Kalininhradskija pieravozčyki skardziacca, što ich fury masava zatrymlivajuć u Biełarusi
Kalininhradskija pieravozčyki sutyknulisia z masavymi zatrymkami hruzavikoŭ na terytoryi Biełarusi. Častku ciahačoŭ zdymajuć z maršrutaŭ i nakiroŭvajuć na ekśpiertyzu, jakaja moža doŭžycca niekalki miesiacaŭ, piša rehijanalnaje vydańnie «Kłops».
Jak raskazaŭ vydańniu pradstaŭnik adnoj z transpartnych kampanij Ivan Zajcaŭ, prablema ŭźnikaje paśla prachodžańnia litoŭska-biełaruskaj miažy. Kiroŭca padaje nieabchodnyja dakumienty, paśla čaho jamu paviedamlajuć, što ciahač treba pakinuć na stajancy na niavyznačany termin. Pry hetym pieravozčykam nie tłumačać, čamu dla pravierki vybirajuć mienavita toj ci inšy aŭtamabil.
Pavodle słoŭ Zajcava, na punkcie propusku kiroŭcam kažuć, što ich mašyna zastajecca na ekśpiertyzie i prapanujuć źviazvacca z kiraŭnictvam, vyklikać inšy ciahač i zabirać pryčep.
Pieravozčyki miarkujuć, što pravierki źviazanyja z vyśviatleńniem sapraŭdnaści dakumientaŭ na transpartnyja srodki. U adnym z vypadkaŭ dakumienty na ciahač byli vydadzienyja Kalininhradskaj dziaržaŭtainśpiekcyjaj jašče ŭ lutym.
Prablema, pavodle infarmacyi pieravozčykaŭ, zakranaje nie adzin punkt propusku. Moža iści havorka prykładna pra 300 hruzavikoŭ z kalininhradskaj rehistracyjaj. Na adnym z pamiežnych pierachodaŭ užo sabrałasia kala dziesiaci takich mašyn.
Terminy ekśpiertyz istotna adroźnivajucca. Ciahač Zajcava prastajaŭ kala tydnia, ale inšyja pieravozčyki raskazvajuć pra čakańnie na praciahu troch-čatyroch miesiacaŭ i navat daŭžej.
Asabliva surjoznyja nastupstvy heta stvaraje dla kampanij, jakija pieravoziać pradukty, što chutka psujucca. Firma Zajcava zajmajecca transpartavańniem padviasnoha miasa, dla jakoha terminy dastaŭki stroha abmiežavanyja. Pavodle jaho słoŭ, na dastaŭku da miesca pryznačeńnia dajecca ŭsiaho čatyry dni.
Kali ciahač zatrymlivajuć, pieravozčyku davodzicca terminova šukać inšuju mašynu, kab zabrać pryčep i nie sarvać pastaŭku. U adnym z vypadkaŭ košt hruzu składaŭ kala 4 miljonaŭ rasijskich rubloŭ (kala 48,5 tysiač dalaraŭ).
Straty niasuć nie tolki pieravozčyki, ale i ŭładalniki hruzu. Transpart prastojvaje, kiroŭcam nieabchodna vypłačvać zarobak, a dadatkovyja vydatki ŭ vyniku mohuć pavialičyć košt tavaraŭ dla spažyŭcoŭ.
Pieravozčyki taksama skardziacca na ŭmovy čakańnia. Zatrymanyja ciahačy adpraŭlajuć na śpiecyjalnyja stajanki, dzie, pavodle ich słoŭ, niama ni kaviarniaŭ, ni kram.
Pradprymalniki ŭžo źviartajucca na haračuju liniju Asacyjacyi mižnarodnych aŭtamabilnych pieravozčykaŭ, adnak pakul vyrašyć prablemu z praciahłymi pravierkami nie ŭdałosia.
Stali viadomyja padrabiaznaści ataki dronaŭ na hruzaviki na rasijska-biełaruskaj miažy
Jak žyvuć ludzi ŭ najbližejšym da Biełarusi łatvijskim rajcentry i što dumajuć pra zakryćcio miažy
U Hiermanii biełarus pierakuliŭsia na fury sa śvinymi kumpiakami
U Rasii biełarus na fury tak urezaŭsia ŭ aŭtazak, što aryštant unutry straciŭ prytomnaść
Kamientary