramia fatahrafii pašparta i zapoŭnienaj ankiety z asabistymi dadzienymi.

Sama cyrymonija šlubu prachodziła anłajn.

— Jana doŭžyłasia litaralna piać chvilin. Nam prapanavali dapłacić 100 jeŭra za bolš uračystuju cyrymoniju na 15 chvilin, ale my admovilisia.

Dalejšym pryznańniem amierykanskaha paśviedčańnia ab šlubie ŭ Polščy maładyja zajmajucca samastojna.

Niečakana bolš za ŭsio pytańniaŭ u pary ŭźnikła nie da rehistracyi šlubu, a da mahčymaha razvodu. Kali pabracca šlubam u Jucie možna, ni razu tam nie pabyvaŭšy, to dla skasavańnia šlubu tudy treba jechać.

— Dla razvodu, nakolki ja viedaju, treba pražyć try tydni ŭ Jucie, my pravieryli hetaje pytańnie na ŭsiaki vypadak. Ale abodva pryniali rašeńnie, što nas heta nie biantežyć. Kali niešta adbudziecca, to vyrašym užo pa fakcie. Ale my doŭha pra heta razmaŭlali.

Vieranika śmiajecca, što mienavita hetaja asablivaść amierykanskaha štata bolš za ŭsio cikaviła i navakolnych.

— Usie siabry, chto daviedvaŭsia pra toje, što my ženimsia ŭ Jucie, nas papiaredžvali pra razvod.

Viasielnaj uračystaści ŭ pary pakul nie było.

— Adznačyli tolki z baćkami, dumajem jašče nad tym, kab pravieści viasielle na pieršuju-druhuju hadavinu.

«Akramia pašparta i hrošaj, ničoha nie treba»

U Threads mnohija karystalniki taksama dzielacca dośviedam rehistracyi šlubu v Jucie. Siarod hałoŭnych pieravah nazyvajuć nievialikuju kolkaść dakumientaŭ i chutkaść afarmleńnia.

«Tam akramia pašparta i hrošaj, ničoha nie treba. A jašče patrebny dva śviedki — imi mohuć być chto zaŭhodna», — piša karystalnica katskonastya.

Košt rehistracyi va ŭdzielnikaŭ abmierkavańnia skłaŭ kala 280—300 dołaraŭ. Tak, karystalnica stepwise.space raspaviała, što razam z apastylem zapłaciła kala 280 dołaraŭ. Zatym sužency pierakłali dakumienty za 500 złotych (140 dołaraŭ), apłacili pošlinu ŭ polskim zahsie i zarehistravali paśviedčańnie ab šlubie ŭ Polščy.

Što treba dla rehistracyi šlubu ŭ Jucie

Pavodle dadzienych uładaŭ akruhi Juta, dla anłajn-rehistracyi šlubu sužencam spatrebiacca dakumienty, što śviedčać asobu, dva paŭnaletnija śviedki i dostup da videasuviazi. Asobnuju daviedku pra toje, što čałaviek nie znachodzicca ŭ šlubie, pradastaŭlać nie treba.

Paśla cyrymonii sužency atrymlivajuć paśviedčańnie ab šlubie. Kali jany płanujuć vykarystoŭvać jaho ŭ Polščy, dakumient treba apastylavać, pierakłaści na polskuju movu i pradastavić u polskija orhany.

«Maksimalna pryjemny dośvied, choć dumali, što treba budzie «padniać asfalt»

Niekatoryja biełarusy vybirajuć inšyja krainy.

Karystalnica _caterina_make_up raspaviała, što jany z mužam vyrašyli pažanicca ŭ Hruzii.

«Vybrali varyjant biez zamaročak z dakumientami, palacieli ŭ Hruziju. I ličym, što zrabili pravilna», — piša jana.

Dla rehistracyi šlubu ŭ Hruzii spatrebiacca dakumienty, jakija śviedčać asobu, a taksama dva paŭnaletnija śviedki. Kali chtości z sužencaŭ raniej znachodziŭsia ŭ šlubie, treba pradastavić dakumienty ab jaho prypynieńni. Rehistracyja šlubu biaspłatnaja.

Inšyja pary vybirajuć Daniju. Catherinewasilyewa raspaviadaje, što pracedura akazałasia značna praściejšaj, čym jany z mužam čakali.

«Lacieć z Hdańska mienš za hadzinu, i rejsy niekalki razoŭ na dzień. Abyšlisia bieź pierakładaŭ dakumientaŭ, pakiet maksimalna prosty, dziaržpošlinu naohuł viarnuli na kartu, a apastyl pastavili za piać chvilin. Maksimalna pryjemny dośvied, choć dumali, što treba budzie «padniać asfalt».

Dla rehistracyi šlubu ŭ Danii spatrebiacca dakumienty, jakija śviedčać asobu. Akramia taho, ułady mohuć zapytać paćvierdžańnie zakonnaha znachodžańnia ŭ krainie i dakumienty ab prypynieńni papiaredniaha šlubu, kali jon byŭ. Za razhlad zajavy na rehistracyju šlubu spahaniajecca zbor u pamiery 2100 dackich kron (kala 330 dołaraŭ).

Čakajuć dazvołu paŭtara hoda

Mnohija biełarusy Polščy, jakija nie mohuć atrymać na radzimie daviedku ab mahčymaści zaklučyć šlub, vymušany źviartacca ŭ polski sud z prośbaj vyzvalić ich ad abaviazku pradastaŭlać hety dakumient.

U Threads karystalniki abmiarkoŭvajuć, kolki času zajmaje čakańnie rašeńnia suda. Adny raspaviadajuć, što atrymali jaho praz čatyry miesiacy, inšyja čakali kala vaśmi. Adnak niekatorym param davodzicca čakać značna daŭžej.

Dana atrymała prapanovu ruki i serca ŭ śniežni 2024 hoda. Tady ž para daviedałasia, što dla rehistracyi šlubu ŭ Polščy spatrebicca rašeńnie suda: žanich i niaviesta znachodziacca pad mižnarodnaj abaronaj. Dakumienty jany padali ŭ Sasnoŭcy, dzie žyli na toj momant.

— Nam kazali, što čakać rašeńnia daviadziecca prykładna ad paŭhoda da hoda. Nas heta zadavalniała: my nikudy nie śpiašalisia.

Rehistravać šlub za miežami ES para nie chacieła: u Dany skončyŭsia pašpart, a z prajaznym dakumientam, jaki jaho zamianiaje, jana aścierahajecca latać za miežy Šenhienskaj zony. Anłajn-rehistracyju taksama nie razhladali.

— Chaciełasia ŭsio ž taki raśpisacca ŭ zahsie, abmianiacca piarścionkami i prajści praz usio heta ŭžyvuju.

Z momantu padačy dakumientaŭ prajšło ŭžo paŭtara hoda. Tym nie mienš šukać alternatyŭnyja varyjanty budučyja sužency nie źbirajucca.

— Navat kali b my zahadzia viedali, što praces nastolki zaciahniecca, usio adno pajšli b hetym šlacham. Prosta, mahčyma, złavalisia b nie tak mocna.

• 1
• 1
• 0
• 0
• 0
• 0
• 0
• 0