Трамп анансаваў гістарычную здзелку з Іранам, пасля запосціў правакацыйны нейрасеткавы малюнак
Злучаныя Штаты і Іран знаходзяцца за крок да падпісання пагаднення аб спыненні баявых дзеянняў. Пакуль дыпламаты ўзгадняюць умовы зняцця марской блакады і правілы суднаходства, амерыканскі прэзідэнт працягвае правакаваць Тэгеран у сацыяльных сетках і зводзіць старыя рахункі з Баракам Абамам.
Аб хуткім прарыве ў перамовах Дональд Трамп паведаміў у сваёй сацыяльнай сетцы Truth Social, адзначыўшы, што працэс знаходзіцца на апошняй стадыі.
Амерыканскі партал Axios са спасылкай на ўласныя крыніцы ўдакладніў, што праект дэкларацыі прадугледжвае падаўжэнне рэжыму спынення агню на 60 дзён. За гэты час Іран мусіць прыбраць марскія міны, а праход праз Армузскі праліў стане бясплатным.
Узамен Вашынгтон здыме блакаду іранскіх партоў, дазволіць экспарт нафты і пачне абмеркаванне разблакіроўкі іранскіх актываў. Пры гэтым ядзернае пытанне і перадача ўзбагачанага ўрану ў папярэдні дакумент не ўвайшлі, а поўны вывад амерыканскіх войскаў адбудзецца толькі пасля падпісання фінальнага пагаднення.
Аднак іранскі бок бачыць умовы інакш. Інфармацыйнае агенцтва Tasnim, блізкае да Корпуса вартавых ісламскай рэвалюцыі, абвергла інфармацыю пра 60‑дзённае перамір'е. Паводле іх дадзеных, дакумент прадугледжвае поўнае спыненне вайны на ўсіх франтах, уключаючы Ліван. Пытанні марской блакады і Армузскага праліва павінны быць вырашаны за 30 дзён, а перагаворы па ядзернай праграме вынесены ў асобны 60‑дзённы перыяд.
Пакуль бакі спрачаюцца наконт інтэрпрэтацыі тэкстаў, гаспадар Белага дома вырашыў акрэсліць жорсткія межы дазволенага. Трамп апублікаваў разгорнуты допіс, у якім назваў перамовы арганізаванымі і канструктыўнымі, але загадаў сваім прадстаўнікам нікуды не спяшацца, бо час цалкам працуе на Вашынгтон.
Ён катэгарычна заявіў, што марская блакада застанецца ў поўнай сіле да таго моманту, пакуль пагадненне не будзе канчаткова ўзгоднена, зацверджана і падпісана, бо ў такой справе не павінна быць ніводнай памылкі.
Трамп таксама выкарыстаў нагоду, каб абрынуцца з крытыкай на свайго папярэдніка, назваўшы іранскую ядзерную ўгоду «Барака Хусэйна Абамы» адной з найгоршых здзелак у гісторыі ЗША, якая нібыта адкрывала Тэгерану прамы шлях да стварэння бомбы.
Цяперашні дагавор быў прэзентаваны як поўная супрацьлегласць мінулым памылкам. Паводле слоў прэзідэнта, адносіны робяцца больш прафесійнымі і прадуктыўнымі, але Іран мусіць раз і назаўжды забыцца пра распрацоўку ці набыццё ядзернай зброі.
Разам са стрыманымі заявамі пра важнасць пагаднення Трамп апублікаваў правакацыйны малюнак, згенераваны нейрасеткай, на якім узброены амерыканскі самалёт знішчае два іранскія катары, а людзі літаральна разлятаюцца ў паветры. Выява суправаджалася вялікім чырвоным надпісам «Adios».
Цяпер чытаюць
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?11
Каментары