133 siłaviki na 277 čałaviek, ź jakich 26 dzieci. Stała viadoma, jak razhaniali źlot pad Rasonami
Siłaviki raskazali padrabiaznaści pra razhon źlotu «Biełaruskaja viasiołka», jaki adbyvaŭsia na bierazie voziera Biełaje kala vioski Miežna Rasonskaha rajona.
Na bierazie voziera siłaviki naličyli 47 aŭtamabilaŭ, dziasiatki namiotaŭ, abstalavanyja vohniščy, mahutnyja kałonki i muzyčnyja instrumienty. Pavodle aficyjnych źviestak, u zbory ŭdzielničali nie mienš za 277 čałaviek: 251 darosły i 26 niepaŭnaletnich.
Siarod udzielnikaŭ byli 68 zamiežnikaŭ — 67 hramadzian Rasii i adzin hramadzianin Izraila.
Dla praviadzieńnia razhonu mierapryjemstva zadziejničali 133 supracoŭnikaŭ milicyi, u tym liku 89 amapaŭcaŭ, a taksama supracoŭnikaŭ DAI, patrulna-pastavoj słužby i śledča-apieratyŭnaj hrupy.
Dla raźbiralnictva ŭdzielnikaŭ dastavili tryma aŭtobusami ŭ rajonny Dom kultury. 26 dziaciej razam z baćkami raźmiaścili ŭ fizkulturna-azdaraŭlenčym kompleksie «Start».
U dačynieńni da ŭdzielnikaŭ pačalisia administracyjnyja pracesy. Pa słovach milicyi, užo składziena kala 70 pratakołaŭ za parušeńnie paradku arhanizacyi i praviadzieńnia masavych mierapryjemstvaŭ, a taksama za raspaŭsiudžvańnie nibyta «ekstremisckich» materyjałaŭ.
Siłaviki taksama paviedamili pra zatrymańnie administrataraŭ tematyčnaha telehram-čata «Biełaruskaja viasiołka», praź jaki nibyta adbyvałasia zaprašeńnie i kaardynacyja ŭdzielnikaŭ.
Adzin z zatrymanych — 52‑hadovy minčanin Alaksandr Žoraŭ, supracoŭnik kamiercyjnaj kampanii. Śćviardžajecca, što raniej jon nibyta pryciahvaŭsia da administracyjnaj adkaznaści za ŭdzieł u pratestach 2020 hoda i znachodzicca ŭ milicejskich bazach jak čałaviek, źviazany ź finansavańniem pratesnaj dziejnaści.
Druhoj zatrymanaj nazvanaja 20‑hadovaja ŭradženka Hrodna Alisa Kuchta, jakaja pracuje ŭ adnoj z hrodzienskich škoł.
«Pastavili pałatki, raźviali vohniščy». MUS paćvierdziła zatrymańnie 350 čałaviek pad Rasonami. Znajšli i arhumient: «Mnohija ŭ hołym vyhladzie pierad małaletnimi»
Pad Rasonami zatrymali 350 udzielnikaŭ turźlotu
Žychara Žłobina asudzili za pratesty, choć termin daŭniny pavinien byŭ vyjści. Jak takoje mahčyma?
Ciapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1515
Kamientary