«Sił niama bolš ad hetych kadencyj». Žonka biełaruskaha dalnaboja pacikaviłasia, kudy možna prystroić muža, kab toj byŭ pobač
Žonka dalnabojščyka pytałasia, dzie znajšli sabie pracu mužčyny, jakija kinuli fury ŭ Jeŭropie i viarnulisia ŭ Biełaruś.
Ci jość alternatyva?
«U kaho muž abo chłopiec — dalnabojščyk i pierajšoŭ pracavać u Biełaruś, padzialiciesia, dzie pracuje?» — napisała žančyna ŭ tredsach i dadała, što ŭžo nie maje sił ad kadencyj muža pa niekalki miesiacaŭ.
Dopis sabraŭ bolš za sotniu kamientaryjaŭ. Vyhladaje, što tema balučaja dla mnohich. Ale adzinaha receptu, jak być, nie znajšłosia.
Žančyna, čyj muž adpracavaŭ 10 hadoŭ dalnabojem, raskazała svaju historyju.
«U adzin momant skazaŭ, što bolš nie moža, zvolniŭsia. Uleźli ŭ daŭhi, kupili svoj samazvał, pajšoŭ pracavać u kałhas. U siezon zarobak u 3‑4 razy bolšy, čym na fury. Tak, ciapier u siezon uborki ŭ jaho niama vychodnych i praca z ranicy da nočy. Ale ja splu spakojna i viedaju, što jon pobač i ŭ luby momant my z dačkoj sami možam da jaho pryjechać», — napisała žančyna.
Ale nie ŭsim udajecca znajści hodnuju pracu ŭ Biełarusi.
«Dziesiać hadoŭ adpracavaŭ pa Jeŭropie, nadakučyła, siamja razvaliłasia, pryjechaŭ u Biełaruś, paŭhoda jeździŭ na fury pa Biełarusi, žyŭ ad zarpłaty da zarpłaty», — dzielicca adzin mužčyna.
U vyniku jon nabyŭ sabie 12‑tonny tentavany hruzavik, ale kaža, što pakul sprava idzie vielmi słaba.
«Paśla ŭsich apłat sabie amal nie zastajecca, ale na ścipłaje žyćcio chapaje, jość dumki viarnucca na pana pracavać, niejak tak», — pryznaŭsia mužčyna.
Adzin z kamientataraŭ napisaŭ: maŭlaŭ, praściej za ŭsio kupić sčepku i pracavać na siabie.
Na što jamu adkazali, što heta vielmi drennaja parada — Rasija ciśnie z usich bakoŭ, i z adnoj mašynaj u hetym biznesie dakładna ničoha nie atrymajecca.
Pamykalisia ŭ Biełarusi i viarnulisia pracavać u Jeŭropu
Inšy kamientatar apisaŭ dośvied znajomaha, jaki taksama paśla 10 hadoŭ pracy na fury ŭ Jeŭropie vyrašyŭ kinuć hetuju spravu i viarnuŭsia ŭ Biełaruś.
«U Biełarusi z kartaj pabytu (DNŽ jeŭrapiejskaj krainy — NN) u dziaržaŭnyja arhanizacyi nie biaruć, pryvatniki płaciać 1500‑2000 rubloŭ. Paŭhoda patykaŭsia i znoŭ pajechaŭ na kadencyju».
«Ja pracavaŭ na kadencyjach u Polščy, adsutnaść doma miesiacami — heta tryndziec. Tamu ja ŭziaŭ usiu siamju i pieravioz. Ciapier lahčej, možna rehulavać hrafiki, jak chaču», — apisaŭ situacyju inšy.
Niekatoryja sprabavali zamiest Jeŭrasajuza pracavać taksama na fury, ale ŭ Biełarusi.
«Ja sam muž, jaki sprabavaŭ z kadencyi ŭ Biełaruś viarnucca. Nu jaho nachran. Ničoha nie zarablaješ, uvieś čas u rejsie, niervy, zima. Svaje durać na zarobak bolš, čym litoŭcy jakija-niebudź», — padzialiŭsia svaim dośviedam dalnabojščyk.
Inšy dadaje, što ŭ Biełarusi niašmat płaciać.
«Paŭhoda papracavaŭ u Biełarusi — i heta piekła! Ale tolki pasprabavaŭšy, daviedaješsia, tak što chaj sprabuje tut, viarnucca zachočacca chutka», — raskazała ab pracy ŭ Biełarusi žonka dalnabojščyka.
Z fury ŭ aŭtobus
Znajšoŭsia mužčyna, jaki syšoŭ z dalnaboja ŭ Jeŭropie ŭ kiroŭcy haradskoha aŭtobusa.
Jość i tyja, chto pačaŭ jeździć pa Biełarusi abo Biełarusi i Rasii, kab doma byvać čaściej.
«Viarnuŭsia ŭ Biełaruś, pajšoŭ na furu jeździć Brest-Viciebsk dva razy na tydzień, na pryvatnika pracuje, narmalna płaciać»,
«Naša tema, pa 3‑4 miesiacy kataŭsia. Ciapier Minsk — Nižni Noŭharad — Minsk. Tak zarpłata mienšaja, ale tata doma kožny tydzień», — adpisvajuć žonki dalnabojščykaŭ.
Treba vybirać, što budzie doma
Niekatoryja zaŭvažajuć, što žančynie treba vybirać: abo hrošy, abo muž doma.
Adzin z kamientataraŭ navat paraiŭ žančynie iści na pracu da muža.
«Abo muž doma, abo hrošy. Davodzicca vybirać. Albo jašče jość vychad. Atrymać katehoryju i z mužam na pracu. Ciapier mnohija pracujuć razam, i ja ŭ tym liku», — adpisaŭ dalnabojščyk.
«Praca znojdziecca. Prosta treba vybrać pamiž hrašyma i mužam doma», — piša inšy.
Pračytaŭšy ŭsie mierkavańni, adzin z kamientataraŭ pryjšoŭ da nastupnaj vysnovy: «Miarkujučy pa hetaj vietcy, niefih kudyści dziorhacca z kadencyi».
Ciapier čytajuć
Što viadoma pra Maksima Palanskaha i Mikałaja Śvirydava — biełaruskich alpinistaŭ, jakija źnikli ŭ harach Kyrhyzstana2
Kamientary